Mga Propeta ng Diyos

Mga minamahal na kabataan, kayganda ng sesyon ng kumperensiya natin! Napakinggan na natin ang tatlo sa mga buhay na Apostol ni Jesucristo. Kahanga-hangang pagpapala ito! At may isa pa tayong maririnig na magsalita, si Elder Henry B. Eyring. Nagpapatuloy ang espirituwal na pagpapakabusog!

Noong nakaraang taon nang magsalita ako, natutuhan natin kung paano harapin ang mundong ito sa pamamagitan ng naging karanasan ni David kay Goliath. Naaalala ba ninyo ang limang bato? Ngayon, magbabahagi ako sa inyo ng isang kuwento sa Lumang Tipan na nabasa ko noong nasa edad ninyo ako na ginusto kong maging katulad ng bida rito. Hindi binabanggit ang pangalan niya sa Biblia, kaya tatawagin natin siyang babaeng taga-Sunem dahil ito ang pangalan ng kanyang bayan.

Isang araw, napadaan si propetang Eliseo sa Sunem, at mababasa natin na “roon ay nakatira ang isang mayamang babae; at [hinimok] siya na kumain ng tinapay. Kaya’t tuwing siya’y daraan doon ay pumupunta siya … upang kumain ng tinapay.” Nakikini-kinita ko na napakasaya ni propetang Eliseo na maanyayahang kumain sa bahay niya! Ilang ulit na siyang naparoon, hanggang sa isang araw, sinabi ng babae sa kanyang asawa, “[Narito ngayon], aking nahahalata na ito’y isang banal na tao ng Diyos.”

Ang sabi ng babae, “Ngayon, aking nahahalata.” Tila inanyayahan niya si Eliseo sa kanyang bahay nang hindi niya alam na isa itong propeta; natanggap niya ang kanyang patotoo mula sa Espiritu Santo sa pamamagitan ng pakikinig nang mabuti sa sinabi at itinuro ni Eliseo. (Isipin ninyo, wala pang mga litrato noong panahong iyon! Kaya mahirap makilala ang isang propeta dahil lang sa namukhaan siya.)

Ngunit hindi roon nagtatapos ang kuwento. Isang araw, sinabi ng babae sa kanyang asawa, “Gumawa tayo ng isang maliit na silid, … at ipaglagay siya roon ng isang higaan, isang hapag, isang upuan, at ng isang ilawan, upang sa tuwing siya’y darating sa atin, siya’y makakatuloy roon.”

Ang matapat na babaeng ito ay handang magpagawa ng isang silid sa loob ng kanyang bahay upang may lugar na matutuluyan ang propeta, na daraan sa lungsod!

Ngayong araw na ito, may matututuhan tayong magandang aral mula sa karanasang ito.

Nagpatotoo ang Panginoon sa babaeng taga-Sunem na isang propeta ng Diyos si Eliseo, at kumilos siya sa pamamagitan ng pagbubukas ng kanyang bahay para tanggapin siya.

Tayo rin ay maaaring makatanggap ng sariling patotoo tungkol sa mga propeta ng Diyos sa panahong ito at buksan ang ating puso’t isipan—ang ating bahay—sa mensahe para sa atin ng ating Ama sa Langit sa mga huling araw na ito.

Minamahal na mga kabataan, inaanyayahan ko kayong itanong ito sa inyong sarili: “May sariling patotoo ba ako sa tungkol sa mga buhay na propeta ng Diyos?”

Umpisahan natin sa simula.

Ano ang isang propeta? Ang propeta ay isang taong tinawag ng Diyos na magsalita para sa Kanya. May mga propeta sa mundo ngayon na tulad din noong mga sinaunang panahon.

Ang mga propeta ay mga tagakita at tagapaghayag. Ibig sabihin, maaari nilang makita ang mga bagay na hindi nakikita ng iba, at makapagpopropesiya sila ng mga magaganap sa hinaharap. Tayo rin ay maihahanda nila sa mga darating na kalamidad. Ang mga propeta ay nakatatanggap ng mga kautusan at paghahayag mula sa Panginoon. Nasasaad sa ikasiyam na saligan ng pananampalataya ang tungkol sa tuluy-tuloy na paghahayag sa mga huling araw na ito. Sinasabi rito, “Naniniwala kami sa lahat ng ipinahayag ng Diyos, sa lahat ng Kanyang ipinahahayag ngayon, at naniniwala rin kami na maghahayag pa Siya ng maraming dakila at mahahalagang bagay hinggil sa Kaharian ng Diyos.”

Sinabi ni Elder Gary E. Stevenson, “Patuloy na inihahayag ng Panginoon ang Kanyang mga utos at kalooban sa Kanyang mga propeta ngayon dahil nais Niyang akayin tayo sa kaligayahan sa buhay na ito at sa kaluwalhatiang selestiyal sa kabilang-buhay.”

Ipinapahayag din ng mga propeta ang ebanghelyo at sila’y mga inspiradong guro at sugo ng Diyos sa lahat ng tao sa mundo.

Bawat miyembro ng Unang Panguluhan at ng Korum ng Labindalawang Apostol ay isang propeta, tagakita, at tagapaghayag. Naglilingkod bilang isang konseho sa ilalim ng pamamahala ng Panginoon, sila ay may awtoridad na magpahayag at magpaliwanag ng doktrina at magtakda ng patakaran para sa Kanyang Simbahan. Taimtim silang nananalangin at nagpapalitan ng mga palagay, dahil kailangang nagkakaisa ang mga korum na ito sa mga desisyon. Sa ganitong paraan, tinitiyak sa atin ng Panginoon na masusunod ang Kanyang kalooban.

