Aia Koaua Burabeti
Ngke 12 au ririki, I kairia mitinare nakon au utu. I kaitibo ma ngaia n te kawai, ao a rangi ni iraorao nakoiu. A buoka te Ekaretia ni katea te umwantabu n au kaawa i Brazil, ao a kaoai bwa N na buokia, are i moana karaoana ni mwawan au tai. I tuai man ongongo taekaia ataeinimwaane aika a rineia bwa a na kabanea aia tai ni katea te umwantabu.
E bwaka nanou irouia ao I a baireia bwa N na kairiia nakoia au karo, ao ti kaoia nakon mweengara. Mitinare anganiia kaain ara utu te moan marooro. Ti aki momoko, ngaia are ara utu a tia ni kawakina iteran Tuan te Mauri anne, ao ti karaoa ara bootaki n utu ni katoa tairiki ni mweengara. Ti aki aranna bwa te bootaki n utu n te tairiki, ma bon anne te bwai ae ti kakaraoia. Bon Katorika ngaira, ti kaea ara taromauri n taai nako, ngaia are e tuangia tamau bwa ti mweengaraoi n ara aro.
A kitana ikekei mitinare, ma a korea rongorongon ara utu n aia boki mitinare are a korea iai rongorongoia aomata n te aono are e tiitiku n aia auti mitinare, ni ikotaki ma aia namakin bwa ti na kaaina te Ekaretia.
Reiakinan taekan Utu Are Akea Tokina
Tebwina te ririki i mwiina I maeka n te kaawa teuana ngke a roko mitinare n te aono are a maeka iai au utu. Bon akea temanna te aomata ae a na anga reirei nakoina ao a baireia bwa a na tara te boki ibukin te aono. A kunea araia au karo ao a baireia bwa a na kawaria. A tataro mitinare imwain mwanangaia, ao a kairaki iroun te Uea. E ngae ngke e rangi ni kakaonimaki tamau n ana aro, ma iai ana titiraki. E aki kona ni kakoaua bwa imwiin matena ao buuna e na aki riki bwa buuna. E namakinna bwa te itoman n te utu e riai n reitinako imwiin te mate. E a tia n titirakinia minita man aro aika kakaokoro ibukin aei, ao a bane ni kabwarabwara nakoina, “Tiaki, imwiin te mate ao buum e na riki bwa aiaron mwaanem, ao natim te mwaane e na riki bwa aiaron tarim.”
Ngke a karebwerebwe mitinare aikai n aia mataroa au karo, e kaukia tamau ao e tuangia bwa e a tia n ongo aia rongorongo mai mwaaina ao e aki nano iai. Ma a taku mitinare, “Iai riki ara rongorongo ibukim. Ko ataia ae a kona am utu ni ikotaki n akea tokina?” E anaaki nanona n taeka aikai. E kaoia tamau bwa a na roko n reireinna. Man kaairakia iroun te Tamnei, a taetae mitinare iaon te mare are akea tokina ao te utu ae akea tokina. Man kaotakin te euangkerio aio nakoia, au utu a reitinako ni kaitibo ma mitinare ni karokoa e reke aia koaua ao a baireia bwa a na bwabetitoaki ao ni kamatoaki.
Karekean Au Koaua
Nimaua te ririki imwiina—ngke ai 27 au ririki—I oki nakon mweengan tamau n te tai ae aki maan. Tamau ai bon te tia kairiri n te uoote ibukia mitinare, ao mitinare aine a tabe n reireina temanna ni mweengau. I kakauongo ngke a taekina Ana Boki Moomon ao Iotebwa Timiti, ao I baireia bwa N na tataro ibukina. E bon eti n au iango bwa ngkana te burabeti Iotebwa Timiti, ngkanne Ana Boki Moomon e bon koaua ao te Ekaretia e bon koaua.
N te tairiki arei I moanna ni wareka rongorongon Iotebwa Timiti ao te bwai are e nooria n te Buakonikai ae Tabu. I toki ngkanne, ao I tataro nakon te Uea. I kabanea teuana te tairiki n arou arei, te wareware ao te tataro ni katoa barakarabe. Bon 14 te aoa maanna. Iai te bwai ae riki nakoiu ngke I moanna ni iangoia. Ti tebo ma ae I mena n te buakonikai ma Iotebwa. Bon te bwai ae oota raoi ao I bon rinanona raoi. E tara n ae I kona n noora te bwai are riki. Ngke e a toki au tataro n te ingabong are imwiina, I ataia bwa Iotebwa Timiti bon te burabeti.
I nako ni kakaeia mitinare n te tai naba arei. N te bwakantaai, ngke a oki ni katawanou mitinare aine, I tekateka i matan aia mataroa n tataningaia. I butia bwa a na anga reirei nakoiu iaon taian marooro. Imwiin reiakinau ni marooro ake itiua inanon te tai ae uarereke, I bwabetitoaki ao I kamatoaki nakon te Ekaretia.
Iriira te Burabeti
E kaania teuana te namwakaina imwiin kaainakin te Ekaretia, ngke I kaitibo ma buu, Magareth, ao ti mareaki teuana te ririki imwiina. Ngke ti kareketangira, I tuangnga bwa ibukina I ataia bwa Iotebwa Timiti bon te burabeti, I tangiria ni katea ara utu iaon ana taeka ao ana reirei te burabeti. Te katooto, Beretitenti Spencer W. Kimball (1895–1985) bon ngaia te burabeti n te tai arei, ao e reireinia kaain te Ekaretia bwa a na aki tarau. Inanon ae kaania 29 te ririki ni mareaki, buu ao ngai ti bon tuai mani kabwaka te mwane teutana bwa te bakao. Ti bon aki.
Man te tai are reke iai au koaua ibukin Iotebwa Timiti, I a tia ni kakauongo nakon aia taeka ni kabane te Moan Beretitentii ao Abotoro ake Tengaun ma Uoman, ao I kamwakuri bwaai are a reireinira. Ibukina bwa I ataia bwa Iotebwa Timiti bon te burabeti, e bon aki kangaanga irou irakia Taari. A kona n tuangai bwa N na karaoa te bwai teuana, ao N na bon karaoia ibukina bwa I ataia bwa ngaiia burabeti, taan mamata, ao taan kaotioti.
Ngkana ko mwakuria karekean am koaua ibukia burabeti, ko na bon kakorakoraaki. Anne bon teuana te kiing nakon te kukurei. Ngkana ko kakauongo iroun te burabeti ao ko karaoa nanon aia reirei, ko na bon kukurei n ongeaaba irouia.