Digital Lamang
Pakigtagbo kang Jesukristo sulod sa Balay sa Ginoo
Gikan sa usa ka debosyonal nga pakigpulong nga gihatag ngadto sa mga estudyante sa Brigham Young University sa Provo, Utah, USA, niadtong Oktubre 10, 2023. Aron makita ang tibuok nga pakigpulong, bisitaha ang speeches.byu.edu.
Salamat na lang, bisan og imperpekto kita, gidapit kita isip Iyang mga dinapit ngadto sa Iyang balay.
Si Presidente Russell M. Nelson mihulagway sa kaimportante sa mga templo ug sa tanang manghitabo diha niini gamit niini nga mga pulong:
“Ang templo mao ang labing importante nga bahin sa pagpalig-on sa atong pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo sulod sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. …
“… Ang tanan nga atong gituohan ug ang tanan nga saad nga gihimo sa Dios ngadto sa Iyang mga katawhan sa pakigsaad anaa sa templo.”
Ang atong Langitnong Amahan kanunayng nagtinguha ug nagplano og sagradong dapit diin Siya makatudlo ug makahimo og mga pakigsaad ngadto sa Iyang mga anak. Segurado nga makapangita kita ug makadawat og giya sa Dios ug tabang gikan sa birtuwal nga paagi sa bisan asa nga lokasyon, apan dunay butang nga lahi mahitungod niana nga mga dapit nga gideklarar sa Dios nga Iyang kaugalingon ug gibalaan pinaagi sa Iyang presensiya.
Ang Tanaman sa Eden usa sa mao nga dapit—usa ka dapit nga pinili, gitanom, ug gipanindot sa Dios (tan-awa sa Genesis 2:8, 15–18) ug dapit alang sa instruksiyon ug mga pakigsaad alang kang Adan ug ni Eva. Si Adan ug si Eva atubangay nga nakigsulti sa Amahan ug sa Anak didto sa tanaman, gitudloan mahitungod sa plano sa Amahan alang sa Iyang mga anak, ug giselyo sila isip bana ug asawa alang sa kahangtoran (tan-awa sa Genesis 2:21–24; Moises 3:20–25). Sa wala pa kinahanglana nga sila mobiya sa tanaman aron moatubang sa mga hagit sa mortalidad ug sa padayong pag-atake sa kaaway, ang matag usa gihatagan og mga panit nga kupo—o, sa tawag niini karon, usa ka sapot [garment] (tan-awa sa Genesis 3:21; Moises 4:27). Ang kahulogan sa paghatag sa Dios og garment ngadto sa Iyang mga anak sa pakigsaad ug ang pagdawat ug pagsul-ob niana nga garment sa Iyang mga anak sa pakigsaad dili angay hunahunaon nga ordinaryo. Usa kini ka labing sagrado nga pagsulod og pakigsaad.
Sa atong panahon ang Ginoo mipakita isip usa ka nabanhaw ug nahimaya nga binuhat didto sa Kirtland Temple human sa pagpahinungod niini ug namahayag, “Kay tan-awa, akong gidawat kini nga balay, ug ang akong ngalan maania dinhi; ug akong ipakita ang akong kaugalingon ngadto sa akong katawhan tungod sa kaluoy dinhi niini nga balay” (Doktrina ug mga Pakigsaad 110:7).
Tungod kay ang “Dios sama kagahapon, karon, ug sa kahangtoran” (Mormon 9:9), masaligon ako nga ang Ginoo modawat usab sa Iyang tanan nga templo karon. Salamat na lang, bisan og imperpekto kita, gidapit kita isip Iyang mga dinapit ngadto sa Iyang balay. Balikbalik Niyang gipadangat kini nga pagdapit ngari kanato, ug kon dawaton nato kini, kini—sigon sa gisaad ni Presidente Nelson—mopanalangin sa atong kinabuhi “sa mga paagi nga walay laing makahimo.” Kinahanglan nga gustohon nato ang pagsulod sa Iyang balay sa kanunay tungod kay si Jesukristo mahinamon nga mohimamat kanato didto.
