Titiraki & Kaekaia

Te onimaki bon onimakinan ao kakoauaan te Uea. Am onimaki Irouna bon te mwaaka are e na kairiko n ongeaba nakon Ana euangkerio, ao am ongeaba e na buokiko ni karikirakea am onimaki, are bon te bwaintangira mai iroun te Atua.

N aron are taekinaki ni booki aika tabu, ngkana iai am onimaki iroun te Uea, E na karaoi bwaai ni kabane ibukim, n aron te katoki aoraki, kabwaraan am bure, karauan nanom, ao n rairiko. Ma te onimaki tiaki nanona bwa ko na tuanga te Atua te bwai are e na karaoia. Nanona bon onimakinana ao ataakina bwa kakabwaia ni kabane a roko “ni kaineti ma ana kaantaninga” (1 Nibwaai 7:12) ao n oin ana tai, ao n oin ana kawai (tara D&C 88:68). N aron te katooto, ko kona n aki karekea kaekaan am tataro n te tai naba arei. Ma am onimaki e kakoaua nakoim bwa Tamara are i Karawa e ongo am tataro ao e na kaeka n te tai ae riai.

Ibukin karikirakean ao kamwakuran am onimaki, (1) reiakina ana taeka te Atua, ni warekan booki aika tabu ke te kakauongo nakoia naake iai irouia te kariaia n anga reirei iai (tara I-Rom 10:17). Ataakin te taeka e na buokiko n nooria bwa te Atua e kakoroa nanon ana berita n taai nako.

(2) Mwakuria te bwai are ko reiakinna, ke n aron are taekinna Aramwa, kakamwakura te taeka. Te taeka aiaron te koraa. Ngkana e raoiroi, e na kabubura tamneim, ni kaota riki ootau, ao e moanna ni kangkang irou (tara Aramwa 32:28). Anne bon kamatoan te taeka bwa e koaua, are e na karikirakea am onimaki.

(3) Kawakin tuua. Raoiroim e na kariaia rikiraken te bwaintangira are te onimaki inanon maium. Kaota am kakoaua iroun Iesu Kristo man irirakin Ana katooto ao Ana reirei. Karaoa are e tuangko rinanon booki aika tabu, aia reirei burabeti aika maiu, ao ana kairiiri te Tamnei ae Raoiroi. Te katooto, ko butimwaea ana kakao Beretitenti Gordon B. Hinckley ni wareke Ana Boki Mooman imwaain banen 2005? Naake a karaoia ma te onimaki ao a karekei kakabwaia are e a tia ni berita ibukina. (E koaua, ngkana e aki bane warekan Ana Boki Moomon iroum ngkekei, ko kona ni manga karaoia!)

E ngae ngke a mwaiti aomata aika rinanon te maiu n akea onimakinan te Uea, aki kona ni karekea te maiu are akea tokina n akea te onimaki Irouna. Ti rinanon ana euangkerio Iesu Kristo—ma te onimaki irouna bwa te moan tua—ti kona ni kimwareirei n te maiu are akea tokina, are bon te bwaintangira ae te kabanea ni kakannato mai buakon ana bwaintangira ni kabane te Atua (tara D&C 14:7).

I kakoaua bwa ara nebonebo nakon Kristo ao Ana euangkerio bon ngaia te kawai ae te kabanea n tamaroa ibukin kaotan ara tangira ao ara onimaki Irouna. Ngkana ti maiuakin ana tua ao anua aika tamaroa ao n teimatoa n nakonako n te kawai are e tia ni kaotia nakoira, ti aki ti kaota ara kakoaua Nakoina ma nakoia naba aomata nako inanon maiura. Ti kaota ara kakoaua ibukin ara kakaitau ibukin Ana karea ibukira ao ibukin naba Manga Kaokan te euangkerio.

Jan V., 17, Moravia, Czech Republic

Ngkana ko onimakina Iesu Kristo nanona bwa ko onimakinna ma nanom ni kabane ao ko kakoaua raoi n am iango ao i nanom bwa E maiu ao bon Ngaia ara Tia Kamaiu. Ti riai ni katuka ara onimaki iroun Kristo ibukin bwa E rabakau ni buokira ni tokanikai iaon kanganga inanon maiura. Akean ara onimaki Irouna e karekea te tabeaianga iroura ibukin aron tamneira ao n nanououa n ana berita te Atua. Katuan ara taratara iroun te Tia Kamaiu e a tia ni buokai ni kateimatoai n te euangkerio, n taotaona maaku, ao n tokanikai iaon kangaanga.

