Imprintahanan ni E. B. Grandin

Human makahubad sa Basahon ni Mormon, si Joseph Smith nakigsabot sa tigmantala sa Palmyra nga si Egbert B. Grandin sa pag-imprinta og 5,000 ka kopya sa basahon. Ang unang mga kopya giimprinta niadtong 1830 ug dayon gipakigbahin sa mga misyonaryo, nga misangpot sa daghan nga mipasakop sa gipahiuli nga Simbahan ni Jesukristo.

Si Martin Harris, usa sa Tulo ka Saksi sa Basahon ni Mormon, miprenda sa uma sa iyang pamilya aron ibayad sa pagpaimprinta. Sa dihang miabot ang mga kabalaka sa panalapi, nangayo siya og giya gikan sa Ginoo.

“Sugoon ko ikaw nga ayaw kaibog sa imong kaugalingon nga kabtangan, apan ihatag kini nga walay pagdumili ngadto sa pag-imprinta sa Basahon ni Mormon, nga naglangkob sa kamatuoran ug pulong sa Dios. …

“Ug imong ipahayag ang maayong mga balita, oo, imantala kini sa kabukiran, ug sa matag taas nga dapit, ug taliwala sa katawhan kutob sa imong makita.” (Doktrina ug mga Pakigsaad 19:26, 29).