Pangalagad sa Apostoles: Usa ka Buhat Nga Walay Lain nga Makahimo

Ang matag Apostol nagdala og talagsaon nga mga talento ug mga kasinatian sa pagtuman sa iyang buluhaton. Ang matag usa nailhan sa iyang trabaho. Ang matag usa lahi sa personalidad ug estilo, apan pareha sila og mga hiyas. Malipayon sila, positibo, ug malaomon nga ikauban. Kasagaran gayod, kadtong kinsa makahimamat og usa ka Apostol ni Jesukristo madani sa iyang kamatinahoron ug kamatinud-anon nga kinaiya.

Adunay pagkadinalian nga mabuhat dayon ang tinguha sa Apostoles—usa ka kadasig sa pagpanalangin, pagdala og kahupayan, ug pagsaksi.

“Sulod sa tulo ka mga dekada, ako kining dungog ug pribilihiyo nga ikauban ang mga sakop sa Korum sa Napulog Duha ka Apostoles sa Ang Simbahan ni Jesukristo sa mga Santos sa Ulahing mga Adlaw,” miingon si Presidente Jeffrey R. Holland, Akting nga Presidente sa Korum sa Napulog Duha. “Walay eksepsiyon, ang matag usa niini nga mga tawo nakatabang nako nga mahimong mas maayo nga disipulo ni Jesukristo.

“Samtang nagpundok mi bag-o lang aron magkuha og litrato sa korum, gibati nako ang hilabihan nga pagbati sa pasalamat nga mahimong kabahin sa usa ka nagpadayon nga kapunongan sa karaan ug sa moderno nga mga disipulo ni Jesukristo.

“Ang mga ngalan ug mga nawong … niini nga korum mausab paglabay sa panahon, apan kana nga importante magpabilin: ang matag apostol midawat sa sugo nga mahimong ‘talagsaon nga mga saksi sa ngalan ni Kristo sa tibuok nga kalibotan’ [tan-awa sa Doktrina ug mga Pakigsaad 107:23]. Walay mas nindot nga buhat sukad nga ihatag ngadto ni bisan kinsa, ni bisan kinsa nga mas talagsaong grupo sa mga tawo nga mohimo niini.”

“Mga pagbati sa pagpasalamat alang sa Manluluwas mipuno kanako karon samtang among gikonsiderar ang Iyang sakripisyo sa duha ka espesyal nga lokasyon,” miingon si Elder Dieter F. Uchtdorf, samtang naglibot sa mga dapit sa Israel niadtong 2023. “Kami mibisita sa Lubnganan sa Tanaman,” diin ang lawas ni Kristo posibleng gipahiluna.

“Kami mibisita usab sa dapit nga gikonsiderar sa pipila nga ang Tanaman sa Getsemani. Samtang kami nanglakaw taliwala sa mga gatosan nga panuigon sa mga punoan sa kahoy nga oliba, kami naminaw ngadto sa mga bersikulo sa kasulatan nga naghulagway sa maligdong nga sakripisyo sa Manluluwas alang kanato diha sa tanaman ug diha sa krus.

“Ang tumang kasakit ni Jesukristo didto sa Tanaman sa Getsemani ug sa Krus angayan sa atong hingpit nga pagrespeto ug hingpit nga balaanong pagtahod. Sa samang paagi, ang maanindot nga paghitabo nga mitumaw sa ikatulo nga adlaw human sa Iyang pagpalansang sa krus angayan sa kahingangha ug sa mahangtoron nga pagpasalamat sulod sa atong mga kasingkasing ug mga hunahuna.

“Isip usa ka disipulo ni Kristo, Ako napanalanginan sa pagpahayag sa akong pagpapamatuod nga Siya buhi!”

Sa usa ka post sa social media mahitungod sa balaang pagtahod alang sa Ginoo, si Elder Gerrit W. Gong miawhag, “Mamulong kita kanunay uban ang kadasig ug pasalamat nga adunay balaang pagtahod alang buhat ug himaya sa Dios ug sa mga hiyas, kaluoy, ug grasya ni Jesukristo ug sa Iyang maulaong sakripisyo.”

“Migahin ang Ginoo og taas nga panahon sa pagtudlo ug pag-andam og usa ka Apostol,” miingon si Presidente Russell M. Nelson. “Kon kanang tawhana tawagon ngadto sa Napulog Duha, ang Ginoo adunay gipaabot nga talagsaong butang nga itampo niana nga tawo.”

Subay sa dalan sa matag Apostol moabot ang mga pagsulay—“eksaminasyon sa kaisog ug pailob”—kanunay nga nagsiksik sa kalag, usahay makahulga sa kinabuhi.

