Te Boki ae Rangi n Onoti, te Kaeka ae Rangi n Onoti

Iroun Grigor A. Tadevosyan

Ngke N nang bwabetitoaki ao ni kamatoaki bwa kaain te Ekaretia, I namakina te aki rau bwa I bon rinea te kawai ae eti ke I aki. Ara mitinare n ara mwaanga i Gyumri, Armenia, a ataia ae iai au nanokokoraki iaon Ana Boki Momon ao kaainakin te Ekaretia, ai ngaia are a kaoai bwa N na iriia inanon aia tai n angareirei tabeua aia reirei mitinare.

Ngke ti a roko n te moan mweenga, e titiraki Unimwaane Perrin nakon Anichka ngkana arona bwa e a tia ni wareki mwakoro ake a katauaki. “I tuai,” e taku, “I mwaninga.” Ai ngaia are ti a uaia ni wareka 2 Nibwaai 29–33. Ngke ti a wareka mwakoro 29, ti kamatebwai taian taetae ni burabeti iaon Ana Boki Momon ao Tientaire ake a totokoia ni boong aikai man taekinan, “Te Baibara! Te Baibara! Iai ara Baibara, ao e na bon akea riki te Baibara” (v. 3). Te mwakoro anne e riinga nanou n ae korakora rinanon te reirei anne.

Imwiina ti a nako n te mweenga teuana. Ngke ti wareware man ana Boki Momon ikekei, taman te aine are ti reireinna e titiraki, “Tera te boki anne?”

I kabwarabwara bwa bon Ana Boki Momon: Kakoauan Taekan Iesu Kriso. E moanna ni un ao e taku, “Ai kaman iai ara Baibara, ao bon akea riki te Baibara teuana.”

I uringa te mwakoro are ti a tibwa tia ni warekia tibwa 10 te miniti mai imwaaina ma Anichka.

E taetae Unimwaane Perrin: “Iai am Baibara, ao e roko mai roun ana aomata ni berita te Atua ngkoa.” E reitianako, “E karikia aomata ni kabane te Atua, ao E kaoti Ana taeka nakoia Natina, are nanona aomata ni kabane iaon te aonaaba. E ngae ngke iai am Baibara, ko aki kakoaua ae te Atua e kona n anga Ana taeka nakoia tabemwaang?” E reitianako n te kawai aei, ni kabwarabwara moan reken Ana Boki Momon.

I rangi ni mimi n te bwai ae e a tibwa tia n riki. E tara n ae e na akea riki te koaua ae korakora ibukin karaoan nanon au tabeaianga iaon Ana Boki Momon nakon nooran te taetae ni burabeti ibukina bwa a kakoroaki bukiia.

Ngkai ma te nano ni koaua I a kona n taekinna bwa Ana Boki Momon bon te boki ae te kabanea ni koaua. I ataia bwa e tangirira ni kabane te Atua ao E aki kona ni mwaninga taekara. N tainako ao n tainako I a tia n ata aron onotin bwaibwain Ana Boki Momon.