Te Toka n te Kaa Nakon te Taromauri

Ngke itiua au ririki, tinau ao tamau a reitaki n iraorao ma te utu ae aki-bati ni kakaonimaki inanon ara uoote ae te tina ae akea buna ao iai uoman natina mwaane. Tariu ae karimoau, John, ao ngai ti terorona ma ataeinimwaane aika uoman aikai, Robin ao Shannon, ngaia are e tara n nakoraoi bwa ti na reita te waaki ni iraorao.

Akea aia kaa te utu aei, ngaia are tamau e anga nanona ni katokaia man mweengaia n te kaawa ae bubura irarikira n nako ao n oki man te taromauri. I ururingi boong ake e kawaekoaira iai Tamara ngai ma tariu bwa ti na iria n anaia. I aki kukurei n te tai arei, n aki tabeakina ngurengureu, e reitinako Tamau ni kakatokaia ni karokoa te tai are a rangi ni kakaonimaki nakon te taromauri ao n reke oin aia kaa. Robin ao Shannon a waekoa ni bwabetitoaki ao ni kamatoaki, ao tinaia e a moanna n ira waakin te Bootaki n Aine. I aki kona n ataia n te tai arei te bwai ae na riki ae tamaroa man te mwakuri ni ibuobuoki arei.

Tabeua namwakaina imwain ae I moana au kawaniua ni koraki n te reirei, ao e mate tamau. Ni kakorakora riki nanokawakiu, I aki bati ni mwannanoa aron taraan rabwatau ao akean raoraou. I a moanna n taenikai man namakina te bwarannano, ao I kabanea au tai ni motirawa n te tawanou n ririanna nakon mweengau ao n oki ibukina bwa I aki kona moan te tekateka ni maroa.

N te ririki naba anne, te utu ake ti a tia ni iraorao ma ngaia a mwaewe nakon ara reirei, ao Shannon e moanna n iriira au reirei. Ti a bon waekoa n riki naba bwa rao ni koaua. I a namakinna ae I mwannanoaki, ao I aki manga nanokawaki. N ataakin ae temanna e kukurei n riki bwa raoraou e karikirakea nanou n aron kakawakiu. I aki manga kabanea au motirawa n te tawanou n tingai.

Ara waaki n iraorao e a rikirake ni matoatoa inanon ara tai n reirei n te kauarinan. Ngke a kitana te reirei tarira ake karimoara nakon te mition, Shannon ao ngai ai bon taari ngaira n onoi mwiia tarira ake a nako. Ti karekei Kaniwanga n Tikauti ae te Ikare n te bootaki ni karineaki ae ti tebo, ti uaia n nakon te iuniwetiri ae ti tebo, ti uaia n nakon te mition n tain te motirawa n te kabuebue, ao ti uaia n maeka n te ruu teuana imwina riki. Ti uaia ni mareaki n te Salt Lake Tembora nakoia aine aika moan te tikiraoi, ao ara moan nati a bungiaki n te maranga ae teniua namwakaina imarenaia.

Teuana te tairiki imwain mareakin Shannon, ti a moanna n tataekina arora ngke ti uarereke. I tuangnga arona ngke e a tia ni buokai n tokanikai iaon nanou n raraoma ao ni keiakina aron maten tamau. Bon ana waaki n iraorao, I reitia riki, bwa e a tia ni buokai ni bita aron maiu. Imwina Shannon e tuangai bwa ngke arona bwa tamau e a aki kakatokaia ana utu nakon te taromauri, e na bon aki ira te taromauri, n aki karaoa te mwakuri ni mitinare, ao n aki tia ni kabaeaki n te tembora.

E korakora rotan nanou n te Tamnei n tain te marooro ngke I a atai taian kakabwaia man ti te totoka nakon te taromauri are e a tia n roota maiura. Ngke I a kaoka ururingan ana iraorao Shannon, I ataia bwa tamau e aki ti buokia ni kamaiua ana utu Shannon, ma e katauraoa naba te rao are e na buoka oin natina ni kamaiua.