Digital Lamang
Usa ka Bag-ong Pagsugod—Sa Unsang Paagi nga ang Kalipay sa Paghinulsol Miusab sa Akong Kinabuhi
Ang tagsulat nagpuyo sa Papeete, Tahiti.
Wala gyod ko magplano nga magpabunyag, apan sa dihang nakat-onan nako ang mahitungod sa gasa sa paghinulsol, nausab ang tanan.
Sa dihang 16 pa ko, gitugotan ko sa akong mama nga makigkita sa mga misyonaryo apan giingnan ko nga dili gyod ko mabunyagan. Mikatawa ko. Dili na siya kinahanglan nga mosulti nako niana. Nakahibalo na ko nga dili ko gustong magpabunyag.
Sa sinugdanan nakigkita ra ko sa mga misyonaryo isip respeto lang. Usa ka higala ang nangutana nako kon interesado ba ko nga makig-istorya nila, ug misugot ko kay dili ko gusto nga mahiubos siya.
Nagpadayon ko sa pagpakigkita sa mga misyonaryo apan wala nako seryosoha ang ilang mga leksiyon, tungod kay nakahibalo ko nga ang bunyag dili opsiyon alang nako.
Usa ka Puasa ug Usa ka Milagro
Sa dihang ang mga misyonaryo sa kataposan midapit nako nga magpabunyag, miingon ko nga ang akong mama dili motugot niini. Ang papa sa akong higala misugyot nga magpuasa mi ug mohangyo sa Langitnong Amahan nga motabang aron mapahumok ang kasingkasing sa akong mama.
Dili ko kumbinsido nga ang pagpuasa mopausab sa kasingkasing sa akong mama, apan miuyon ko nga mosulay. Ang pamilya sa akong higala, ang mga misyonaryo, ug ako nagpuasa aron motugot ang akong mama nga mabunyagan ko.
Wala madugay human sa among pagpuasa, ang akong mama ug ako nagdungan og panihapon. Sa wala lang damha, milingi siya nako ug miingon, “Kabalo ka, kon ganahan ka nga magpabunyag, imo na kana nga desisyon.”
Dili ko makatuo sa akong nadungog.
Miusab siya sa pag-ingon. “Mahimo ka na nga magpabunyag.”
Nataranta kaayo ko. Dili na nako pwedeng gamiton nga rason ang akong mama nganong dili ko magpabunyag. Kinahanglan gyod ko nga modesisyon sa akong kaugalingon. Nagsugod ko sa pagpaminaw sa mga misyonaryo nga adunay bukas nga panghunahuna.
Usa ka Kahigayonan nga Matawo Pag-usab
Sa dihang nagsugod ko sa pagpaminaw sa mga leksiyon sa mga misyonaryo nga adunay tinuod nga katuyoan, misugod ko sa pagbati sa gugma sa Dios. Kini miabot isip usa ka pagbati sa kalinaw ug kasegurohan. Tungod sa gugma nga akong gibati alang Kaniya, dili nako makaya ang paghunahuna nga mahimong hugaw sa Iyang atubangan. Andam ko nga mobiya sa tanan nga wala mahisubay sa mga sugo sa Dios.
Nakahinumdom ko nga naghunahuna, “Unta mahimo pa nakong balikon ang akong kinabuhi.”
Mao nga sa dihang ang akong higala kaswal nga nakahisgot nga ang bunyag sama nga matawo pag-usab (tan-awa sa Mosiah 27:25), dili nako hapit mapugngan ang akong kahinam. Nasayod ko unsay angay nakong buhaton.
Nabunyagan ko ug nakaserbisyo og misyon sa Canada aron matabangan ang ubang mga tawo nga makaplagan ang sama nga kalipay nga akong nakaplagan diha sa ebanghelyo ni Jesukristo.
Ang Hingpit nga Kalipay sa Matag Adlaw nga Paghinulsol
Ang hingpit nga kalipay nga akong gibati sa dihang nabunyagan ko dili usa ka higayon lang nga pagbati. Bation gihapon nako kana nga malinawon, limpyo nga pagbati matag higayon nga mag-ampo ko alang sa kapasayloan.
Si Presidente Russell M. Nelson mitudlo:
“Walay laing mas makapagawasnon, mas makapahamili, o mas importante sa atong kaugalingong paglambo kay sa kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. …
“… Atong tugotan ang Manluluwas nga mousab kanato ngadto sa labing maayo nga bersyon sa atong mga kaugalingon.”
Ang matag adlaw nga paghinulsol nagdala kanako og grabe nga kalipay. Mibati ko og kalinaw sa pagkahibalo nga ang Dios nahigugma kanako bisan kon ako dili hingpit. Akong maatubang ang umaabot nga adunay paglaom tungod kay nakahibalo ko nga matag higayon nga ako maghinulsol nga dunay tinuod nga katuyoan, mapasaylo ko (tan-awa sa Moroni 6:8).