“Adunay pagsulay sa kanunay,” si Presidente Nelson miingon, naghulagway sa buhat diha sa pagserbisyo sa Ginoo. “Andam ba kamo sa pagbuhat sa lisod kaayong mga butang? Kon kamo nagpakita nga kamo andam sa pagbuhat sa inyong bahin, Siya motabang kaninyo.”

Samtang namulong sa mga miyembro sa Australia, si Elder Cook mihatag og gamay sa iyang kasinatian pinaagi sa pagsulti kon sa unsa nga paagi ang Korum sa Napulog Duha ka Apostoles mibati nga dili andam ug dili igo sama sa gibati usahay sa mga lider sa ward. “Ang mahimong usa ka Apostol, diha sa pagserbisyo sa Ginoo, makapahimo nga mapaubsanon,” miingon siya.

Isip usa ka bag-ong gitawag nga Apostol, si Elder Neil L. Andersen mipasabot nga bisan og gibati niya nga dili paigo ug mapaubsanon, nahupay siya nga ang Ginoo mipanalangin kaniya og bisan og usa ka nakapasarang: “Nasayod ako sa hingpit ug piho nga ka klaro pinaagi sa gahom sa Espiritu Santo nga si Jesus mao ang Kristo, ang Hinigugma nga Anak sa Dios.”

“Gipangutana ko unsay bation nga mahimong labing bag-o nga Apostol,” miingon si Elder Patrick Kearon sa adlaw human sa iyang tawag ngadto sa Korum sa Napulog Duha.

“Ako aduna sa tanang mahunahunaang emosyon, ug ako nasayod nga kini mas labaw pa kay sa akong makaya. Apan mangamuyo ako og panabang. Nagtuo gayod ako sa usa ka mahigugmaong Amahan sa Langit ug sa Iyang Anak, ang atong Manluluwas. Ug ako nasayod nga Sila motabang. Ug naglaom ako niini. Ug maningkamot ko sa akong labing maayo nga mahimo, paglabay sa panahon, nga mahimong usa ka Apostol nga anaa sa inyong imahinasyon.

“Ug mao nga niining adlawa nga ako nakigbisog, 24 ka oras human sa tawag, nga mahisubay niini, kon ikaw adunay pagbati nga gisugo … labaw sa imong pagtuo nga ikaw makahimo, nan, ako anaa uban kanimo.”

Mga Ambasador sa Kalibotan

Nagpasabot sa Doktrina ug mga Pakigsaad 107:23, diin ang Ginoo nagtawag sa Napulog Duha ka Apostoles nga mahimong “talagsaong mga saksi sa ngalan ni Kristo sa tibuok kalibotan,” si Presidente Nelson nakaobserbar: “Ang matag sakop sa Napulog Duha usa ka Apostol alang sa tibuok kalibotan. Kinahanglan siyang makat-on sa matag bahin sa kalibotan, sa mga tawo ug sa mga pinulongan ug sa kasaysayan.”

Ang ilang buhat himoon sa tibuok kalibotan. Makigkita sila sa mga pangulo sa estado, sa lokal nga importanteng mga tawo, sa media, ug sa mga miyembro sa Simbahan sa dinaghan ug sa pribado nga mga sitwasyon. Daghang oras ang gikinahanglan ug dako ang buluhaton. Isip mga ambasador ni Ginoong Jesukristo, ang ilang mga kinabuhi dili na ilaha.

Atol sa daghan kaayong eskedyul, ang 12 ka adlaw nga paglibot sa tibuok kalibotan nga pangalagad sa miaging tuig ngadto sa unom ka nasod sa Uropa—diin ang pagkatulog mahitabo atol sa biyahe sa gabii tali sa mga nasod—si Elder D. Todd Christofferson nakigkita sa mga lider sa gobyerno, sa full-time nga mga misyonaryo, ug sa lokal nga mga miyembro sa Simbahan.

Ug ang importante pa gayod mao ang usa ka miting uban sa Ministro sa Kultura ug Media sa Croatia, diin mitanyag ang Simbahan sa pagtabang sa daghan kaayong milalin ngadto sa iyang nasod gikan sa naguba sa gubat nga Ukraine. “Nakaplagan … namo nga adunay daghan lain-laing paagi sa pagbuligay, ilabi na [sa pagtabang] niadtong kinsa anaa sa dakong panginahanglan,” miingon si Elder Christofferson.

Atol sa siyam ka adlaw nga biyahe ngadto sa pipila ka nasod sa Africa sa miaging tuig, si Elder Gary E. Stevenson mibisita sa Makuburi Health Center san Dar es Salaam, Tanzania, diin ang Simbahan nagtabang aron mapalapdan ang sentro. “Sa dihang nakita namo ang serbisyo nga gihatag ngadto sa mga inahan ug sa mga anak dinhi,” miingon si Elder Stevenson, “ang among mga kasingkasing natandog.”

