“Gitugahan og Gahom gikan sa Kahitas-an,” Liahona, Mar. 2025.
Makasaysayanon nga mga Panglantaw bahin sa Balay sa Ginoo
Gitugahan og Gahom gikan sa Kahitas-an
Sama sa mga disipulo sa Bag-ong Tugon, ang mga Santos sa Ulahing mga Adlaw gisaaran nga tugahan og gahom gikan sa Ginoo.
Sa tingpamulak sa 1836, si Charles Rich usa ka misyonaryo nga nagsangyaw sa gipahiuli nga ebanghelyo didto sa habagatang bahin sa Ohio. Nasagmuyo siya nga miabot sa Kirtland, Ohio, pagka-Abril 12—mga duha ka semana human sa pagpahinungod sa Templo sa Kirtland.
Mibiyahe siya sakay sa bapor subay sa Suba sa Ohio ug dayon naglakaw og dul-an sa 100 ka milya (160 km). Nakita niya ang balay sa Ginoo sa ibabaw sa bukid sa talan-awon nga adunay asul nga mga bungbong ug pula nga atop niini. Apan naulahi na siya. Wala siya makatambong sa pagpahinungod, sa maligdong nga katigoman, ug, naghunahuna siya nga wala usab maabti ang gisaad nga pagtuga og gahom gikan sa kahitas-an.
Sa Septiyembre 1830, pipila ka bulan human maorganisar ang gipahiuli nga Simbahan, si Joseph Smith nakadawat og pagpadayag gikan ni Jesukristo nga nanawagan sa mga miyembro nga magpundok (tan-awa sa Doktrina ug mga Pakigsaad 29:7–8). Pipila ka bulan ang milabay, ang Ginoo mipadayag kon ngano. Ang mga Santos kinahanglang “moadto sa Ohio,” diin, si Jesus mipahayag, “akong ihatag kaninyo ang akong balaod; ug didto kamo pagatugahan og gahom gikan sa kahitas-an; ug gikan didto, kon si kinsa man ang akong tugotan moadto sa tanang kanasoran” (Doktrina ug mga Pakigsaad 38:32–33). Ang mga miyembro sa Simbahan nga nakadungog niini nga pagpadayag moila niini nga pinulongan nga nagagikan sa Bag-ong Tugon.
Mga Disipulo sa Bag-ong Tugon Gitugahan og Gahom
Ang Lucas 24 nagsugod sa usa ka gutlo sa kawalay paglaom. Si Jesus gilansang sa krus, ug ang usa ka grupo sa Iyang mga disipulo nga mga babaye mibalik ngadto sa Iyang lubnganan. Ilang nakita nga ang bato nga pultahan naligid na, ug “wala nila hikit-i ang lawas sa Ginoong Jesus” (bersikulo 3). Dayon ang anghel nga mga mensahero mihatag nila og paglaom: “Wala na siya dinhi! Nabanhaw siya!” (bersikulo 6).
Unya, ang nabanhaw nga Ginoo nagpakita sa Iyang mga disipulo ug nangalagad kanila. Siya mihatag nila sa unsay nailhan sa mga Kristiyano sa tibuok kalibotan nga “ang Dakong Mando” nga isangyaw ang ebanghelyo ni Jesukristo. Si Jesus mipasabot nga “isangyaw pinaagi sa iyang ngalan ang mensahe mahitungod sa paghinulsol ug sa pagpasaylo sa mga sala ngadto sa tanang mga nasod” (bersikulo 47).
Hinuon, gimandoan Niya ang Iyang mga disipulo nga dili mobiya dihadiha dayon: “Kinahanglan maghulat kamo dinhi sa siyudad hangtod nga mokunsad kaninyo ang gahom gikan sa kahitas-an” (bersikulo 49). Mokunsad (o “gitugahan” sa moderno nga Iningles) mao ang hubad sa Griyego nga pulong nga nagpasabot nga “sul-oban.” Ang karaang mga disipulo ni Kristo kinahanglang maghulat sa Jerusalem hangtod nga sila masul-oban sa gahom gikan sa kahitas-an. Dayon kinahanglan nilang itukod ang gingharian sa Ginoo sa tibuok kalibotan.
Sa wala pa Siya mokayab ngadto sa langit, ang Ginoo miingon sa Iyang mga disipulo, “Kinahanglan maghulat kamo dinhi sa [Jerusalem] hangtod nga mokunsad kaninyo ang gahom gikan sa kahitas-an” (Lucas 24:49).
Mga Santos sa Ulahing mga Adlaw Gitugahan og Gahom
Ang mga Santos sa Ulahing mga Adlaw nagpundok sa Ohio niadtong mga 1830 nga adunay susama nga tumong. Naghinamhinam sila nga “matugahan og gahom gikan sa kahitas-an” (Doktrina ug mga Pakigsaad 38:32) ug madala ang mensahe ni Jesus ngadto sa tibuok kalibotan. Wala madugay, ang Ginoo mipahayag nga ang mga Santos “kinahanglan nga makadawat sa ilang mga pagtuga gikan sa kahitas-an diha sa akong balay” (Doktrina ug mga Pakigsaad 105:33; tan-awa usab sa mga bersikulo 11–12). Sa gihapon, kadaghanan sa nahaunang mga Santos wala gayod masayod kon unsa ang angay nga paaboton.
