Buan Michael

Arei te taua!” e takarua Natalie. Neiei e tatangira te nako n taromauri. E rangi n tatangira te Taabati mai buakon bongin te wiiki, ma ti teuana te bwai—e nanokawaki neiei bwa mwaanena, Michael, e rineia bwa e na aki nako n taromauri n iriia kaain te utu.

Inanon ana tai Natalie n tekateka n aki karongoa n tain te bootaki n toa, e a iangoa Michael. Ngke e bon roroko ngkoa nakon te taromauri, Natalie e tatangiria ni kan tekateka irarikin teuaei man mamataku n ana boki n tamnei iaon rongorongon Iesu. Imwin te bootaki n toa, Michael e na taua baina ao n nikira neiei n te Moanrinan. “Ti a manga bo imwina, Mwaaneu,” e aki toki n taekina aei. Ma Michael e a tia n aki roko n te taromauri inanon te tai ae maan.

Ai tera ngke e kona Natalie ni kabaea ma ana roobu ni kibakiba inanon ana kaa are e uarereke ma n uraura ao ni uotia nakon te taromauri, e ataia neiei ae na bon aki tangira karaoan anne teuaei. Tera riki ae na kona ni karaoia?

Inanon te Moanrinan, Titita Chang e kamauria kaain ana kiraati ma te kukurei. “I bon rangi ni kukurei ngkai kam bane n roko ikai n te bong aei,” e taku neiei. “I a bon rangi ni kukurei ngkai I a noori moamoami aika wingare. Maantai ae aki roko?”

E a taratara nako Natalie ni kabuta te ru. E katea baina neiei. “Jed,” man takaruaea. “E aki mena ikai Jed n te bong aei.”

“Ko bon eti,” e taku Titita Chang. “E aki roko naba Jed n te wiiki ae nako.”

“Tao e aoraki,” e katautaua Lisa.

“Tao iai mwanangana,” e taku Boyd.

“Ke tao e a bon aki kan roko,” e taku Natalie ni karaurau.

“Ti riai ni kaotia nakoina bwa ti tangiria ao ti ururingnga ngkana e nako,” e taku Titita Chang.

“Ti na kanga ni karaoa anne?” e titiraki Natalie.

“Ti na tuangnga,” e taku Titita Chang. “Bwaai aika uarereke n taai nako a kona ni karaoa te kaokoro ae bubura. N na karaoa te kaati ibukim ao kona tiaina, ao kam kona ni bane ni korea te tamnei ae onoti ibukin Jed.”

E iangoia Natalie bwa e na korea tamnein te maunga ao taian aroka bwa e ataia ae Jed e tatangira aoataata. Ao imwina Natalie e bubutia ana tia reirei ngkana e kona ni korea teuana riki te tamnei ae na uotia nakon mweengana.

Ngke e a oki man te taromauri Natalie man roko ni mweengana, e kunea bwa Michael e bon mena inanon ana ruu n ongora te katangitang. “Mauri, Mwaaneu,” teuaei e kamaura neiei. “Tera te bwai ae riki?”

E anganna Natalie te mwakoro ni beebwa ae rukumaki. “I karaoa am kaati.”

“Ibukiu?” e wingare Michael. “Ibukin tera? Bon ti aki au bonginibung ke tera.”

“E buokai Titita Chang ni korobokia nanona. E kangai, ‘I bon ururingko ngke ko aki iriira nakon te taromauri. I tangiriko.’ Ao I korea arau.”

“Ko rabwa,” e taku Michael ni karaurau. “Bon te kaati ae tikiraoi. Ko a tia ni karaoa te mwakuri ae tamaroa.”

“Teraoi.” E inga Natalie nakon mwaanena ao ni waekoa n nako ni buoka Tinana ni karaoa te katairiki. E namakina kukurein nanona neiei. E rangi n tatangira mwaanena neiei, ao ngkai e a bon ataia naba teuaei.

Te Taabati are imwina, e a rangi ni kukurei Natalie ngke e a baireia Michael bwa e na nako n taromauri. E taua bain mwaanena ngke a rinnako n te umwantabu. E karaurau n tekateka neiei irarikin teuaei n tain te taromauri. E noora Jed Natalie bwa e tekateka imoaia n te kauoua ni kaintekateka ao e katea baina nakoina.

E tatangira te nako n taromauri Natalie, ai moarariki ngkana a bane n roko raoraona ao ana utu ikekei. E baireia neiei bwa ni moanna ma ngkai, ngkana e aki roko temanna, e na ti kangai, ibukina bwa n tabetai bwaai aika uarereke a kona ni karaoa te kaokoro ae bubura.

“Bon katabeara … n taraia bwa ni kabane ake a tia ni bwabetitoaki a na kaungaaki bwa a na namakina kamimin te kakukurei ibukin ana euangkerio ara Uea.”

Beretitenti Gordon B. Hinckley, “Kakaeia Tiibu aika Ataei, Kamwarakeia Tiibu,” Riaona, Turai 1999, 124.