Ang Hingpit nga Kalipay ug Kamahinungdanon sa mga Pamilya

“Ang akong mga anak, akong mga apo, ug akong mga apo sa tuhod … kabahin sa labing dakong kalipay sa akong kinabuhi.

“Samtang kamo maghimo og mga desisyon mahitungod sa inyong kinabuhi ug sa inyong pamilya—o inyong umaabot nga pamilya—palihog hinumdomi nga ang labing labaw nga mga bahandi sa yuta ug sa langit mao ang atong mga anak ug ang atong kaliwatan.

“Ako mohatag og pasalamat kada adlaw ngadto sa mahigugmaon nga Amahan sa Langit nga mipanalangin kanako niini nga pamilya nga gihigugma kaayo nako.”

“Ngadto sa mga inahan sa tanang dapit kinsa nagsakripisyo alang sa ilang pamilya, ako gustong mosulti … nga ang inyong sakripisyo nahibaloan na—sa mga lider sa Simbahan ug sa atong Amahan sa Langit kinsa nagtinguha kanunay sa pag-atiman sa Iyang mga anak.

“Kon kining kalibotanong yugto sa atong kinabuhi mahuman na ug ang tanang dungog sa kalibotan mahanaw na, nagtuo ko nga tingali ang matarong nga mga inahan ang unang makadungog sa mga pulong, ‘Maayo! Buotan ka ug matinumanon nga sulugoon: … sulod ngari ug ambit sa akong [kapahulayan]’ (Mateo 25:21).”

“Bisan kon ang nag-unang mga tuig sa akong kinabuhi mahagiton tungod sa gubat ug sa kauban nga mga kabalaka niini, ako napanalanginan og maayo nga mahimong kabahin sa usa ka pamilya nga naghigugma kanako. …

“Atol niadtong nag-una nga mga tuig, ang akong pamilya wala mapailaila sa gipahiuli nga ebanghelyo ni Jesukristo. Lisod kaayo kadto nga panahon. Apan aduna pa gihapon akoy pipila ka malipayon nga mga handomanan niini nga mga dapit tungod sa gugma sa pamilya, kahigalaan, ug mga silingan.

“Tingali ang pipila ninyo nga mga ginikanan (o kadtong sa umaabot mahimong mga ginikanan) mabalaka mahitungod sa kalibotan diin inyong gipadako ang inyong mga anak. Mahimo tingali ko nga mosugyot nga kon kamo motutok sa pagpadako sa inyong mga anak nga may Kristohanon nga gugma ug sa pagtudlo kanila sa paghigugma sa Amahan sa Langit ug sa Manluluwas nga si Jesukristo, sila mahatagan og abilidad nga makalatas sa tanan nga hagit sa kinabuhi. Sila mahimong mobati sa kamaya ug kalinaw nga nagagikan sa pagpuyo sa ebanghelyo sa Manluluwas bisan pa man sa mga kalisod.”

“Ang mahangtorong kaminyoon ug mahangtorong mga pamilya posible tungod sa mga pakigsaad nga atong gihimo ngadto sa Dios diha sa Iyang balaan nga mga templo. Ako modapit natong tanan nga himoon nga prayoridad ang kaminyoon sa templo. Ang tanan nga andam sa paghimo og mga pakigsaad ngadto sa Dios ug ngadto sa usag usa gidapit sa pag-apil sa mga ordinansa sa templo nga mohiusa sa pagbugkos kanato. Ang mga pamilya, sa pagkatinuod, mahangtoron ug maoy sentro sa plano sa Dios.”

“Ang plano sa atong Amahan kalabot sa mga pamilya. Ang kahangtoran dili mahimong sama ka malipayon kon wala sila. …

“Ako moseguro kaninyo nga kon kamo minyo o dili minyo, adunay dako nga pamilya o gamay nga pamilya, kamo kabahin gihapon sa pamilya sa Ginoo. Ako nagmaya nga ang halangdong plano sa kaluwasan igo ang gidak-on alang sa tanang anak sa Langitnong Amahan. Ug labi nga mapasalamaton gayod ko nga ang plano sa Dios naghatag og paagi alang sa mga relasyon sa pamilya nga magpadayon human sa kamatayon. Ako nagpamatuod nga kon kita mobalik ngadto sa presensiya sa Dios, kita mahiusa sa kahangtoran uban niadtong atong labing gimahal.”

“Daghang batan-ong mga magtiayon ang nabalaka mahitungod sa pagpadako og mga anak sa kahimtang sa atong kalibotan karon.

“Pipila ka tuig ang milabay, usa sa among minyo nga anak nga babaye ug ang iyang bana nangutana ni Sister Rasband ug nako og usa ka importante, makaimpluwensiya sa kinabuhi nga pangutana:

‘Luwas ug maalamon pa ba gihapon nga magkaanak dinhi niining daotan ug makahahadlok nga kalibotan nga atong gipuy-an?’ Ang among tubag kanila walay duha-duha nga ‘Oo, mas labaw pa sa OK,’ samtang among gipakigbahin ang sukaranan nga mga pagtulun-an sa ebanghelyo ug ang among kinasingkasing nga mga impresyon ug mga kasinatian sa kinabuhi.

“Ang Ginoo nasayod nga adunay mga higayon nga kita mobati og kahadlok. Nakasulay na ako niana ug kamo usab.

