Magpabiling Konektado ngadto sa Manluluwas

Paghulagway ni David Miles

Usa ka ting-init ang akong pamilya mibakasyon ngadto sa habagatang bahin sa China, diin nagsakay kami og all-terrain vehicles (ATVs) paingon sa usa ka lasang. Sa dihang miabot kami sa ATV camp, nasurprisa kami sa dihang ang mga tiggiya mihatag namo og mga sul-obon nga pang-protekta sa tibuok lawas nga adunay bug-at nga mga helmet ug mga antipara. Murag sobra ra kini alang sa bag-o pa lang nga mga rider diha sa init, alimuot nga adlaw, apan bisan pa man gisul-ob namo kana.

Human madawat ang mga instruksiyon sa pagsakay, miadto na kami ug sa kaulahian miabot sa kinatumyan sa among panaw. Didto mihunong kami aron moinom og tubig ug trapohan ang singot sa among mga nawong.

Ang among tiggiya mipasabot nga ang paglugsong mas lisod. Kinahanglan nga magdug-ol kami ug magporma og ATV nga tren, nga ang matag ATV mag-abot sa atubangan ug sa luyo nga sakyanan aron sa pagpalig-on sa grupo.

Samtang misugod kami sa paglugsong, tawgon namo ang usag usa aron magkoordinar sa among paglugsong. Apan, hinayhinay kami nga nagkalagyo, naghatag og gintang taliwala sa akong sakyanan ug sa ATV nga gisakyan sa akong papa ug sa akong manghod nga igsoong babaye, si Vivi. Sa kalit lang si Vivi ug ang akong papa nalagpot sa ilang sakyanan! Ang akong papa milayat sa pagtabon ni Vivi sa saktong oras aron maprotektahan siya gikan sa ATV nga naligid padulong niya.

Nahupay gyod kami sa dihang nakita namo ang akong papa ug si Vivi nga mibarog ug namapha sa lapok sa ilang mga pantalon. Salamat sa pang-protekta nga kahimanan nga ilang gisul-ob, ang akong papa nakaangkon og gamay lang nga kadaot. Si Vivi nahadlok apan wala ray kadaot. Sa dihang naggrupo kami pag-usab, ang tiggiya mipahinumdom namo sa higpit nga tingog nga kinahanglan nga ang among mga ATV mapabiling konektado kon dili kami gusto nga mobalitok pag-usab sa bungtod.

Sa kinabuhi usahay matental kita sa paghunahuna nga makahimo kita sa mga butang nga kita ra. Naghunahuna kita nga dili na kinahanglan nga magsul-ob og pang-protekta nga hinagiban sa ebanghelyo, nga makapabati nga dilli komportable. Sa samang paagi, maglisod kita usahay sa pagpabiling konektado ngadto sa atong Langitnong Amahan. Kon mapakyas kita sa pagbuhat sa ingon, kita nagrisgo sa pagpanaw sa makahahadlok ug malipoton nga mga dalan sa kalibotan nga kita ra, lagmit makasinati og grabeng espirituwal nga mga aksidente ug mga kadaot.

Kon kita mogamit sa proteksyon nga gitanyag sa ebanghelyo ug magpabiling konektado ngadto sa Langitnong Amahan ug ni Jesukristo, makasugakod kita sa mga hagit nga anaa sa unahan sa atong mga kinabuhi. Bisan unsa pa kahadlok o kakuyaw ang dalan, uban Kanila kita magmalamposon.