Salamat na lang, ang mga panalangin nga maanaa kanato pinaagi sa Pag-ula ni Kristo maghimong posible alang kanatong tanan nga maandam sa pagsulod sa balay sa Ginoo. Dunay oposisyon sa bisan unsang plano tungod kay, sama sa giingon ni Presidente Boyd K. Packer (1924–2015), “Ang mga templo mao gayod ang pinakasentro sa espirituhanong kalig-on sa Simbahan. Kinahanglan nga magdahom kita nga ang kaaway mosulay sa pagbalda kanato … samtang kita nagtinguha sa pag-apil niini nga sagrado ug dinasig nga buhat” ug makaila sa Manluluwas sa usa ka mas suod ug sagradong paagi sulod sa Iyang balay.
Akong nakat-onan sulod sa mga katuigan, hinoon, nga ang pagtambong lamang sa templo dili paigo. Gikinahanglan nga dunay butang nga mahitabo kanato tungod sa atong paggahin og panahon sulod sa balay sa Ginoo. Kinahanglan nga mobiya kita sa Iyang balay nga lahi na kay sa atong pagsulod, apan kana nga resulta dili kanunayng sayon nga kab-oton.
Makabenipisyo sa Hingpit gikan sa Kasinatian sa Templo
Daghang tuig ang milabay nagbasa ko og libro nga giulohan og Ang Templo: Diin Nag-abot ang Langit ug Yuta, gisulat ni kanhi Truman G. Madsen, kinsa migahin og daghan sa iyang kinabuhi sa pagtuon mahitungod sa mga ordinansa ug sa mga pakigsaad sa templo. Niana nga libro, si Brother Madsen mitino og tulo ka butang nga gibati niya sa usa ka higayon nga nagpugong niya gikan sa pagkadawat og hingpit nga kaayohan gikan sa kasinatian sa templo.
1. Tun-i ang mga Kasulatan mahitungod sa Templo
Ang unang hagit nga iyang gitino nga nagpugong niya gikan sa hingpit nga pag-ila ug pagdawat sa talagsaon nga mga panalangin sa balay sa Ginoo—o, sama sa paghulagway niini sa bantogan nga patriyarya nga si Jacob, “ang ganghaan sa langit” (Genesis 28:17)—mao ang wala niyay pagpaningkamot sa “mainampingong pagbasa sa mga kasulatan mahitungod sa templo.”
Ako usab nakakat-on nga ang labing maayo nga tinubdan sa panglantaw ug pagsabot mahitungod sa templo naggikan sa mainampingon, nakatutok sa templo nga pagtuon sa mga kasulatan. Sama pananglit, tugoti kong mopakigbahin og tulo ka kasulatan nga tingali makatabang nimo nga makaangkon og mas dakong pagpasalamat alang sa kamahinungdanon sa pagdihog nga nahitabo sa templo:
1. “Ug gibuboan ni [Moises] og lana nga igdidihog ang ulo ni Aaron aron paghalad kaniya” (Levitico 8:12).
2. “Unya mikuha si Samuel og usa ka gamay nga tibod sa lana, ug gibubo niya ang sulod niini sa ulo ni [Saulo] …, ug giingnan, … mokunsad kanimo ang Espiritu sa Ginoo, ug moapil ka uban [sa hut-ong sa mga propeta], ug mahimo ka nga bag-o nga tawo” (1 Samuel 10:1, 6; tan-awa usab sa bersikulo 5).
3. “Gikuha ni Samuel ang sungay nga gisudlag lana ug iyang gidihogan si [David] atubangan sa iyang mga igsoon: ug mikunsad kang David ang Espiritu sa Ginoo ug nagpabilin kini kaniya sukad niadtong adlawa” (1 Samuel 16:13).