Sa pagtimaan sa ika-30 ka tuig nga anibersaryo sa Simbahan sa Cambodia, si Elder Renlund nakigkita sa primero ministro sa Cambodia, nga iyang gihulagway nga “usa ka talagsaong indibidwal.”

Ang Apostol, nga usa ka kanhi cardiologist, misulti sa primero ministro nga ang Simbahan ni Jesukristo mohatag og donasyon dul-an sa US $2.2 million aron ang usa ka cardiac center madugang ngadto sa ospital sa Siem Reap, nahimutang sa mga 200 ka milya (320 km) amihanan sa Phnom Penh, aron makahatag og mas maayo nga pag-atiman sa panglawas niadtong sama sa uyoan sa primero ministro, nga namatay sa acute coronary syndrome.

“Duna koy pribilihiyo nga ikauban ang mga miyembro, mga lider, ug mga misyonaryo sa Ulaanbaatar, Mongolia, ug sa Kyoto, Hiroshima, Fukuoka, Sapporo, ug Tokyo, Japan,” miingon si Elder Ulisses Soares human mobisita sa Asia North Area niadtong 2024. “Sa matag miting o personal nga inter-aksiyon, gibati nako ang talagsaong gugma ug hugot nga pagtuo niini nga mga tawo alang sa Ginoo. Ang ilang talagsaong mga istorya sa pagkakabig nakatandog nako pag-ayo ug nalig-on ang akong pagpamatuod ni Jesukristo ug sa Iyang gipahiuli nga ebaghelyo dinhi sa yuta.

“… Pagkanindot nga panalangin alang nako nga mobati sa Espiritu sa Ginoo ug sa Iyang gugma niining talagsaong mga disipulo ni Kristo niini nga mga nasod.”

Ang pagbukas sa mga pultahan ngadto sa ebanghelyo sa lain-laing mga nasod mao ang importante nga apostolikanhong responsibilidad: “Ang Napulog Duha nga gipadala, naghupot sa mga yawe, sa pag-abli sa pultahan pinaagi sa pagpahayag sa ebanghelyo ni Jesukristo” (Doktrina ug mga Pakigsaad 107:35).

Sa kasinatian ni Presidente Nelson isip usa ka sakop sa Napulog Duha, ang mga pultahan sa ebanghelyo giablihan sa lain-laing paagi. Usahay ang Espiritu modasig sa lider sa gobyerno hangtod nga “iyang usbon ang iyang hunahuna mahitungod nato,” miingon si Presidente Nelson. Sa lain nga panahon ang usa ka tawo kinsa dili ganahan nga makigsulti sa mga lider sa Simbahan nataktak gikan sa katungdanan, ug ang Ginoo mihatag “kanamo og usa ka tawo nga among ikaistorya.” Sa matag sitwasyon, si Presidente Nelson miingon, “ang mensahe [gikan sa langit] ngari nako pareha ra: ‘Ihatag ang imong tibuok paningkamot. … Dawata ang mga risgo. Dayon kon ikaw dili na makapadayon, ako motabang kanimo.’”

Ang hingpit nga kalipay sa buhat sa Apostol, miingon sila, moabot kon mobalanse sa mga panginahanglan sa pagpamulong ngadto sa dinaghan nga mga grupo ingon man sa pagpangalagad ngadto sa indibidwal. Mobisita sila og mga miyembro sa ilang mga panimalay aron mohatag og panalangin, mopadayag og pasalamat, o mohatag sa gikinahanglan nga tambag.

Si Elder Bednar miingon: “Ang Ginoo mopadala og usa ka sakop sa Korum sa Napulog Duha ngadto sa piho nga mga dapit sa piho nga mga panahon diin makasugat kami og matinud-anon nga mga Santos sa Ulahing mga Adlaw ug sa uban kinsa sa kasagaran nanlimbasog o nagkinahanglan og kahupayan ug kaseguroan. Ang Dios aktibong nagpahimutang niadtong mga panghitabo.”

Usahay ang ilang pagserbisyo makita sa publiko sama sa dihang si Elder Stevenson naapil sa mga balita sa tag-as og katungdanan nga mga tawo nga komperensiya sa Nairobi, Kenya, nga gisibya nga live sa nasyonal nga telebisyon. “Usa ka pangutana nga tingale anaa … sa inyong hunahuna mao ang, ‘Unsa ang usa ka Apostol?’” Miingon si Elder Stevenson atol sa sibya. “Kami … gitawag sa pag-adto sa mga nasod sa kalibotan ug mosaksi sa kabalaan sa Pagkaanak ni Jesukristo, ang Anak sa buhi nga Dios.”

