Ang Tagalog nga Mga Himno Nakadala og Paglaom ug Kalinaw

Ang musika kanunay nga gitawag nga malukpanon nga pinulongan sa kalag, apan kon nahubad ug naawit diha sa usa ka lumad nga pinulongan, ang gahom niini nga moayo, mobayaw, ug mokonektar, mapalawoman sa mga paagi nga ang mga pulong mismo dili makahayag niini.

Mao kini ang mismong gahom nga akong nabati gayod samtang ang tibuok namong team nagpundok sa pagkanta ug pagrekord sa sagradong mga himno sa Tagalog. Lapas pa sa balaang melodiya sa kanta mismo, kon gihubad ngadto sa Tagalog, ang himno nahimong mas personal, bisan sa labing lawom sa kinahiladman. Ang akong hunahuna, kalag, ug lawas karon hingpit nang nakasabot kon unsa ang kahulogan niini. Ang matag pulong nga mogawas sa akong mga baba nahimong mas makahuloganon nga daw akong naangkon ang mga pulong nga akong gilitok samtang nag-awit niining sagradong mga himno. Kini, sa walay pagduha-duha, usa ka dinasig nga proyekto nga miabot gikan sa kahitas-an.

Usa ka klaro nga panalangin nga daling gibubo kanako atol niining proyekto mao ang hilabihan nga kalinaw nga akong nabati—dili lang atol sa sesyon apan usab sa akong kinabuhi sa kinatibuk- an. Sa pagpakigbahin og gamay sa akong istorya, pipila ka semana sa wala pa ang among unang pagrekord, nagkaguliyang pa gihapon ko gikan sa epekto sa Bagyong Kristine. Ang among balay nabahaan, ug daghan sa among mga butang nangaguba nga dili na maayo. Ang kasamok ug kawalay kasiguroan nagpalibot kanako, hinungdan nga dili ko mahimutang ug nabalaka.

Bisan pa man niining tanan, wala gyod ako bisan kausa nga nagduhaduha sa pagtambong sa sesyon sa pagrekord, nasayod nga ako mahupay ug mapalig-on kon akong ihatag ang akong labing maayo nga mga paningkamot. Sa tibuok sesyon, among natagamtam ang unsay among giisip nga mao ang usa sa labing malipayong nga mga takna sa among kinabuhi. Naningkamot kami og maayo, apan ang pagbati niini dili mura og trabaho: nagkinataw-anay kami, nagkumidyahay, ug nagtinabangay sa usa usag usa samtang nagrekord sa mga awit diha sa Tagalog. Tinuod, ang Ginoo anaa sa mga detalye sa atong kinabuhi. Siya nasayod nga nagkinahanglan ko modistansya ug mosinati sa kalinaw nga gitanyag sa Iyang musika, nga giambitan uban sa maanindot nga mga katawhan.

Laing nakat-onan nga akong gipangga gikan niining proyekto mao ang pagsaksi sa kaandam nga motabang sa matag sakop sa team. Gikan sa mga lider nga gitahasan niining proyekto, ngadto sa mga kawani sa pagrekord, ug ngadto na sa mga mag- aawit—matag tawo matinguhaon nga mobutang og dungang paningkamot, mohatag sa ilang 100%, mohimo sa uban nga mobati og kakomportable, ug moatiman sa usag usa. Mapagarbohon ko nga sa Simbahan, kita gitudloan nga mahimong dili hakog, mabination, ug manggihatagon. Akong panghinaot nga kini nga mga hiyas mahimong mabati sa tanan kinsa maminaw sa sagradong mga himno sa Tagalog.

Usa ka gamhanan nga kasulatan nga nagpakita sa “hingpit nga kahayag sa paglaom” naggikan sa 2 Nephi 26:24, ug mao kini ang eksakto nga akong nabati atol sa mga sesyon sa pagrekord alang sa mga himno sa Tagalog. Ang mga awit, nga gikanta diha sa Tagalog, lawom nga nakatandog sa akong kasingkasing ug mihatag kanako og paglaom ug kalinaw nga hingpit ug dili matandog—ang matang sa kalinaw nga makit-an lang diha ni Kristo. Ang matang sa paglaom nga maggikan sa Iyang sagradong mga pulong. Tungod niini, ako nag- awhag kanatong tanan, ma miyembro man o dili, sa pag-apil niining proyekto pinaagi sa pagsuporta ug paggamit sa mga himno sa Tagalog kutob sa atong mahimo. Ako mopamatuod nga kini nga mga awit mamahimong atong awit.