Hinumdomi: Ikaw Bililhon Kaayo

“Palandonga ninyo ang mga lirio sa kaumahan, giunsa nila sa pagtubo; wala sila magbudlay, ni magkalinyas: …kon sa ingon gibistihan sa Dios ang mga tanom sa kaumahan …, dili ba kamo labaw pa nga iyang pagabistihan …?” (Mateo 6:28, 30).

Tungod kay kami swerte kaayo nga nagpuyo duol sa kinaiyahan, ang akong pamilya malingaw nga maglakaw og layo sa dili pa mosalop ang adlaw sa mga dalan kilid sa among panimalay. Atol niadto nga mga pagpanglakaw, kasagaran namo nga istoryahan ang among adlaw ug ang mga panalangin nga among nakita nianang adlawa. Kauban sa mga yanong butang nga pihong ganahan sa akong anak nga babaye sa among paglakaw-lakaw mao ang ihalas nga mga bulak. Kini mabulokon, nitubo lang og iyaha, ug libreng tan-awon. Walay bisan kinsa sa pagkatinuod ang nagbu-bó niadto nga ihalas nga mga bulak kada adlaw, samtang nangolekta kini og tubig ug kabasá gikan sa yamog, gabon, ug panagsa nga ulan.

Kini nagpahinumdom nako sa panudlo sa Dios diha sa Mateo 6:28. Kasagaran kita nga mabalaka kada adlaw kon unsaon nga mag-una sa kinabuhi, unsay atong hitsura, o unsay gihunahuna sa uban kanato. Apan ang katahom niadto nga ihalas nga mga bulak mao ang kada adlaw nga yano nga pahinumdom kanako nga ang Dios nahigugma kanako ug Siya kanunay nga mosangkap nako ug sa akong pamilya.

Thang Nguyen, Texas, USA

“Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Akong nakat-onan nga ako bililhon kaayo ngadto sa Dios pinaagi sa pagtuon sa mga kasulatan, pagsag-ulo sa Tema sa Young Women, pagbasa sa akong patriyarkal nga panalangin, ug paghimo og mga pakigsaad sulod sa balaan nga templo. Akong nakat-onan nga ako bililhon kaayo ngadto sa Dios pinaagi sa akong kasinatian niini nga kinabuhi. Gibati nako kon unsa ka dako ang Iyang paghigugma nako pinaagi sa gugma nga anaa nako alang sa akong mga anak. Kon nagserbisyo ako sa uban, nakat-onan nako ang paghigugma kanila sama sa Iyang gihimo. Siya adunay hingpit nga gugma alang sa tanan niyang anak, nga naglakip nako. Kana nga gugma nagpakita nako kon unsa ko kamahinungdanon sa Dios, ug kini nagpakita kanako sa akong bili.

Keturah Gordon, Oregon, USA

“Pinaagi sa gagmay ug yanong mga butang, mahitabo ang dagkong mga butang” (Alma 37:6).

Nakahinumdom ko og balik sa dihang gamay pa ko, ang akong mama mosulti nako nga ako bililhon kaayo sa Dios, nga Siya nakaila nako, ug nga ako kinahanglan nga kanunayng magtinguha sa paghigugma ug pagserbisyo Kaniya. Tingali sobra ra kining paminawon, apan nakahibalo ko nga kini tinuod, tungod kay gipuy-an nako kini. Kini tungod kay sa paghimo sa gagmay ug yano nga mga butang nga ang liso sa kamatuoran nga gitanom sa akong inahan diha sa akong kasingkasing dugay na nga panahon ang milabay mitubo ngadto sa dako nga kahibalo ug kasegurohan nga ang Dios nakaila ug nahigugma kanako ug nga ako importante Kaniya. Nahimo ko nga mas napaduol sa Dios pinaagi sa pagtambong sa simbahan ug pag-ambit sa sakramento kanunay, pagtuon sa mga kasulatan, pagpadayon nga nag-ampo aron makasabot sa Iyang pulong, pagtinguha og pagpadayag gikan sa Dios alang sa akong kaugalingon ug sa akong pamilya, pagsunod sa mga sugo sa Dios, pagdawat ug pagtuman sa mga calling sa Simbahan, paghigugma sa uban, pagpakigbahin sa ebanghelyo ngadto sa uban, pagtudlo sa uban aron pangitaon ang ilang mga katigulangan ug sa pagtipig sa ilang kaugalingon nga personal nga mga kasaysayan, ug paghimo ug pagtuman sa sagrado nga mga pakigsaad uban sa Dios.

