Te Kaa ae Akea Kanoana

Tabeua ririki n nako a iangoia kaain te kooram ni ibonga bwa a na rikoi amwarake ibukiia naake a kainnanoa buokaia bwa kanga aia waaki n anganano ao n ibuobuoki. Jim, temanna mai buakoia ibonga, e a bon ingainga nanona ni karaoan aei ao e baireia bwa e na rikoi amwarake aika mwaiti nakoia raona nako. E a roko te tai are a ikotaki iai taian ibonga n te umwantabu. A bon bane n nako n te tai ae ti teuana ao a na manga oki n te tai are e a tia ni baireaki rimwi riki n te tairiki. A rang ni miimi ni kabane, bwa ana kaa Jim bon akea kanoana. E tara ni kainabwaabu, ao tabeman ataeinimwaane a waaningareia. N nooran aei ao n ataakin ae Jim e mamate nanona n taian kaa, e taku te tia ibuobuoki, “Nakomai nako tinaniku, Jim. I tangiriko bwa ko na noora au kaa. E aki toki ni iai ana kangaanga.”

Ngke a roko itinaniku, e a titiraki te tia ibuobuoki nakon Jim ngkana tao iai unna. E taku Jim, “I aki, kanga tiaki anne. Ma ngke I nako n rikoa te amwarake, I bon rikoa ae rawata. E onrake au kaa. Ngke I a oki nakon te umwantabu, I a tei ni mweengan te aine ae tiaki kaain te ekaretia ae e a tia ni buuraure ao e maeka inanon mwaaken ara uoote. I karebwerebwe iaon te mataroa ao ni kabwarabwara te bwai ae ti karaoia, ao e bon karinai. Neiei e moanna ni kakaea te bwai ae na anganai. E kauka ana aitibwaoki, ao I kona n nooria ae akea kanoana. Taian kabwate bon akea naba kanoai. N tokina, e a kunea te tiin ni uaanikai ae uarereke.

“I aki kona ni kakoaua bwa e na riki aei. Iai taian ataei aika biriaitua ake a na riai ni kamwarakeaki, ao neiei e a anganai te tiin ni uaanikai aei. I anaia ao ni katikua inanon au kaa ao I nakonako ni waerake n te kawai. Ngke I roko tao i nuukan abwakin teuana te kateitei ngke I a namakina te rau inanou ao I ataia ae I riai n oki nakon te auti arei. I angan neiei amwarake ni kabane.”

E taku te tia ibuobuoki, “Jim, bon tai manga mwaninga aron am namakin n te tairiki aei, ibukina bwa bon ngaia raoi anne bukin ae ti karaoia.” E a tibwa kakoaua Jim korakoran mwaakan te anganano ni ibuobuoki ae akea tiana.

Man te taetae n te maungatabu ni kabuta n Okitobwa 2006.