Mga Paagi sa Balaang Komunikasyon

Ang pag-ila kon ang Dios nakigsulti nagkinahanglan og hugot nga pagtuo ug pagsalig. Ang hugot nga pagtuo nakagamot kanunay kang Jesukristo. Kinahanglan usab nga kita mosalig Kaniya. Siya miingon:

“Tan-awa, ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing.

Tan-awa, kini mao ang espiritu sa pagpadayag” (Doktrina ug mga Pakigsaad 8:2–3).

Apan ang pagpadayag ug balaan nga direksyon dili moabot gikan sa yanong paghulat alang sa espirituwal nga pagpakita. Kinahanglan gayod kitang molihok. Sama sa gisulti sa akong asawa nako sa akong pakigpulong sa komperensiya, usahay kita kinahanglan lang nga “mosugod.”

Sa dihang si Isabelle ug ako nagserbisyo isip mga lider sa misyon sa France Lyon Mission, kinahanglan kong motino asa ang matag misyonaryo moadto diha sa misyon ug kanus-a mohimo sa pagdestino. Nabantayan nako nga ang Espiritu mogiya nako kon ako nag-ampo alang sa panabang ug dayon mogamit sa akong labing maayong paghukom. Ang kompirmasyon dayon moabot kon ang tanan napahimutang na.

Sa akong kasamtangan nga calling, ipadala ko ngadto sa mga stake sa tibuok Simbahan aron iorganisar pag-usab ang mga kapangulohan sa stake. Samtang ang akong kompanyon ug ako mointerbiyo sa mga indibidwal, kami adunay mga hunahuna, mga pagbati, ug mga impresyon nga moabot namo. Dayon magtinambagay ug mag-ampo kami. Sa kataposan, ang pagpadayag moabot, ug ang Ginoo mokompirma kanamo kinsa ang Iyang tawagon nga moserbisyo.

Usa kini ka proseso sa pag-ila kon mamulong ang Dios ug sa pagdiskobre sa Iyang kabubut-on. Kinahanglan nga atong ipakita nga kita andam nga molihok inubanan sa hugot nga pagtuo ug pagsalig.

Usa sa importante nga paagi nga ang Dios mamulong ngadto sa Iyang mga anak mao ang pinaagi sa mga propeta. Ang pagbaton og propeta dinhi sa yuta karon usa ka importante nga mga balita! Siya makadawat og pagpadayag gikan sa Dios sa pagpangulo ug paggiya sa Simbahan (tan-awa sa Amos 3:7). Makadawat usab kita og giya ug panalipod pinaagi sa pagsunod sa iyang mga pagtulun-an. Dili kini sayon kanunay, apan ang Ginoo misugo nato sa pagsunod sa propeta “sa tumang pagpailob ug pagtuo” (Doktrina ug mga Pakigsaad 21:5).

Ang “Ang Pamilya: Usa ka Pamahayag ngadto sa Kalibotan,” pananglitan, naprobahan nga mapanagnaon sukad sa pagpaila niini 30 ka tuig na ang milabay. Naghisgot kini sa mga kabalaka nga wala nato mahibaloi nga moabot kanato ug naghatag kini og giya nga wala nato mahibaloi nga atong kinahanglanon—apan karon nakahibalo na kita kon nganong gihatag kini. Ang giya sa propeta tingali dili kanunay maoy atong gusto nga madunggan. Tingali wala kini mohaom sa kasamtangang mga hiyas sa katilingban. Bisan pa man, kita magiyahan ug mapanalipdan kon kita mosunod sa propeta.

Sukna og mga Pangutana ug Tinguhaa ang mga Tubag

Sa unang mga adlaw sa pagpahiuli, ang Dios kanunay nga mamulong agig tubag sa sinsero nga mga pangutana ni Propeta Joseph Smith ug sa uban. Samtang si Joseph ug si Oliver Cowdery nagtrabaho sa paghubad sa Basahon ni Mormon, miabot sila sa mga pagtulun-an sa Manluluwas bahin sa doktrina sa bunyag (tan-awa sa 3 Nephi 11:23–33). Nagtinguha sila nga makat-on pa og dugang ug miadto sa kakahoyan aron mag-ampo. Sa wala madugay, si Juan Bautista mipakita ug mipahiuli sa awtoridad sa pagbunyag pinaagi sa pagpaunlod alang sa kapasayloan sa mga sala.