Gipadala Niya ang Iyang Anak aron mag-antos ug mamatay alang kanako tungod kay Siya nahigugma pag-ayo nako ug gusto nga ako makabalik sa panimalay uban Kaniya aron mopuyo uban Kaniya sa umaabot nga adlaw. Ako walay pagduhaduha nga ang akong inahan nakahibalo niini, ug naglaom ug nag-ampo nga ako kanunay nga mahinumdom ug mopadayon sa pagbuhat sa akong labing maayo.

Moana Piena, Hawaii, USA

“Kay gihigugma pag-ayo sa Dios ang kalibotan, ug tungod niini gihatag niya ang iyang bugtong Anak, aron ang tanan nga motuo kaniya dili malaglag, kondili makabaton hinuon sa kinabuhing dayon” (Juan 3:16).

Akong gibati ang gugma sa Dios sa akong kaugalingong kinabuhi pinaagi sa gitubag nga mga pag-ampo ug sa kalinaw nga akong gibati kon ako magtuon sa mga kasulatan uban sa akong pamilya. Kining personal nga mga kasinatian nagpahinumdom kanako nga ang Dios nakabantay kanako ug nagpakabana mahitungod sa akong kaayohan. Ang plano sa kaluwasan mismo usa ka pagpamatuod sa atong bili diha sa mga mata sa Dios. Siya nag-andam og paagi aron nga kita makabalik ngadto Kaniya ug mahimong sama Kaniya. Kining balaan nga plano nagpakita nga Iyang gihatagan og bili ang atong mahangtoron nga paglambo ug kalipay.

Tingali ang labing dako nga ebidensiya sa gugma sa Dios mao ang Pag-ula ni Jesukristo. Ang atong Manluluwas nag-antos alang sa matag usa kanato sa indibidwal nga paagi, nagpakita nga kita angayan sa kataposan nga sakripisyo. Ako mopamatuod nga ang Dios nahigugma sa matag usa kanato sa lawom ug personal nga paagi. Walay kataposan ang atong bili ngadto Kaniya. Samtang kita mahinumdom niini nga kamatuoran, kita makaatubang sa mga hagit sa kinabuhi uban sa pagtuo ug makakaplag og kamaya sa atong panaw balik ngadto Kaniya.

Alex Lobanov, Tbilisi, Georgia

“Hinumdomi ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10).

Alang nako, matag higayon nga mobati ko nga wala higugmaa o nadismaya sa akong kaugalingon, magsugod ko sa paghinumdom sa kasulatan gikan sa Doktrina ug mga Pakigsaad nga nag-ingon, “Hinumdomi ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Kini nga pahayag gikan sa atong Langitnong Amahan naghatag kanako og dako nga kahupayan. Siya kanunay nga anaa alang kanako, bisan unsa pa ang mahitabo. Ang Iyang gugma mahangtoron, ug dili mahanduraw nga Siya mosakripisyo sa Iyang Anak aron sa pagluwas natong tanan. Kining mahimayaon nga pagpakita sa gugma naghatag kanako og kalig-on aron mabuntog ang tanang babag ug makabangon aron makakonektar Kaniya.

Janette Tam, California, USA

“Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Ang pagkat-on pa og dugang kabahin sa dako nga plano sa kaluwasan ug kahimayaan nakatabang nako nga makahibalo nga ako anak sa Dios. Kon ako magtuon sa Moises 1:39, ako makasabot nga ang Langitnong Amahan adunay dakong tahas nga gihuptan sa akong kinabuhi. Kini naghatag nako og paglaom ug kasegurohan.

Pinaagi sa akong calling ug mga responsibilidad isip bana ug amahan, akong nakat-onan nga ang Dios mao ang akong Amahan ug nahigugma sa tanan Niyang anak. Ang paghimo og mga pakigsaad ug pagtuman niini pinaagi sa matag adlaw nga paghinulsol ug pag-ambit sa sakramento matag semana nakatabang nako nga mobati sa Iyang gugma alang kanako ug sa akong pamilya.

Francis Kikambi Sseremba, Wakiso, Uganda

Nakaila ka ba og bisan kinsa nga kinahanglang pahinumdoman nga sila bililhon kaayo? Pangita og paagi aron mapakigbahin ang gugma sa Dios ngadto sa uban karon!