Alang niadtong nagtinguha nga makasabot ug makonekta sa mga ordinansa sa templo sa mas makahuloganong paagi, paggahin og mas daghang panahon sa pagbasa sa mga kasulatan nga maghisgot mahitungod sa templo ug sa mga ordinansa sa templo. Kon buhaton nimo, matingala ka sa unsay ipadayag sa Ginoo kanimo. Human sa tanan, Siya usa ka Dios nga misaad sa pagpadayag sa “tanan nga mga butang kabahin sa [Iyang] gingharian” ngadto sa Iyang mga anak sa pakigsaad (Doktrina ug mga Pakigsaad 76:7).
2. Isakripisyo ang Imong mga Sala diha sa mga Altar sa Templo
Ang ikaduhang problema nga gitino ni Brother Madsen mao nga siya “adunay lainglaing mga kahuyang ug dili kaayo mahinamon nga mag-usab nianang tanan.” Ang Ginoo namahayag sa mosunod: “Akong ihatag kaninyo … ang usa ka sugo nga kamo … [magbalaan sa] inyong mga kaugalingon; oo, limpyohan ang inyong mga kasingkasing, ug hugasan ang inyong mga kamot ug ang inyong mga tiil sa akong atubangan, aron himoon ko kamong limpyo” (Doktrina ug mga Pakigsaad 88:74).
Si Presidente Henry B. Eyring mitudlo nga “kon ikaw o ako kinahanglang moadto sa templo nga kulang ang kaputli, dili nato makita, pinaagi sa gahom sa Espiritu Santo, ang espirituwal nga pagtulun-an bahin sa Manluluwas nga atong mahimong madawat sa templo.” Busa ang paghinulsol mahinungdanon sa pagpadayag sa templo, ug ang pagpadayag sa templo mahinungdanon sa kausaban nga kinahanglang masinati natong tanan gikan sa pagpakigtagbo kang Jesukristo diha sa templo.
Ang sinemana nga pag-apil sa ordinansa sa sakramento makatabang usab kanato nga mahimo ug magpabiling limpyo. Kon kita takos nga moambit sa sakramento, atong gibag-o taliwala sa ubang mga pakigsaad ang pakigsaad sa bunyag, ug ang Ginoo mobag-o sa paglimpyo nga nahitabo sa dihang kita natawo sa tubig ug sa Espiritu. Nagatuo ako nga ang pag-adto sa sakrament uban sa mas dako nga balaang pagtahod mahinungdanon kon magtinguha kita nga mas mahimong takos sa pagpadayag sa templo.
Ang duha ka mga gutlo sa pakigsaad, niana nga sakramento ug sa templo, nagkasumpay nga walay pagkabulag. Kining duha nagpunting kanato ngadto sa Manluluwas ug sa Iyang maulaon nga sakripisyo. Kon maminaw kita sa Espiritu samtang mag-ambit kita sa sakramento, mohunghong kini sa atong mga espiritu kon unsay atong gikinahanglan nga usbon aron mas hingpit nga makabenipisyo gikan sa atong panahon sulod sa templo. Kon mahitabo kana, aduna kitay duha ka kapilian. Matinguha nato ang pagtabon sa atong mga sala sama ni Adan ug ni Eva nga nagtinguha sa pagtabon sa ilang pagkahubo gamit ang mga dahon sa igira (tan-awa sa Genesis 3:7), o pwede natong himoon ang sama sa gibuhat sa amahan ni Hari Lamoni ug “biyaan” (Alma 22:18) kadtong tanan nga sala nga gipatagad sa Espiritu kanato. Ang pagkaandam nga mosakripisyo sa atong mga sala—nga mapahimutang kini sa mga altar sa templo sa epektibong paagi—moresulta sa atong pagkabaton og susamang kasinatian sulod sa balay sa Ginoo nga nasinati ni Joseph Smith ug Oliver Cowdery sulod sa Kirtland Temple dihang namahayag ang Ginoo, “Tan-awa, ang inyong mga sala napasaylo na kaninyo; limpyo na kamo sa akong atubangan; busa, ihangad ang inyong mga ulo, ug pagmaya” (Doktrina ug mga Pakigsaad 110:5).