Sa laing higayon, ang asawa ni Joseph, si Emma, mipadayag og kabalaka mahitungod sa kahugaw nga gibilin sa mga lalaki nga manabako ug mag-usap og tabako atol sa mga miting. Gisulti ni Joseph ang problema ngadto sa Ginoo ug nakadawat og pagpadayag—“ang Pulong sa Kaalam” (Doktrina ug mga Pakigsaad 89:1)—bahin sa makahimsog nga mga binuhatan alang sa pisikal ug espirituwal nga kaayohan sa mga anak sa Dios.

Kini nga mga sitwasyon—ug daghan pa—nagpahinumdom nato nga OK ra nga adunay mga pangutana basta magtinguha lang kita og mga tubag sa sakto nga direksyon. Kon ipangutana nato ang atong mga pangutana ngadto sa Ginoo, makakita kita og mga tubag. Usahay ang mga tubag moabot dihadiha dayon. Apan, sa kasagaran, ang mga tubag moabot “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30). Mahimong magkinahanglan kitang mohulat sa mga tubag aron matabangan kitang makat-on ug motubo, apan ang Dios motubag kanato sumala sa Iyang kaugalingong kabubut-on, pamaagi, ug gitakdang panahon.

Kon kita kinahanglan nga mohulat sa Dios nga mamulong kanato, importante nga kita kinahanglan nga maningkamot sa paghinumdom sa unsay atong nahibaloan ug sa kasinatian nga atong nasinati. Kondili mawala kini gikan kanato. Dili kita gusto nga magduhaduha sa miaging mga kasinatian uban sa Espiritu tungod lang kay nakigbisog kita karon. Nianang mga gutloa, kinahanglan natong balikan sa atong mga hunahuna ug hinumdoman unsay atong gibati sa dihang mibati kita nga duol sa Dios.

Sa makausa si Alma nangutana niining makapahunahuna nga mga pangutana ngadto sa katawhan sa Zarahemla:

“Kamo ba sa espirituhanon nga paagi natawo ba sa Dios? Kamo nakadawat ba sa iyang hitsura diha sa inyong mga panagway? Nakasinati ba kamo niining dako nga kausaban diha sa inyong mga kasingkasing? …

“Ug karon tan-awa sultihan ko kamo akong kaigsoonan, kon nakasinati ba kamo og kausaban sa kasingkasing, ug kon mibati ba kamo sa pag-awit sa awit sa matubsanon nga gugma, mangutana ko, mibati ba kamo niini karon?” (Alma 5:14, 26).

Kinahanglan nga seguroon nato nga nahinumdoman nato ang espirituhanon nga mga kasinatian ug dili kini ibaliwala. Kinahanglan nga pangutan-on nato ang atong mga kaugalingon kanunay, “Mibati ba ako niini karon?” Kini naglig-on nato sa mga panahon kon ang Dios ingon og nagpakahilom. Mas makahibalo usab kita sa mga panahon kon Siya mamulong kanato.

Ang komunikasyon ngadto sa atong Langitnong Amahan usa ka butang nga nagkinahanglan og paningkamot aron mapabiling buhi. Buhaton nato ang atong bahin nga magpadayon kini nga madasigon pinaagi sa aktibong pagpangita ug paghimo og mga oportunidad alang sa balaan nga komunikasyon. Makahimo kita og kanunay ug mainitong pag-ampo ngadto sa Dios alang sa kalinaw, kahupayan, ug giya. Makatuon kita sa Iyang pulong diha sa mga kasulatan ug mobati sa impluwensiya sa Espiritu. Makasunod usab kita sa mapanagnaon nga giya.

Samtang magpabilin kita nga konektado sa atong mahigugmaong Amahan sa Langit, mahimo kitang mga instrumento sa Iyang mga kamot sa pagtabang Kaniya sa Iyang talagsaong buhat. Pinaagi sa pagpatalinghog sa mga panabot ug mga pag-aghat nga atong madawat, makatabang kita sa uban nga mobati nga ang Dios nakaila ug nahigugma kanila ug nagtinguha sa pagpamulong ngadto kanila.

Ang kaseguroan nga ang Dios naminaw ug namulong ngadto sa Iyang mga anak usa ka dako kaayo nga panalangin. Ang kanunay nga balaan nga komunikasyon ngadto Kaniya naghatag og direksiyon nga gikinahanglan nato sa pagnabigar sa panaw sa kinabuhi.