Te Kona ni Wareware ao ni Koroboki e Katamaroa te Maiu

Shirley Florence Sainz, ae bungiaki i Mexico, e karakina aron ana kekeiaki tinana ni karekea te rabakau ni wareware are reke bwa te kakabwaia nakoia tabeman:

“Ngke uoua ana ririki tinau ae, Anita Valenzuela Mendoza, ao e mate tibu te mwaane n te kabuanibwai n te tabo ni keniken are e mwakuri iai, e kitana tibu te aine ma natiia waniman ao ti teutana te mwane are a na kamaiuaki iai. Tibu te aine e aki kona ni wareware, ni koroboki, ao e aki atai taian ware.

“Ngke onoua ana ririki tinau, e karineaki ni kona n reirei e ngae ngke akea ana bentira, beebwa, ke booki. E ngae n anne, ma e bon tangira te reirei, ngaia are e katamaroai ni waei kawere, e kaitiaka te umwanreirei, ao e uoti aia aika kaai bwa ana anga ni kabooi beebwa. N te mweenga, tibu te aine e itui beebwa ibukin te nutibeeba ni boboti bwa te booki ae uarereke ibukin tinau.

“Te tia reirei e bon kukurei ni ingaingan nanon tinau. A aki tabeakina mangaingain ana kunnikai ao mangaongaon irana, ma a katoka bakina ibukin te rabakau. Ni banen ana reirei n te moanrinan n te kauarinan, ana utu temanna ana tiareirei a angan tinau te tai ibukin karekean riki te reirei. E ngae n anne, ma e aki kona n nako ao e a toki ikai ana reirei.

“Tabeua ririki imwiina, ngke 27 ana ririki tinau, e a manga rikirake ana reirei ngke e kaitibo ma tamau ao e kabwarabwara te euangkerio nakoina. E tangiria ni wareware ni booki aika tabu. Te Bootaki n Aine naba e karekea ana tai aika mwaiti ni karikirakea rabakauna.

“Tinau e karina tangiran te reirei inanou, ao e a tia ni bane au reirei ae rietata ao ngkai I a tiareirei n te moanrinan n te kauarinan. Ai uoua ngkai te roro, n ara utu ae a tia n rangi ni kakabwaiaki ibukina bwa, ngke te ataeinaine, tinau e reirei ni wareware ao ni koroboki. Rabakauna ni wareware ao ni koroboki e a tia ni kauki mataroa ibukina bwa e na oota ao ni butimwaea ana euangkerio Iesu Kristo. N tokina, ao ana kariki tinau ni kabane a bon kakabwaiaki.”

Ana karaki Titita Sainz e aki okoro n ti ngaia. Ngkana a reirei ni wareware ao ni koroboki aomata, a kona n rikirake aia atatai ibukin te euangkerio ao ni kakabwaia maiuia tabeman. Reiakinan te moan waaki ibukin te rabakau ni wareware ao ni koroboki e buoka Paul Imietehe kaain Nigeria, ae rairaki nakon te Ekaretia, n oota raoi riki ao n tibwaua te euangkerio. E uringnga:

“I kaaina Ana Ekaretia Iesu Kristo Ibukia Aomata Aika Itiaki ni Boong Aika Kaitira i Warri, Nigeria. Kinaku bwa kaain te Ekaretia e anganai te atatai bwa I riai n reirei ni wareware ao ni koroboki. Ngke a anganai taan kairiiri n te nakoanibonga tabeu bwa N na anga au marooro ao n tataro, I bon aki ira te bootaki n taromauri. Bon te bwai ae karika te mamaa irou.

“Ngke I mwaing nako Abuja, I noori bokin ao ana maekatiin te Ekaretia, ao I namakina kainnanoana ae korakora bwa I riai n rabakau ni wareware ao ni koroboki. I tangiria ni kan wareki booki aika boretiaki aikai are a wareki kaain te Ekaretia ake tabeman ao a kukurei iai. Angiia kaain te Ekaretia a kukurei ni kaota nanoia, a tibwaua aia koaua ibukin te euangkerio, ao I tangiria ni kona ni kaota au namakin ae korakora ibukin koauan te euangkerio. I ataia n te tai arei bwa I riai n reirei ni wareware ao ni koroboki.