“Ang tanan mahitungod kini Kaniya,” miingon si Elder Dieter F. Uchtdorf. “Nagrepresentar kami Kaniya. Mahitungod kini sa Dios ug sa Iyang kabantog ug sa Iyang kaimportante alang sa kalipay sa Iyang mga anak.”

Ang ilang buhat usahay mas duol sa panimalay—sa tinud-anay gayod. Si Elder Bednar nag-ayo sa atop sa iyang balay usa ka adlaw ug miadto sa lokal nga tindahan aron mopalit og pipila ka suplay. Nagsul-ob siya og sinina nga pangtrabaho: kaswal nga karsones ug sapatos, usa ka T-shirt, ug kalo sa baseball.

“Usa ka tawo miduol nako samtang namili ko sa akong mga suplay ug miingon, ‘Elder Bednar, ang pagtakoban wala magsilbi.’ Nangatawa mi, ug dayon nangutana siya, ‘Dili ka ba malain kon mangutana ko?’

Mitubag ko, ‘Ah, mao bitaw nga nia ko.’

“Mitubag siya nga nahibulong, ‘Unsay buot nimong ipasabot?’

“Miingon ko, ‘… Ania ko tungod kay ang Dios nasayod nga magkita ta niini nga tindahan ug nga ikaw dunay butang nga gusto nimong ipangutana. Palihog padayon ug ipangutana kana kanako.’

“Nag-istorya mi sa daplin mga 15 ka minuto, ug naningkamot ko sa pagtabang niya sa pagpangita og tubag sa iyang pangutana. Sulagma lang ba nga akong nahimamat kining buotan nga tawo sa lokal nga tindahan? O kini nga yugto balaanong gipahimutang sa usa ka mahigugmaong Manluluwas kinsa … mitubag sa mga kabalaka sa usa ka matinud-anong tawo—usa ka tawo?

“Nagtuo ko nga sa buhat sa Ginoo wala kanang butang nga sulagma. Ang bili sa mga kalag mahinungdanon sa panan-aw sa Dios.”

Pag-atubang og mga Hagit inubanan sa Hugot nga Pagtuo diha sa Ginoo

Lapad ug komplikado nga mga problema ang giatubang sa Apostoles karon. Nagtinguha sila og inspirasyon samtang sila motudlo ug mangalagad ngadto sa tibuok kalibotan nga kongregasyon sa labaw sa 17 ka milyon nga mga miyembro sa Simbahan nga gisulayan pinaaagi sa mga hagit sama sa politikanhong kagubot, pornograpiya, walay hunong nga mga kabug-at gumikan sa social media, o ekonomikanhong walay kaseguroan. Ang panagbangi sa mga nasod makabalda sa buhat. Ang pagkawagtang sa tradisyonal nga mga hiyas naghagit sa sosyal nga kalig-on.

Ang mga miyembro sa Napulog Duha naningkamot sa ilang mga responsibilidad ug matinguhaon sa pagpalig-on sa pagtuo sa nagtubo nga walay pagtuo nga kalibotan.

“Klaro nga ang gahom sa Ginoo nag-aghat sa mga lider sa Simbahan, nagtulod kanila inubanan sa … kadinalian,” miingon si Presidente M. Russell Ballard (1928–2023), Akting nga Presidente sa Korum sa Napulog Duha ka Apostoles. “Ang pangutana nga angay natong ipangutana tanan mao, ‘Nagsunod ba kita sa lakang sa [atong mga lider]?’ Ang matag usa nato kinahanglan gayod nga andam nga motubag niana nga pangutana. Ipaneguro nako ninyo nga kini usa ka hilisgotan nga importante nga hisgotan sa Korum sa Napulog Duha ka Apostoles. … Dili kini panahon nga morelaks o mopadaplin sa atong mga calling. …”

“… Kita kinahanglan nga andam nga mosunod sa lakang sa atong mga lider, moagpas sa ilang matag gipatas-an nga lakang.”

“Isip mga sumusunod ni Jesukristo, nagtinguha kita nga mahimong sama sa atong Manluluwas ug nagsunod sa Iyang ehemplo sa tanan natong buhaton,” miingon si Elder Uchtdorf. “Sugod gayod sa gutlo nga mitunob kita sa dalan sa pagkadisipulo, ang makita ug dili makita nga mga panalangin gikan sa Dios misugod sa pag-abot kanato.

“Bisan asa kita, ikaw ug ako makalakaw diha sa dalan sa pagkadisipulo karon. Magmapainubsanon kita; mag-ampo kita ngadto sa atong Amahan sa Langit uban sa tibuok natong kasingkasing ug ipahayag ang atong tinguha sa pagpaduol og maayo ngadto Kaniya ug magkat-on kabahin Kaniya.”