Wala madugay human sa pagtawag ug pag-orden sa Korum sa Napulog Duha ka Apostoles niadtong 1835, si Joseph Smith nakigmiting nila mahitungod sa balay sa Ginoo. Si Joseph nakamatikod nga ang Napulog Duha “nabalaka” ug wala makasabot sa unsay moabot. Iyang gipasabot nga nagkinahanglan sila og pagtuga aron sila “maandam ug makabuntog sa tanang butang” ug makatudlo sa ebanghelyo nga adunay gahom. “Kon kamo matugahan,” siya mipasabot, ang Apostoles “mosangyaw sa ebanghelyo ngadto sa tanang nasod, kaliwatan, ug pinulongan.”
Wala madugay human niana, si Joseph Smith mipadayag og mga seremonya nga gisunod sumala sa pagpahinungod sa karaang Israelita nga mga pari sa templo. Agi og pagpangandam alang sa pagtuga, ang matag opisyal sa pagkapari gihugasan ug gidihogan “sa samang matang sa lana ug sa paagi sama nila ni Moises ug Aaron, ug kadtong kinsa nagbarog sa atubangan sa Ginoo sa karaang mga adlaw.”
Niining higayona, ang pagtuga og gahom naglangkob og talagsaong pagbu-bo sa espirituhanong gahom atol sa usa ka espesyal nga miting sa maligdong nga katigoman. Sama ni Elijah Able—ang unang Itom nga Seventy sa Simbahan—ang opisyales sa pagkapari nagpuasa, nag-ampo, ug nangaon sa sakramento sa Panihapon sa Ginoo agi og panagsalo sa pagkaon. Sila nagpamatuod ug nanagna, ug ang Dios mipanalangin nila og gahom. Kadtong natugahan gipalakaw aron itukod ang gingharian sa Dios pinaagi sa pagsangyaw sa gipahiuli nga ebanghelyo. Bisan pa sa oposisyon, sila gipanalipdan diha sa ilang mga pagbiyahe, gipalambo diha sa ilang pagsangyaw, ug gipanalanginan diha sa ilang mga pamilya.
Sa Kirtland, ang kalalakin-an lamang ang gipaapil sa miting sa maligdong nga katigoman diin sila gitugahan og gahom gikan sa kahitas-an. Hinuon, sa pipila ka tuig, ang mga Santos mitukod sa Templo sa Nauvoo. Didto si Joseph Smith mipadayag og gipalapdan nga mga seremonya sa templo nga mao ang pundasyon sa atong kasinatian sa templo karon. Sa Nauvoo, ang kababayen-an ingon man usab ang kalalakin gitugahan og gahom.
Namulong ngadto sa mga sister sa Relief Society, si Joseph Smith misaad nga sa pagtuga diha sa templo “ang mga yawe sa gingharian” “ihatag ngadto kanila,” “sama ngadto sa mga Elder.” Bisan og pipila pa kini ka dekada una pa gitawag ang kababayen-an isip tigsangyaw nga mga misyonaryo, ang kababayen-an ug ang ilang paghago nahimo nang mahinungdanon sa pagtukod sa gingharian sa Dios dinhi sa yuta.
Bisan kon si Charles Rich wala makatambong sa pagpahinungod sa Templo sa Kirtland, iyang nahibaloan nga siya ug ang pipila sa ubang mga misyonaryo nga naulahi nga miabot sa Kirtland makasinati sa pagtuga. Sumala sa sumbanan sa karaang Israelita nga mga pari (tan-awa sa Exodo 29; 40), siya gihugasan ug gidihogan. Siya mipundok kuyog sa uban, nagpuasa, nag-ampo, ug nangaon sa Panihapon sa Ginoo.
“Nanagna kami sa tibuok gabii,” si Charles misulat. “Gipanagna kini nga ang kaluwasan nahisulat diha sa matag bukton ug lutahan” sa iyang lawas. “Napuno ako sa espiritu sa panagna, ug ako natugahan og gahom gikan sa kahitas-an.”
Iyang gigahin ang nahibilin niyang kinabuhi—47 ka tuig—sa paghago isip usa ka disipulo ni Jesukristo, sa pagtukod sa gingharian sa Dios.
Sukad nianang panahona, ang mga Santos sa Ulahing mga Adlaw sa tibuok kalibotan mobiyahe ngadto sa balay sa Ginoo aron matugahan og gahom gikan sa kahitas-an. Ug sama niining nahaunang mga Santos, ang pagtuga nag-andam nato sa pagtukod sa gingharian sa Dios isip mga disipulo ni Jesukristo ug moabot ang adlaw madawat ang kahimayaan pinaagi sa Iyang kaluoy ug grasya.