Ang mga propeta ay nagpapatotoo tungkol kay Cristo—sa Kanyang buhay, sa Kanyang ministeryo, at sa Kanyang pagka-diyos.

Basahin natin ang ilan sa mga patotoo ng mga propeta sa Aklat ni Mormon.

Ipinahayag ni Abinadi:

“Ang Diyos din ay bababa sa mga anak ng tao, at tutubusin ang kanyang mga tao.

“At dahil sa nagkatawang-tao siya, tatawagin siyang Anak ng Diyos.”

Nagpatotoo rin si Samuel, ang Lamanita, na si Jesucristo ay “[ang] Anak ng Diyos, ang Ama ng langit at ng lupa, ang Lumikha ng lahat ng bagay mula pa sa simula.”

At sinabi ni propetang Moroni, “Nakita ko si Jesus, at … nakipag-usap siya sa akin nang harap-harapan.”

Nang dalawin ng Tagapagligtas ang mga Nephita, isa sa mga unang bagay na ginawa Niya ay tumawag ng labindalawang Apostol. At sinabi Niya sa mga tao, “Pinagpala kayo kung kayo ay makikinig sa mga salita nitong labindalawang aking pinili.”

Ngayon, magbabahagi ako ng ilang salita para sa mga magulang o iba pang miyembro ng pamilya na may mga anak na pinapalaki. Ang Panginoon mismo ang nagturo kina Adan at Eva ng mga katotohanan tungkol sa plano ng kaligtasan. At pagkatapos, sinabi Niya sa kanila, “Ako ay nagbibigay sa iyo ng isang kautusan, na malayang ituro ang mga bagay na ito sa iyong mga anak.”

Ano ang ibig sabihin ng malayang ituro? Ito ay pag-alam sa mga katotohanan ng ebanghelyo, pagkakaroon ng sariling patotoo sa mga ito, at pagbabahagi ng kaalamang iyon sa ating mga anak. Ito ay pormal at impormal na pagtataguyod sa mga sandali ng pagtuturo. Ito ay pamumuhay nang ayon sa kaalaman at patotoong iyon.

Inilarawan ng Aklat ni Mormon ang 2,060 na mga kabataang mandirigma na “mga lalaki ng katotohanan at maunawain, sapagkat sila ay naturuang sumunod sa mga kautusan ng Diyos at lumakad nang matwid sa kanyang harapan.” Matapat na sinunod ng mga binatilyong ito si Helaman na kanilang lider sa militar at kanila ring propeta nang mga panahong iyon, at kinilala nila na pinuspos ng kanilang mga ina ang mga puso nila ng katotohanan at pananampalataya.

Mga magulang, sa mundong ito kung saan maraming tinig at kung minsa’y labis na kasamaan, mismong ang Diyos ay inuutusan tayong palakihin ang ating mga anak sa liwanag at katotohanan. Ipinagkatiwala Niya sa atin ang tungkuling ituro sa ating mga anak ang mga nakapagliligtas na katotohanan ng ebanghelyo. Kung bigo tayong gawin ito, ang mundo ay hindi ito gagawin.

Mahal na mga kaibigang kabataan, may paanyaya ako sa inyo: Sa mga darating na araw, inaanyayahan ko kayong lumuhod, buksan ang inyong puso, at manalangin nang may pananampalataya sa Ama sa Langit, hinihiling sa Kanya na kumpirmahin sa inyo na ang propeta at mga apostol na pinili Niya ay mga tinig Niya sa mundo ngayon.

Itinuro sa atin ng babaeng taga-Sunem na maaari tayong magkaroon ng ganoong patotoo sa pamamagitan ng Espiritu Santo. Ipinapangako ko sa inyo na sa sandaling alam na natin na sila ay mga itinalaga ng Diyos, magiging mas madali ang takbo ng ating buhay sa kabila ng mga hamong kinakaharap natin, kung susundin natin ang kanilang mga tinig nang may pagtitiwala, pananampalataya, at pag-asa. Ang pakinggan at sundin ang tinig ng propeta ay napakahalaga upang makakapit nang mabuti sa bawat mabuting bagay hanggang sa sumapit ang Ikalawang Pagparito ng ating Tagapagligtas.

Tumitindi ang kasamaan sa mundo, ngunit ang Simbahan ni Jesucristo at ang Kanyang kaharian ay mas malakas pa kaysa dati. Ang Sion ay nagsusuot ng kanyang magagandang damit, at hindi babagsak ang trono ni Cristo. Inaasahan ng Panginoon na magiging matatag tayo sa ating mga patotoo, na mapupuno tayo ng pananampalataya, at magsisisi araw-araw. Umaasa ang ating Tagapagligtas na si Jesucristo na ipagpapatuloy natin ang Kanyang gawain.

Minsang sinabi ni Propetang Joseph Smith, “Mga kapatid, hindi ba tayo magpapatuloy sa isang napakadakilang adhikain?” Gayunman, dahil nakatuon sa inyong mga kabataan ang mensaheng ito, nais kong gamitin ang salitang kabataan sa halip na kapatid. Handa na ba kayo?

“[Mga kabataan], hindi ba tayo magpapatuloy sa isang napakadakilang adhikain? Sumulong at huwag umurong. Lakasan ang loob, [mga kabataan]; at humayo, humayo sa pananagumpay! Magsaya sa inyong puso, at labis na magalak.”

Nagpapasalamat ako sa patnubay at tapat na paglilingkod ng mga buhay na propeta. Taos-puso akong nagpapatotoo na tinawag sila ng Diyos para ipagpatuloy, itatag, at pamunuan ang Kanyang kaharian sa mundo ngayon. At parati nga itong ganito. Laging ang Panginoon ang pipili ng Kanyang mga tagapaglingkod. Sa pangalan ni Jesucristo, amen.