Teimatoa Mai Moana

“Antai taan reirei?” I titirakina raoraou ngke ti kakaraki inanon kawaira ni ingabongin te Kaonobong Beberuare 2000. Ai 14 ngkanne ara ririki.

“Bon raraou ao a mena ikai ibukin te bwai ae kanga ai aron te mwakuri ni mitinare,” e taku. Ti tuai man taetae iaon te aro mai mwaina, e ngae ngke ti bon rangi ni iraorao. E tuangai bwa ti na kaea reirein te Ingiriti ae a angareirei iai raoraona ae a aki kaboaki. E ataia ae N na rangi n nano iai ibukina bwa N nang nako n reirein te kauarinan ibukin te Ingiriti.

Ngke ti rin inanon te kateitei, a rangi n toka matau nakon taian tamnei aika teke n te o. Te umwantabu aei? Tiaki aron taraan te Bulgarian Orthodox Church, bon tii te umwantabu ae I a tia n roko iai mai mwaaina. Angiia aomata a iangoia ekaretia ake tabeua bwaa oin aro. Ao aron naba aia onimaki Bulgaria, ngke e mena iaan te tua ni kominiti n 1989, a bon kakeweaki taian onimaki n te aro, ao a mwaiti aomata aika a tara te aro bwa te bwai ae e aki eti.

E tuangai raraou ngkana I tangiria n roko nakon te taromauri n te bong are imwiina. I kaeka eng, ibukin te kan ataibwai riki nakon te taromauri. I ataia bwa ngkana e na nako, ao bon akea te bwai ae bure iai.

I moana nakou nakon te taromauri n te tai ae bati. I tangiria ni kan atai riki ana reirei. I kan ataia bwa bukin tera aomata aika kairake ake iai nnen araia a kitani abaia n roko nako Bulgaria ao ni kaaki ngaiia inanon maiuakinan te aro ae aki kakukurei aei. E ngae ngke I aki taua te aro n te tai anne, iai te bwai teuana ae kateimatoai bwa N na kaakaei bootaki ni kakukurei n te Ekaretia. I tangira aia iraorao n tamnei mitinare ao moangareia ae kakateke kaain te ekaretia.

I moana au iraorao ma ataeinaine n te mwaanga. I mimi n aia onimaki ao n nanoia ae korakora ni kan buokiia tabemwaang. I uringa au moan tataro n reirein te Bootaki n Ataeinaine. I tuai man tataro mai mwaina, ao I aki ataia bwa aekakira aron mwaakan te tataro. I tuai man namakina aron korakoran te reitaki ma Tamara are i Karawa are e uotia te tataro. I tuai man ataia ae ngai bon Natina te aine. I tuai man katoka au tataro imwiin arei. Ni katoa te tai ngkana n na tokanikai iaon au kangaanga, I ataia ae I kona ni butia Tamau are i Karawa ibukin kairau. N angin te tai, taian tataro aikai a kabwaroi ranin matau ibukina bwa I kona n namakina ana kabaebae te Tamnei ae Raoiroi bwa E tangirai te Atua. I a moana onimakinan te Uea.

Ngkana a roko kariiri man maiun te kairake, I a kaman karekea te onimaki ae matoatoa iroun Iesu Kristo, are e anganai te korakora bwa N na tokanikai iaon kariri aikai. I kona n nora aron Taatan ni kaririia rorou nako ma bwain nako te aonaaba ao a kanga aron taian boraraoi n riki bwa bwaai aika bubura. E kangaanga bwa N na tei ibukin au koaua, ma te reitaki are I karekea ma Tamau are i Karawa rinanon te tataro e buokai bwa N na kararoaai man taian kariiri. I a iangoia bwa N na maiuakini moan tuua n te babaire ibukin te kamaiu. I ataia ma te aki nanokokoraki bwa n te bong teuana ao N na bon kakabwaiaki.

Te kananokawaki, bwa I aki kona ni kaaina te Ekaretia n te tai anne. A rangi n totoko au karo, ai moarariki tamau. Ma I kona n ota irouna. E aki te roko n te kairia tamana nakon te taromauri; e kaikawaki rake ngke e mena te aba iaan te tua ni kominiti. E ngae n anne, I ataia bwa e a tia te Uea ni katauraoa te kawai ibuku bwa N na kaaina te Ekaretia n te bong teuana. I a kaman ataia bwa te kawai anne e rangi ni kangaanga. Ma I reiakinna man koroboki aika tabu bwa a kona ni bon reke kangaanga aikanne ibukin ara raoiroi.