3. Tinguhaa ang Espiritu aron Masabtan Unsay Gitinguha sa Ginoo nga Itudlo diha Kanimo pinaagi sa mga Simbolo
Ang ikatulong babag nga giila ni Brother Madsen mao nga siya may “daan nga pagbati nga kadili ganahan sa ritwal ug sa simbolismo.” OK ra ang moangkon nga dihang una natong nasinati ang mga ordinansa sa templo, ang ritwal ug ang simbolikanhong mga aspeto sa mga ordinansa ingon og makalibog ug tingali mipabati kanato og gamay nga kadili komportable. Apan kanang una nga reaksiyon wala magpasabot nga kinahanglan natong biyaan ang atong mga paningkamot aron masabtan unsay gipaningkamotan sa Ginoo nga itudlo kanato o, labaw sa tanan, itugyan kanato. Sama sa gitudlo ni Presidente Nelson, “Kon ugaling wala ka pa ganahi nga motambong sa templo, balik-balik og adto—dili kay paminosan.” Ug, ako modugang, apil nianang dugang pa nga kapermihon sa inyong pag-adto, nga adtoa ang templo nga magtinguha sa Manluluwas.
Ang Ginoo namahayag nga “kining labaw nga pagkapari nangalagad sa ebanghelyo ug naghupot sa yawe sa mga misteryo sa gingharian, gani ang yawe sa kahibalo sa Dios.
“Busa, diha sa mga ordinansa niana, ang gahom sa pagka-diosnon gipakita” (Doktrina ug mga Pakigsaad 84:19–20; tan-awa usab sa mga bersikulo 21–22).
Ang matahom nga simbolikanhong mga aspeto sa mga ordinansa sa templo makatabang nato nga masabtan ug mabatyagan ang literal nga gahom sa pagkadiosnon nga anaa niadto nga mga ordinansa. Dili kini sila bag-o lang kondili “gi-orden ug giandam [sa Ginoo] sa wala pa ang katukoran sa kalibotan” (Doktrina ug mga Pakigsaad 128:5). Sigon sa gitudlo sa usa ka sakop sa Korum sa Napulog Duha ka Apostoles nga si Orson F. Whitney, “Ang Dios nagtudlo gamit ang mga simbolo; paborito niya kini nga pamaagi sa pagtudlo.”
Kon dapiton nato ang Espiritu sulod sa atong kasingkasing ug hunahuna, mopamatuod ko nga atong madiskobrehan nga ang ritwal ug simbolikanhong mga aspeto sa mga ordinansa sa templo sa tinuod pamilyar na kaayo kanato, ug atong mamatikdan nga ang gahom sa pagkadiosnon nga modagayday sa atong kinabuhi samtang kita magtahod niini magseguro sa atong abilidad nga makabalik ug makapuyo sa presensiya sa atong Amahan sa Langit. Sigon sa gitambag ni Presidente Nelson: Ang pagtuga sa templo gihatag pinaagi sa pagpadayag. Sa ingon niana, kini labing masabtan pinaagi sa [pag]padayag, madasigong gipangita uban sa putli nga kasingkasing.”
4. Tinguhaa si Jesukristo Samtang Magtambong sa mga Ordinansa sa Templo
Gusto nakong idugang ang kaugalingon nakong ikaupat nga sayop nga nahimo sa daghan kaayo kanato kon moadto kita sa pagsimba sa templo. Kasagaran natong gibaliwala ang reyalidad nga ang tanang simbolismo sa templo nagpunting ngadto kang Jesukristo, sa Iyang Pag-ula, ug sa Iyang tahas sa “pagpahinabo sa pagka-imortal ug sa kinabuhi nga dayon sa tawo” (Moises 1:39). Tingali mao kanay hinungdan kon nganong namahayag ang Ginoo ngadto ni Propeta Joseph Smith “nga ang tanang pagsulod sa imong mga katawhan, ngadto niini nga balay, mahimo pinaagi sa ngalan sa Ginoo;
“Nga ang ilang tanang paggawas gikan niini nga balay mahimo pinaagi sa ngalan sa Ginoo” (Doktrina ug mga Pakigsaad 109:17–18; tan-awa usab sa bersikulo 19).
