A Ikotaki Rabwata n Tautaeka i Poland Bwa A Na Kamanoa te Utu ni Katoobibia te Aonaaba

E raka iaon 3,300 taan tei man te aonaaba ni kabuta ake a bootaki n Autin te Katei ao Rabakau aika Boou i Warsaw, Poland, man Meei 11 nakon 13, 2007, bwa a na kaea te Kaua ni Ikotaki n Rabwata n Tautaeka n te Aonaaba. Aia kouru bon reiakinan ao katanoataan te boutoka bwa ana utu te aomata ae karikaki nakon te aonaaba e bon kateaki iroun te Tia Karikibwai ao e bon kainnanoaki ibukin te botanaomata ae raoiroi.

Taan tei ake a kaea te ikotaki n rabwata n tautaeka a namakinna bwa utu nako ni kabutaa te aonaaba a mena iaan te ekakinako ao a kakoaua bwa iai kainnanoan barongaan taian tua ibukin te waaki ni boutaka te utu n te aonaaba. A roko taan tei man te tabo aika raroa n aron Chile, New Zealand, Afghanistan, Mexico, ao te aono ni Philippine bwa a na kaatuua te iango iaon waaki aika bati ake a rootaki iai utu ni kabuta te aonaaba.

Ellen Sauerbrey, te kauoman n tia koroboki n te aba n te U.S. ibukin te wareaomata, taan roko ibukin kamanoakiia, ao mwaingingin te botanaomata, e ibuobuoki ni butimwaea te ikotaki n rabwata n tautaeka ao e arana te utu bwa te bootaki ae te kabanea n teimaan ao n teimatoa.

“E riki te utu imwaaia aaba nako, ao a kona ni kuneaki ni katei nako, ao inanon taai aika kakaokoro… . E aki karika te utu te aba; ma, taian utu a karika te aba,” e taku Mrs. Sauerbrey.

Roman Giertych, te minita ibukin reirei ao te kauoman n tia tautaeka i Poland, e butimwaea naba te ikotaki n rabwata n tautaeka ao e taku bwa n akean te utu ao e na bon akea te tautaeka, te aba, ke te maiu.

Atuun ni iango ake a marooroakinaki n tain te maungatabu a bon kaairaki ma taekan kabwakakiia ataei, te mare irouia mwaine, kakerikaakin te botanaomata, bwaai ni kamataku aika bwaitingako, ekaki nakoan taian utu n taian kaongora, ao kabouan te aro n te katei.

N te atuu ni iango ae Hollywood ao te utu, Don Feder, te tarekita ibukin itoman ibukin te Ikotaki ni Utu n te Aonaaba, e taku: “Ni katoa bong, te bootaki ni karikiraki i America ae kabwaka ngaa n rawawata ni mange aika boitin n abara ao inanon mweengara. I taekina ikai Hollywood, are oin ana karaobwai—aika aki raraoi—are bon te wenenibure, te iowawa, waaki ni wenenibure aika buakaka, kakeai ana koaua te botanaomata, kabuakakaan aaro, ao kaitaraan aroaro aika riai ibukin te utu ae reitinako.”

Brad Wilcox, te tia rabakau ae mwaatai iaon te botanaomata, n te University of Virginia, e taetae iaon te uaia ni maeka n taanga n aki mare, ao maiuraoia ataei.

“Rikiraken te uaia ni maeka n taanga n aki mare e tara ni kairiiri … nakon rikiraken te karo ae ti temanna, ao ti ataia bwa te karo ae ti temanna e karekea te kangaanga nakon maiuraoia ataei,” e taku.

N kainan te botaki, e karaoaki te Warsaw Katanoata bwa te tua ibukin boutokaan te utu n te kauabwi ma teuana n tienture: “Te utu ae karikaki, ae ana karikibwai te Atua, bon boton te botanaomata, are e boboto iaon te mare imarenan te mwaane ao te aine inanon maiuia, ike a karikaki iai rabwata aika boou, ao a bungiaki, ao ni kaikawaki rake.”

Te Ikotaki n Rabwata n te Tautaeka ni Utu n te (WCF) bon botakin te aonaaba are e kaainaki irouia botaki aika boutoka te utu, taan rabakau, taan kairiiri, ao aomata aika a nano ni iraorao man aaba ae raka iaon 60 mwaitia ake a ukoukora kaokan te utu nakon arona bwa boton raoi te iunite teuana n te botanaomata.

E katea te WCF Allan Carlson i Rockford, Illinois, n 1997. Tenaan ikotaki n rabwata n tautaeka ake teniua mai mwaaina a karaoaki i Prague, Czech Republic (1997), Geneva, Switzerland (1999), ao Mexico City, Mexico (2004).

E katerea te WCF: “Te utu ae bon tei n arona bon boton te iunite, ae kakaawaki n anuan te aomata, ao ni kabotoaki iaon te aro n anganano ni katiteuanaaki iroun te mwaane ao te aine n te berita ae tabu n te mare inanon maiuia… . Te utu ae tatangira e reitaki n te tangira ao te mwakuri ni ibuobuoki nakon aia botanaomata ao naake a kainnanoia. Ni kabane botanaomata ao botaki nako n te katei a riai ni karinea ao ni kateimatoa te inaomata ao te mwiokoaki n te utu.”