Ang Akong Dalan ngadto sa Mapailobon nga Paglahutay

Litrato sa tagsulat pinaagi ni Shaun Sutton

Sa akong pagpauli ngadto sa habagatang bahin sa Pilipinas niadtong 2016 human sa pagserbisyo og madungganon nga misyon sa amihanang bahin sa Pilipinas, naghinamhinam ko nga moeskwela sa Brigham Young University–Hawaii ug masinati ang tanang uban pang mga pagpanimpalad nga nagpaabot sa mga young adult.

Apan sa kalit lang, misugod ang pagkunhod sa akong timbang. Ang akong doktor mihiling nga aduna koy hyperthyroidism. Gihadlok ko niya sa mga implikasyon sa sakit kon dili matambalan.

Bisan sa pagtambal, ang akong lawas misugod og kausab. Ang akong mata misugod sa pagbudlat, ug miniwang ko og maayo. Gilikayan nako nga litratohan ko ug bisan ang pagtan-aw sa samin tungod sa akong panagway.

Ang tambal sa hinayhinay nakatabang. Apan tulo ka tuig ang milabay, nahiling ko nga adunay ikaduhang sakit—depresyon. Kining duha ka sakit misakmit sa akong pagsalig sa kaugalingon. Nanglimbasog ko sa pagbangon sa higdaanan aron moeskwela, ug mibati nga dili makahimo sa pagserbisyo sa Simbahan.

Nasuko ko nga ang Dios mitugot nga mahitabo kini. Naghunahuna ko kon nganong kinahanglan man ko nga moserbisyo sa tibuok nakong kasingkasing ug kalag kon ang pagbuhat sa ingon nagdala lamang og mga pagsulay? Apan nakakuha ko og kahupayan, gikan niini nga mga pulong ni Presidente Jeffrey R. Holland, Akting nga Presidente sa Korum sa Napulog Duha ka Apostoles: “Ang problema sa pangisip mamaayo sama nga mamamayo usab ang nabali nga mga bukog ug nagmasulub-ong kasingkasing.” Mihilak ko sa dihang nadungog nako kadto nga mga pulong. Aduna koy problema sa pangisip nga nagkinahanglan nga ayohon.

Nagdako ko sa usa ka matinud-anong panimalay, ug ang akong hugot nga pagtuo sa Langitnong Amahan ug ni Jesukristo nagpabiling lig-on bisan pa man sa kasakit ug kawalay kasegurohan. Sa hinayhinay, ako midawat ug mipahiangay ngadto sa akong bag-ong mga kahimtang.

Karon, walo ka tuig na ang milabay, wala na ko magpadala sa akong mga sakit. Gidawat nako kini isip kabahin sa kinabuhi. Mibati ko nga naayo na. Makahimo ko sa pagserbisyo ug sa pagpakabuhi sa hingpit nga paagi, bisan kon ang mga hagit sa panglawas magpadayon sa tibuok nakong kinabuhi. Akong nakat-onan nga ang mapailobon nga paglahutay kabahin sa pagka-mortal (tan-awa sa Doktrina ug mga Pakigsaad 121:7–8). Nakat-on ko sa pag-inom sa akong mapait nga kopa ug sa pagpabiling lig-on.

Nagtrabaho ko karon sa personnel department sa usa ka kompanya sa artificial intelligence ug adunay online nga mga klase magabii sa Brigham Young University–Pathway Worldwide. Mihunong ko sa pagpangutana “Nganong ako?” ug nagsugod sa pagpangutana “Unsay akong mahimong makat-onan? Sa unsang paagi nga makabenepisyo ko gikan niini nga kasinatian?”

Sa paglantaw sa nangagi, akong nakita nga ang Langitnong Amahan ug si Jesukristo nag-uban kanako kanunay. Sa pagpadayon, nasayod ko kon kang kinsa ko makasalig (tan-awa sa Mga Panultihon 3:5–6; 2 Nephi 4:34).