Natalia N., 19, Chimborazo, Ecuador

Kamwakura te onimaki iroun Kristo man te ongeaba. Te onimaki ae aki raonaki n te mwakuri bon te onimaki ae mate. Man te ongeaba ngkana ko aki ata bukin te tua, ti kaota onimakinana ao ara onimaki Irouna. Kawakinan tuua bon kaotan ae ti onimakinna ao iai ara onimaki n te bwai are E tuangira bwa ti na karaoia. Te tataro ao warekan booki aika tabu ni katoa bong e kakorakora au itoman ma Tamara are i Karawa, e anganai riki te onimaki Irouna. Ko riai ni butimwaai kaekaan am tataro naba. Tataro ibukin buokam bwa ko na karekea te onimaki.

Meghan S., 18, Missouri, USA

Ti kona ni kamwakura ara onimaki ni kariaia te Uea bwa e na kaira maiura. Ngkana ti onimakina te Atua, ti iriiria, ao ni mwakuri korakora ni kawakin tuua, ti kona ni kamwakura ara onimaki irouna. Ngkana ti a tia n anganna nanora, ti na kona n noori kakai inanon maiura ao ni maiuia kaain rarikira.

Dmitriy Z., 21, Donetsk, Ukraine

A mwaiti ara kawai ni kamwakura ara onimaki iroun te Atua n aron warekan booki aika tabu ao te tataro ni katoa bong, katabuan te bong ae te Taabati, kabwakaan ara kabwianibwai ao karea n aki mamatam, beku ibukia aomata, ao te nano ni kan kawakin tuua nako.

Seng S., 18, Battambang, Cambodia

Ngkana ti kakoaua ana ibuobuoki ao mwaakan te Uea, ngkanne ti a kona ni waaki nako n onimakinna. Ara ongeaba nakon tuua e kaotia bwa iai ara onimaki Irouna. I ataia ma nanou ni kabane bwa E tangiria n anganira kakabwaia aika korakora ao bwa te onimaki ao te ongeaba a kainnanoaki ibukin karekeaia.

Marco C., 18, Liguria, Italy

Ngkana iai ara atatai n te euangkerio ao iai ara onimaki ni koauana, ti riai ni kakamwakuria ni maiuakinna ibukin karekean kakabwaia. Te onimaki ae aki raonaki ma te mwakuri bon te onimaki ae mate. Ngkana iai te onimaki ma te mwakuri, te onimaki ngkanne e a rikirake ni matoatoa. N te 1 Nibwaai 7:12, ti kauringaki bwa ti riai ni kakaonimaki nakon te Atua. Te kakaonimaki bon te moan mwakoro ibukin karikirakean te onimaki.

Otgonchimeg B.,15, Töv, Mongolia

Ti kona ni kamwakura te onimaki iroun Iesu Kristo n te mwioko ao onimakinan raoi Ana atatai ae akea tiana ao mwakana ae akea tiana. Teuana te kawai ae tamaroa ibukin karaoan aei bon man kabwakaan te kabwianibwai, bwa rinanona ti kona ni kaotia bwa ti kukurei ni kakeai bwain te aonaaba ibukin ana berita ibukin kakabwaia aika korakora.

Samantha L., 15, Zamboanga del Sur, Philippines

Ti kamwakura ara onimaki iroun Kristo man irakin te taromauri, karaoan ara tataro, warekan booki aika tabu, butimwaean taian nakoa, te rairannnano man ara bure, tauakin te toa, ao karababaan nakoara.

Adam N., 18, Georgia, USA

Taian kaeka a bon kabonganaki bwa bwaai ni ibuobuoki ao kaetan ara taratara, ao tiaki taeka ibukin ana reirei te Ekaretia.

“Ni katoa te tai are ko kataa am onimaki, nanona bwa, ko wakina am iango ni karaoan ae tau, ko na karekea kakoauaan te Tamnei ae matoatoa. Namakin aikai a na otangaa am onimaki. Ngkana ko kaokioka karaoan te banna aei, e na rikirake korakoran am onimaki… . Karaoana ma te aki bibitaki, e na maiureirei iai am onimaki, e na korakora, e na tabekiko rake, te korakora ae na kaiririko inanon maium.”

Unimwaane Richard G. Scott man Aia Koorum Abotoro ake Tengaum ma Uoman, “The Sustaining Power of Faith in Times of Uncertainty and Testing,” Riaona, Meei 2003, 76.