Daghan sa mga hagit nga nasinati sa mga tawo nga wala mobati sa unsay gusto nilang mabati sulod sa templo naggikan sa ilang pagkapakyas sa pagpangita sa Ginoo samtang nag-apil sa mga ordinansa sa templo. Siya mao ang hinungdan kon nganong moadto kita sa templo. Siya mao ang gitinguha sa atong Amahan sa Langit nga atong ikatagbo sulod sa templo. Anaa Siya sa sentro sa matag simbolo, matag ordinansa, matag pakigsaad, ug ang matag gilaoman alang sa panalangin sulod sa templo. Ang pagtinguha kang Kristo sulod sa templo maghimo kanato sa pagsabot kon nganong anaa kita sa templo ug nganong kinahanglan kitang mobalik.
Sa iyang epistola ngadto sa mga Hebreohanon, namahayag si Pablo sa mosunod kalabot sa pag-angkon og akses sa labing balaan nga bahin sa karaan nga templo:
“Busa mga igsoon, may hingpit kitang kagawasan sa pagsulod sa labing balaang dapit pinaagi sa dugo ni Jesus,
“Gibuksan niya alang kanato ang usa ka bag-ong agianan, usa ka buhing agianan lahos sa tabil, nga sa ato pa, pinaagi sa iyang kaugalingong lawas” (Mga Hebreohanon 10:19–20).
Si Juan mihatag og dugang nga pagpatin-aw niini nga kasulatan dihang gikutlo niya si Jesus nga nag-ingon “walay makaadto sa Amahan, kon dili moagi kanako” (Juan 14:6). Kon mobarog kita sa tabil sa templo, Siya nga maoy atong tigpataliwala ngadto sa Amahan sa simbolikanhong paagi magabarog sa atong taliwala ug sa Amahan, nga magaingon:
“Amahan, tan-awa ang mga pag-antos ug ang kamatayon kaniya nga wala makasala, nga imong gikahimut-an pag-ayo; tan-awa ang dugo sa imong Anak nga gipaagas, ang iyang dugo nga imong gihatag aron ang imong kaugalingon pagahimayaon;
“Mao nga, Amahan, luwasa kining akong mga kaigsoonan nga mituo sa akong ngalan, aron sila moduol ngari kanako ug makabaton sa walay kataposan nga kinabuhi” (Doktrina ug mga Pakigsaad 45:4–5).
Sa panahon nga atong maakses ang presensiya sa Dios sa simbolikanhong paagi lahos sa tabil makatabang nato nga makadayeg kon nganong si Joseph Smith mitudlo nga “nagkinahanglan kita sa Templo labaw sa ubang butang.”
Motahod sa Matinud-anong paagi ug Isul-ob ang Garment sa Templo
Sa karaang panahon, ang sagradong sinina gisul-ob sa pagtabang sa mga anak sa Dios sa pakigsaad aron “mahinumdom sa kasugoan sa Ginoo, ug dili kamo magtuman sa inyong gusto ug magpatuyang sa kahilayan” (Numeros 15:39). Wala kini kalainan karon. Pagkatalagsaon, pagkasagrado niini nga gutlo nga mahatagan sa garment samtang anaa sa balay sa Ginoo, kauban sa tanan nga simbolikanhong kahulogan—ang labing importante niini mao ang paghinumdom sa sakripisyo sa Manluluwas sa Tanaman sa Getsemani ug sa krus ug sa Iyang mahimayaon nga Pagkabanhaw. “Ang garment sa templo usa ka pisikal nga pahinumdom sa sagradong mga saad nga [atong] gihimo kauban sa [atong] Langitnong Amahan, ug nagpahinumdom kini [kanato] sa mga panalangin nga [atong] madawat kon [kita] motahod sa [atong] mga pasalig.” Ang garment magtabang usab nato sa pagtahod sa mga pakigsaad sa sakramento nga “kanunay mahinumdom kaniya ug motuman sa iyang mga sugo nga iyang gihatag [kanato]; nga [kita] sa kanunay makabaton sa iyang Espiritu nga makig-uban [kanato]” (Doktrina ug mga Pakigsaad 20:77).