I kaea te tieminari ao imwiina te intitute, I kaei taian bootaki ni kakukurei n te Ekaretia, ao I moana naba karaoan au Rikirakeu Ibon Irou. I aki kona n tataninga ni kaean bootakin kakukurei n te Bootaki n Ataeinaine. N na aki kona ni mwaninga taian aoa ake ti kabanei ni kuuka, ni karaoi reeta aika uarereke (postcards) ao beeban tauan baan te boki (bookmarks) katamaroaan ara umwanreirei, ke n takakaro n taian takakaro nako, ao arona naba ma tamnein te iraorao ae tamaroa imarenara. Te bootaki ni kakukurei n tatabeua nako e buokai n ata anuau mairoun te Atua ao tibwangau n te maiu aei.

Teuana mai buakon te kabanea ni kangaanga ni mwakurin te Rikirakeu Ibon Irou bon kamatenanoan “Te Kristo Ae Maiu.” Ngke I tara te koroboki, I taku bwa bon teuana te kataaki ae bubura kamatenanoana. Imwiin uoua te wiiki, I a ataia bwa bukin tera te mwakuri ae baireaki anne e mena inanon te Anua ae Tamaroa ae te Onimaki. Bon tuoan te onimaki ao te taotaonannano, te kataaki ma mwiina ae karekea te kakukurei. Te kakoaua irouia Abotoro a buokai ni kakorakora au onimaki ao au koaua. Man ururingan aia taeka ae katekenano iaon anuan maiun Kristo n Atua ao ana mwakuri ni ibuobuoki, I a karekea te ungannano bwa N na bon Kakoauaa.

Ngke ai 16 au ririki, iai ara bootaki ni kakukurei ae boboto iaon te riki ni mitinare ae bwanin ana tai. Ti tibwauaaki nakon kakauoman ao ti maeka n ai aroia mitinare inanon teuana te wiiki. Anne au moan tai are I reiakina iai aron kakaawakin titibwauaan ara koaua nakoia tabemwaang. Te bootaki ni kakukurei aei e buokai n ata tiaki tii aron matoatoan te mwakuri ibukin te Uea, ma aron te kimwareirei ae ti namakinna naba man tibwauaan te euangkerio ao nooran ae e kanga ana reirei Kristo ni bita maiun temanna. E buokai n ataia bwa aekara aron te riki n “tei bwa taan kakoaua iroun te Atua n taai nako ao ni bwaai nako, ao n taabo nako” (Motiaea 18:9).

Ngkai bon “tiaki ngai kaain te Ekaretia ae kakaonimaki,” n aron ae a weweteai iai, I reiakinna bwa N na karekea te tataonannano ao te kaantaninga bwa n te bong teuana ao N na bon riki bwa kaain te Ekaretia. I ataia bwa bon tuoan au onimaki ma au tataonannano. I iangoia bwa e na maanra aron reken te kaitiakaki ao moanakin te maiu ae boou.

E roko te bong arei ngke tao e nang koro itiua te ririki imwiin are e kairai raoraou nakon te umwantabu ni kamwaitoron te ingabong ni Beberuare 2000. I bwabetitoaki ni 21 ni mweengaia mitinare i Sofia. Au bong ni bwabetito bon te bong teuana ae rangin ni kakukurei inanon maiu. N te tai anne ao I namakina korakoran ana tangira ni kaboi maiura Tamara are I Karawa ibuku. I nanamakina riki anne ngke I a taua te toa n te bong are imwiina. I aki kona n taui ranin matau. Te Tamnei are e bue inanou e tuangai bwa e materaoi te tataninga. I rangi ni kukurei ni karekean ana bwai n titutaraoi te Tamnei ae Raoiroi ao kakabwaia tabeua n riki bwa kaain te Ekaretia.

I rangi ni karabwarabwa ngkai I a kakabwaiaki ma te atatai n ana euangkerio ae manga kaokaki. I ataia ae ti kona n tokanikai n taian kangaanga nako inanon maiura rinanon te onimaki ao te taotaonannano. Akea riki te tibwanga ae korakora ao ni kakukurei mwiina nakon ae te riki bwa kaain ae bon tii te kabanea ni koaua n Ekaretia iaon te aba. Akea riki ae uota te kakukurei ae korakora nakon te atatai are ti karekea ngkai ngaira kaain te Ekaretia aika kororaoi, ae ti kona ni manga maeka riki ma te Atua.