Mahimo Ba Ako nga Makadawat og Pagpadayag alang sa Uban?

Ang pag-ila sa tingog sa Ginoo taliwala sa mga panglingla sa kalibotan mahimong lisod, apan ang mga propeta ug apostoles sa ulahing mga adlaw naghatag kanato og giya aron makatabang.

Si Elder Dale G. Renlund sa Korum sa Napulog Duha ka Apostoles nagtudlo: “Kinahanglan natong masabtan ang sistema sa mga lagda diin molihok ang Espiritu Santo aron sa paghatag og personal nga pagpadayag. Kon molihok kita sulod sa sistema sa mga lagda, ang Espiritu Santo makapagawas og makapahibulong nga panabot, direksiyon, ug kahupayan. Gawas niana nga sistema sa mga lagda, bisan unsa pa kita ka maalamon o matalento, mahimo kitang mailad.”

Pipila lang ka bulan human nga ang gipahiuli nga Simbahan ni Jesukristo naorganisar, ang mga Santos nakat-on mahitungod niining importante nga baroganan.

Niadtong Agosto 1830 usa ka miyembro sa Simbahan nga ginganlan og Hiram Page ang miangkon nga siya nakadawat og mga pagpadayag gikan sa Dios mahitungod sa “pagtukod sa Zion” ug “sa kapunongan sa Simbahan.” Pipila ka miyembro sa Simbahan, lakip ni Oliver Cowdery, mituo kaniya.

Ang Propeta Joseph Smith nabalaka tungod kay ang mga pangangkon ni Hiram sukwahi “sa kapunongan sa balay sa Dios.” Si Joseph nangutana sa Ginoo ug nakadawat og pagpadayag nga alang kang Oliver nga karon natala diha sa Doktrina ug mga Pakigsaad 28.

Ang Ginoo miingon nga si Oliver Cowdery makahimo sa “pagpamulong o pagtudlo” kon siya “giyahan sa bisan unsa nga panahon sa Maghuhupay” sa pagbuhat niini (Doktrina ug mga Pakigsaad 28:4). Apan ang Ginoo miingon usab nga “Walay usa nga itudlo sa pagdawat og mga sugo ug mga pagpadayag niini nga simbahan gawas sa akong sulugoon nga si Joseph Smith” hangtod nga ang Ginoo motudlo og “lain diha sa iyang dapit” (mga bersikulo 2, 7).

Sa laing pagkasulti, ang tanan nga takos nga mga tigpangita mahimong giyahan sa Espiritu Santo alang sa ilang personal nga mga responsibilidad, mga calling sa Simbahan, ug mga pamilya. Apan ang kasamtangan nga propeta lamang ang adunay awtoridad sa pagdawat og mga sugo o mga pagpadayag alang sa tibuok Simbahan. “Kay ang tanan nga butang kinahanglan gayod himoon sa kahusay,” miingon ang Ginoo (bersikulo 13).

Si Elder Gary E. Stevenson sa Korum sa Napulog Duha ka Apostoles mipasabot, “Gawas lang kon kamo gitawag pinaagi sa tukma nga awtoridad, ang mga pagbati gikan sa Espiritu wala gihatag aron kamo motambag o mokorihir sa uban.”

Pinaagi sa pagsunod sa mga pulong sa Ginoo nga gihatag pinaagi sa Iyang gihatagan og katungod nga mga sulugoon ug sa pagpangita og personal nga pagpadayag sulod sa atong mga responsibilidad, kita makalikay nga malingla ug makasinati og kalinaw, hingpit nga kalipay, ug kahilwasan.