Tibwauan te Tai
E Na Korakorara Kimwareireim
“Kam na kaoti ami ota i mataia aomata, bwa a na noori am mwakuri aika raraoi, ao a na neboa Tamami are i Karawa iai” (Mataio 5:16).
Ko a tia n nooria bwa Ngkana ko tibwaua te bwai teuana n aron ae ko anga te bwai teuana ni kakukureia temanna ke tao te bwai n takakaro, ko namakina te kukurei? E koaua ko a tia. Ko kona n tibwauai bwaai riki tabeua irarikin aikai, n aron te atatai. Tibwauan te atatai e kona ni karekea te kimwareirei—ti aki ti nakon temanna are e karekei ma bon nakon naba temanna are e anga. Te kabanea n tamaroa n atatai ae na tibwauaki bon ana euangkerio Iesu Kristo.
Ashley ae ruaiua-ana-ririki e namakina te kimwareirei ibukin tibwauan te euangkerio. Imwin kakaewenakoan Ashley bwa e na tibwaua katotoon Ana Boki Moomon, taman Ashley e kabutia n te kaa nakon ana auti ana mataniwi n te reirei, ao Ashley e angan neiei Ana Boki Moomon. E anga naba Ashley aran ana mataniwi aei nakoia mitinare ake a bwanin-aia tai. Aekakira te kimwareirei are e namakinna Ashley! (Tara “Nine-Year-Old Member Missionary,” Friend, Turai 1997, 42–43.)
Te bwai ae moan te kakawaki ae ko kona n tibwauaia bon ana euangkerio Iesu Kristo. Te Uea e a tia ni wetea Oliver Cowdery ao David Whitmer bwa a na tataekina te euangkerio. E kamataata aron te kakukureia are a na karekea:
Ao ngkana ko na mwakuri ni kabanea am bong n takaruaea te rairannano nakoia aomata aikai, ao ni uotia, ni kamaiua temanna te aomata nakoiu, e na korakorara am kimwareirei ma ngaia inanon abanuean tamau!
E taku te Tia Kamaiu bwa ngkana e na korakora kimwareireira ma temanna te aomata are ti uotia nakon abanuean te Tama, e na korakorara kimwareireira ngkana ko a uotiia aomata aika mwaiti Nakoina! (D&C 18:15–16).
Ti kaota ara onimaki iroun Iesu Kristo ngkana ti tibwaua te euangkerio ma tabeman. Ao e na korakorara kimwareireira ae na reke iroura ngkana ti buokia tabeman bwa a na ata Iesu Kristo ao ana babaire Tamara are i Karawa.
Waaki ni Kakukurei
Korea aram iaan bannan temanna te mitinare. Koreia ni koutia, ao kanimmwa iaon te beebwa ae matoatoa. N tain te bootaki n utu n te tairiki, katuka bannam ni mitinare irarikin tamnei ni kauoua, ao kamataata nakoia am utu bwa ana kanga aomata n tatabemania nako n riki bwa mitinare. Tuangia kaain am utu bwa a na katea kain te bwai are e riki inanon taian tamnei ke aekaki ni waaki aika kakaokoro n aron aia iango ao ni kataneiai aron tibwauan te euangkerio.
Iango n Tibwauan te Tai
-
1. Katauraoi tabeua mwakoron beebwa ake ko a tia ni koroi mwakuri iaona are e na katea te banna ni katotoo, raoiroi ao buakaka. Tuangia tabeman ataei bwa a na buuta teuana mwakoron te beebwa man te bwaoki. Ikaruoruo ni wareki. Tuangia ataei bwa a na iangoia bwa te waaki anne e katea te banna ae raoiroi ke ae buakaka. Kanimwi taian beebwa nakon te burakibooti iaan te atuu ae “Katotoo ae Raoiroi” ke ae “Katotoo ae Buakaka”. N aron te katotoo, “I kabonganai kunnikai aika tara raoi” e na mena iaan “Katotoo ae Raoiroi,” ao “I tatabora n tabetai” e na mena iaan “Katotoo ae Buakaka.” Buokiia ataei ni kakaea, ao ni wareka, ao ni kamatenanoa Mataio 5:16. Kaota am koaua bwa Iesu Kristo e katea te banna ni katotoo ibukira ni kabane.
-
2. Tuangia ataei bwa a na iangoa te tai ngke a ongo aia koaua tabeman ake a kaoti. Kamataata bwa e ngae ngke te bootaki ni kaoti koaua bon te tai n tibwauai koaua, ti kona ni kaoti ara koaua n taai naba ake tabeua. Tara 2 Timoteo 1:7–8. E a tia n taekinna Beretitenti Gordon B. Hinckley, “Ai tera ngke a bane kaain te Ekaretia aio ni katekei taian taeka aikai n te tabo are a na kona n nooria ni katoa ingabong imwaain aia mwakuri” (“Tai Maaku,” Riaona, Beberuare 2005, R2). E taku bwa taeka aikai a na anganira te ninikoria, te onimaki, ao te korakora. Tuangia ataei bwa a na korea taekan kiibu 7 ao moan mwakoron kiibu 8 man uotia nakon mweengaia ao ni katekea n te tabo are a na nooria ni katoa ingabong. Buokia ataei bwa a na namakina korakoran aia koaua taian burabeti ao abotoro. Ngkana e kona n reke, katanga te bwana ibukin te koaua man te maungatabu ni kabuta ke man te witeo ae Special Witnesses of Christ. Ke wareware man te boki ae te Riaona.
Taraia: Ngkana ko aki tangiria ni kan raeuai baan am maekatiin, e kona ni kaeweaki te waaki n reirei aei ke ni boretiaki man te Intanete n te: www.lds.org. Ibukin te Ingiriti, kiriki iaon “Gospel Library.” Ibukin taetae ake tabeua, kiriki iaon “Languages.”