“N te Taabati teuana ao I baireia bwa N na ira te reirei n te euangkerio ibukin te wareware ao te koroboki n te Reirei n Taabati. N au moan bong n reirei, I nooria bwa angiia kaain te reirei aine ao ataeinimwaane. Bon ti ngai te mwaane ae ikawai n te reirei. I kaririaki bwa N na otinako, ma nanou ae korakora n tangira te rabakau e tautauai. Ara tia reirei e kaungaira n tatabemanira nako bwa ti na ira te wareware man boki n reirei ibukin te wareware ao te koroboki n te euangkerio ao man booki aika tabu.

“E korakora au kekeiaki ibukin te reirei ni wareware. I wareki booki aika tabu ao ana maekatiin te Ekaretia. E rikirake ootau ngke I a weteaki bwa te kauoman ni kauntira n te beretitentii n te Reirei n Taabati n te Mwaanga i Idu. N te moan tai, I bon nanououa n au konabwai. Ma ngke I anganaki nakoau, te beretitenti n te mwaanga e taekina te kakabwaia bwa N na kona ni karaababa te nakoa. N te tai are I anganaki iai nakoau, I a namakinna bwa I a kona ni karaoia.

“Uoua te wiiki imwiina, I anganaki tabeu bwa N na reireinia ikawai n te Reirei n Taabati. E ngae ngke I tabeaianga ibukin au konabwai, I katauraoi inanon te wiiki arei ngkana I okira mweengau man au mwakuri ao n au tai naba ni motirawa n tain te mwakuri. Ngke e a roko te Taabati ao e a boo au tai n anga reirei, I karaoa au tataro ae uarereke inanou ni butia Tamara are i Karawa bwa e na kairai. Ngke I kaurea wiiu n taetae, I bon mimi bwa a raanga nako taeka. I taku bwa e na baebae wiiu ma e bon aki.

“Angiia kaain te reirei a bubura riki aia reirei nakoiu, ma aia kaeka ao aia namakin are oti ni moamoaia e bon kaungaai. I namakina te rau n au tai n reirei.

“Te wareware ao te koroboki n te Euangkerio e a tia ni karikirakea i nanou tangiran ao katamaroan au reirei ae korakora. E a tia naba ni buokai ni kaotaai n te euangkerio ao ni kona ni buokia tabeman.

“Au mwakuri bon te tia karaoi banna boua aika kaaraki ao I mwakuri n te kambwana ni kateitei teuana, ike I a kamanena rabakau ni mwakuri ma te kai. I Nigeria, iai te taeka n rabakau ae kangai, ‘Te angara are ti kabongana n tata te kai e rangi ni kakaawaki ngaia are ti uotia ni baira aika uaai ao ni katoka iaon angara.’ Te angara e rangi ni kakaawaki ao ti naki katikua. Anne bon au namakin ibukin te Ekaretia ao te wareware ao te koroboki n te euangkerio. I uouoti ni baiu aika uaai ao iaon angau ao I aki kona ni katikua.

“I karabwarabwa ibukia taan kairiiri n au mwaanga ake a kaungaai bwa N na reirei, moara riki te Tari Lawrence Monyei, au tia reirei n te euangkerio ibukin te wareware ao te koroboki.”

Te Tari Imietehe e reirei ni wareware ao ni koroboki n ana reirei te euangkerio ibukin te wareware ao te koroboki, ao imwiina e a rikirake onimakinana ibon irouna ao ana koaua n te euangkerio e rikirake ni korakora. E a tia ni kakabwaia maiuia kaain ana mwaanga aika mwaiti.

Ana bokinreirei te euangkerio ibukin te wareware ao te koroboki, Ye Shall Have My Words (nambwa te aitam 34476), e tauraoi n taetae aika te English, French, Portuguese, ao Spanish. Naake a na korakora buokaia mai iai a aki kona ni wareki taeka aikai. Ko kona ni buokiia?

“I a tia ni karaoa au kakae ae uarereke iaon te konabwai ni wareware ao ni koroboki n te aonaaba. Teuana te birion mai buakoia [onoua] te birion mwaitia aomata n te aonaaba ae a aki kona ni wareware ke ni koroboki… . Ai kananokawakira—bon te kangaanga, ai kananoangara, ao te kananokaawaki ae korakora. Te bangabwai ni wareware, n ata nanona, ni koroboki—ai kananokawakira. Ti kona ni ibuobuoki ni kanakoa te maraia aio. A kona ni koro bukiia ni bitakin te aroaro ae karawawata aio.”

Beretitenti Gordon B. Hinckley, Teachings of Gordon B. Hinckley (1997), 314.