Si Presidente Nelson mitudlo og labihan ka lawom nga butang mahitungod sa garment sa templo nga ako gihatagan niya og pagtugot nga ipakigbahin: “Ang imong garment nagsimbolo sa tabil [sa templo]; ang tabil nagsimbolo sa Ginoo nga si Jesukristo. Mao nga kon isul-ob nimo ang imong garment, bation nimo nga tinuoray nimong gibutang sa imong kaugalingon ang labing sagrado nga simbolo sa Ginoo nga si Jesukristo—ang Iyang kinabuhi, Iyang pangalagad, ug Iyang misyon, nga mao ang pagtubos sa matag anak nga babaye ug anak nga lalaki sa Dios.”
Makit-an nato sa templo ang Manluluwas, sa matag aspeto niini, ug makita nato Siya diha sa simbolismo sa garment. Sa pagsul-ob sa garment, namahayag kita sa Dios nga nagmaya kita sa pagbaton sa ngalan ni Jesus nga gipahimutang diha kanato sa Iyang balaan nga balay (tan-awa sa Doktrina ug mga Pakigsaad 109:26), ug gihinumdoman nato Siya sa kanunay.
Didto sa templo makadawat ka og gahom nga makabarog ug makabuntog sa espirituhanong mga paghasmag sa kaaway pinaagi sa paghimo ug pagtuman sa mga pakigsaad. Didto sa templo, makadawat ka og garment, dili lang bisan unsa nga garment kondili ang garment sa balaan nga pagkapari. Ug didto sa templo imong ikatagbo si Jesukristo.
Si Presidente Nelson mitudlo nga “sa matag panahon nga ang usa ka templo ipahinungod, mas dugang nga kahayag ang moabot sa kalibotan.” Dili ko motuo nga naghisgot siya mahitungod sa mga suga diha sa gawas nga bahin sa templo. Seguro naghisgot siya mahitungod kanato, nga mga anak sa pakigsaad sa Dios, kay sa matag higayon nga takos kitang moadto sa templo, makadawat kita ug mobiya dala ang dugang nga kahayag.
Mopamatuod ko nga ang Dios mahinamon nga mosulod og usa ka relasyon sa pakigsaad uban kanato sa Iyang templo, usa nga, sigon sa gipamatuod ni Presidente Nelson, makausab sa “atong relasyon Kaniya sa kahangtoran” ug mopanalangin “kanato og labaw nga sukod sa [Iyang] gugma ug kaluoy.” Mosaksi ko nga samtang mag-andam kita ug magputli sa atong kaugalingon, si Kristo mopadayag sa Iyang Kaugalingon ngari kanato didto sa Iyang balay nga puno sa gahom ug personal nga mga paagi. Mosaksi ko nga ang padayon nga pagtahod ug pagsul-ob sa garment maghimo kanato nga mahinumdom kang Jesukristo, nga “[masangkapan sa] pagkamatarong ug sa gahom sa Dios sa dako nga himaya” (1 Nephi 14:14), ug alang sa pag-angkon sa espirituwal nga panalipod nga gikinahanglan aron molambo ang atong paglaom nga usa unya ka adlaw mahimong isigka-manununod Kaniya sa gingharian sa Amahan (tan-awa sa Mga Taga-Roma 8:16–17;Doktrina ug mga Pakigsaad 84:38).