“Ang Ginoo nagtudlo kanato diha sa mga kasulatan, ‘Ayaw kahadlok, kay mag-uban ako kanimo: ayaw kabalaka; kay ako mao ang imong Dios: lig-onon ug tabangan ko ikaw, panalipdan ug luwason’ (Isaias 41:10).

“Ang among anak nga babaye ug umagad seryoso nga gihunahuna ang among panag-istorya, nag-ampo sila ug nagpuasa ug miabot sa ilang kaugalingong mga desisyon. Kalipay alang nila—ug kanamo nga mga apohan—ang among anak nga babaye karon inahan na sa pito ka matahom nga mga anak.

“Oo, nagpuyo kita sa malisod nga panahon, apan kon kita magpabilin sa dalan sa pakigsaad, dili kita kinahanglan nga mabalaka. Nag-ampo ako nga samtang ato kining buhaton, dili kita mabalaka sa mga panahon diin kita nagpuyo o sa mga kabalaka nga moabot sa atong dalan.”

“Sa kataposang pipila ka buluhaton sa pagpakigpulong, mibati ko og pag-aghat nga iapil ang panghunahuna nga ang atong mga calling, trabaho, edukasyon, ug ubang bililhon nga mga tinguha gituyo aron sa pagpanalangin sa atong mga relasyon—atong mga relasyon uban sa Dios, pamilya, ug sa usag usa. Si Presidente Russell M. Nelson nagtudlo, ‘Ang dalan sa pakigsaad mahitungod gayod sa atong relasyon uban sa Dios.’ Kining nagkalain-lain nga mga aspeto sa atong kinabuhi mao ang pamaagi alang niana nga kataposan, sa pag-amuma ug pagpanalangin sa mahangtoron nga mga relasyon.

“Ang atong mga tawag sa pagserbisyo ug ang mga panalangin nga gihatag sa atong mga pamilya mas dugang nga gibalikos kaysa atong mabantayan. Dili nato mabulag ang duha. Sama sa gitudlo nato sa kasulatan diha sa Marcos sa baroganan nga ‘ang Adlawng Igpapahulay gibuhat alang sa tawo, apan wala buhata ang tawo alang sa Adlawng Igpapahulay’ (Marcos 2:27), ang atong mga calling, mga tahas sa pagpangalagad, trabaho, ug edukasyon gituyo aron sa pagpanalangin kanato ug sa atong relasyon sa pakigsaad uban sa Dios—ug, ingon man, sa tanang uban pa nato nga mga relasyon.

“… Kon kita motan-aw niini nga mga bahin sa atong kinabuhi isip mga pamaagi nga gitinguha sa Dios aron sa pagpanalangin sa atong relasyon Kaniya ug sa uban, kita makadawat og balaan nga pag-awhag, direksiyon, panabot, kalig-on, kalipay, ug kalinaw.

“Nahigugma kami kaninyo ug nag-ampo nga kamo mapanalanginan samtang kamo mopalambo sa inyong personal nga relasyon sa pakigsaad uban sa Dios.”

“Pito ka tuig human sa iyang kamatayon, nakadawat ko og text gikan sa akong anak nga lalaki—o ingon ana ang nahitabo.

“Ang akong tin-edyer nga apo nga lalaki (iyang anak) mao pa ang pagsaulog sa iyang adlawng natawhan ug gihatagan sa karaan nga phone sa iyang papa isip regalo.

“Ug wala pa gihapon nako ma-update ang impormasyon sa mga kontak.

“Nakuryoso nga makita kon unsa ang among gipanagsultihan sa akong anak sa kataposang mga adlaw sa iyang kinabuhi, nagsugod ko sa pag-scroll subay sa nangaging mga text.

“Nakakita ko og daghang mubo nga mga mensahe mahitungod sa mga sugo ug mga kalihokan sa pamilya. Naguol ko sa dihang dugay pa kaayo usa pa ko makakita og text nga yanong nag-ingon og, ‘Gihigugma ko ikaw.’

“Nakahibalo ko nga siya nakahibalo nga gihigugma nako siya, apan naghunahuna ko kon napakyas ba ko sa pagsulti niini sa kataposang higayon.

“Sukad niadto, naningkamot ko sa pagtapos sa matag text og ‘Salamat’ o ‘Gihigugma ko kaayo ikaw.’

“Gusto ko nga KAMO mohunong karon dayon ug tan-awa ang INYONG mga text.

“Usahay kita bisi na kaayo sa pag-istorya sa usag usa sa dinalian nga mga butang nga kita makalimot sa pagsulti sa labing importante nga butang: Gihigugma ko ikaw.

“Ako modapit kaninyo sa pag-text o pagsulti sa mga tawo nga inyong gihigugma ug gikauban og puyo kon unsa kamo nagpangga kanila.

“Dili na kita maghulat pa og lain nga segundo aron pahibaloon sila unsa sila kaimportante nato.

“Pag-text nila. Sultihi sila.

“Mosaad ko nga dili kamo magmahay niini!

“‘Mga hinigugma, maghigugmaay kita ang usa sa usa: kay ang gugma iya sa Dios’ (1 Juan 4:7).”

Sister Tamara W. Runia, Facebook, Hulyo 23, 2024, facebook.com/youngwomenworldwide.