Ang Langitnong Amahan Gusto nga Makigsulti Kaninyo

Ngadto ni Adan ug ni Eva ug sa tanang mosunod nila, ang anghel mitudlo, “Ikaw maghinulsol ug motawag sa Dios diha sa ngalan sa Anak hangtod sa kahangtoran” (Moises 5:8).

Si Jesus nagtudlo: “Pangayo ug kamo hatagan; pangita ug kamo makakaplag; panuktok ug ang pultahan ablihan alang kaninyo” (Mateo 7:7). “Kon mag-ampo ka, … pag-ampo ngadto sa imong Amahan … nga dili makita” (Mateo 6:6). “Ingna hinuon niini pag-ampo: Amahan namo nga anaa sa langit, Balaanon ang imong ngalan” (Mateo 6:9).

Si Jesus kanunay nga nag-ampo ngadto sa Iyang Amahan. “Mitungas si Jesus sa usa ka bungtod aron [sa] pag-ampo ug sa tibuok gabii nag-ampo siya sa Dios” (Lucas 6:12). “[Ug] … mitungas siya sa usa ka bungtod aron sa pag-ampo” (Marcos 6:46). “Miabot si Jesus sa tanaman sa Getsemane uban sa iyang mga tinun-an ug miingon siya kanila, “Panglingkod kamo dinhi samtang mag-ampo ako” (Marcos 14:32). Samtang anaa sa krus, si Jesus nag-ampo alang sa mga sundalo nga milansang Kaniya: “Amahan, pasayloa sila kay wala sila mahibalo sa ilang gibuhat” (Lucas 23:34).

Ang mga kasulatan nagtambag nato sa “pag-ampo kanunay” (Lucas 21:36; 2 Nephi 32:9; 3 Nephi 18:15; Doktrina ug mga Pakigsaad 10:5; 19:38; 20:33; 31:12). “Pagpakitambag sa Ginoo sa tanan nimong buhaton, ug moagak siya kanimo alang sa kaayohan” (Alma 37:37). Agi og dugang, kita “mopahinungod sa tanang pasalamat ug pagdayeg nga [atong] gibati pinaagi sa tibuok kalag nga paningkamot” (Mosiah 2:20), nga nag-ila sa tanang gihimo sa Amahan alang nato.

Si Presidente Russell M. Nelson mipasabot: “Ang espirituhanong pagtamod sa kaugalingon magsugod sa pagkaamgo nga ang matag bag-ong kabuntagon usa ka gasa gikan sa Dios. … Siya nanalipod kanato sa adlaw-adlaw ug nagsuporta kanato sa matag gutlo (tan-awa sa Mosiah 2:21).”

Si Nephi miingon, “Kay kon kamo mopatalinghog sa Espiritu nga motudlo sa usa ka tawo sa pag-ampo, inyong mahibaloan nga kamo kinahanglan nga mag-ampo; kay ang daotang espiritu dili motudlo sa usa ka tawo sa pag-ampo, apan motudlo kaniya nga siya dili gayod mag-ampo” (2 Nephi 32:8).

Detalye gikan sa Christ Raising the Daughter of Jairus [Si Kristo Mibuhi sa Anak nga Babaye ni Jairo], ni Greg K. Olsen

Pinaagi sa ehemplo sa atong Manluluwas ug sa tambag sa mga anghel ug sa mga propeta latas sa mga siglo, klaro natong nasayran ang pag-ampo kada adlaw aron ipahayag ang atong pasalamat alang sa atong mga panalangin, ug aron padayong magbaton og pag-ampo sulod sa atong kasingkasing kanunay. Kita adunay responsibilidad sa pagpakigsulti sa atong Amahan.

Apan gani ang mas mahimayaon, ang atong Amahan sa Langit motubag sa atong mga pag-ampo. Ang mahunahunaong pangutana niining mortal nga kalibotan mao, kon unsaon nato nga mas madawat ug mas masabtan ang mga tubag, direksiyon, ug kahupayan nga nagagikan sa atong Amahan?

Sa akong sobra sa pito ka dekada sa akong kinabuhi, ako nasayod nga ang Amahan makigsulti kanato. Wala kita mag-inusara. Ang langitnong mga binuhat nagbantay nato ug nagtabang nato kon kita nagtinguha sa pagsunod sa Manluluwas.

Ang pagdawat og mga tubag sa atong mga pag-ampo magsugod sa atong hugot nga pagtuo diha sa atong Langitnong Amahan ug diha sa Iyang Anak, si Jesukristo. Si Jesus miingon, “Ayaw kahadlok! Salig lang” (Marcos 5:36). Mosalig kita Kaniya, mohimo sa atong labing maayo sa pagsunod sa mga sugo, ug mangita sa Iyang impluwensya diha sa tanang butang. “Walay butang nga ang tawo makapasakit sa Dios … gawas niadto kinsa dili mokumpisal sa iyang [impluwensya] diha sa tanan nga mga butang, ug wala mosunod sa iyang mga sugo” (Doktrina ug mga Pakigsaad 59:21).

Ang impluwensya sa Dios sa atong kinabuhi wala magpasabot nga Iyang gitugotan ang daotan o grabe nga mga trahedya nga anaa sa atong kalibotan. Hinuon, nagpasabot kini nga sa panahon sa inyong kalisdanan ug kawalay kaangayan, Siya mosuporta ninyo, molig-on sa inyong abilidad, mohupay ninyo, ug “[mopahinungod sa] imong mga kasakit alang sa imong kaayohan” (2 Nephi 2:2).

Kon kita adunay hugot nga pagtuo diha Kaniya ug mosunod sa Iyang mga sugo, natural lang nga makakat-on kita nga mas maminaw sa Iyang tingog.

Niadtong Septiyembre 1993, ang akong unang tuig isip Kinatibuk-ang Awtoridad, si Presidente James E. Faust (1920–2007), nianang higayona usa ka sakop sa Korum sa Napulog Duha ka Apostoles, midapit sa akong asawa, si Kathy, ug kanako nga motambong sa usa ka debosyonal sa Brigham Young University uban niya. Hinumdomi, niadtong 1993 wala pay nagkatap nga mga smartphone, social media, ug internet.

Sa iyang pakigpulong, nga giulohan og “The Voice of the Spirit [Ang Tingog sa Espiritu],” si Presidente Faust mipasidaan: “Sa inyong henerasyon pagatentalon kamo sa nagkadaiyang mga tingog nga magsulti ninyo kon unsaon sa pagpakabuhi, unsaon pagtagbaw sa inyong mga gitinguha, unsaon nga makabaton niining tanan. Makabaton kamo og hangtod sa lima ka gatos ka channel sa telebisyon sa sayon kaayo nga paagi. Maanaa ang tanang matang sa mga software, interaktibo nga mga mode sa kompyuter, mga database, ug mga bulletin board; adunay mga desktop publishing, mga satellite receiver, ug mga network sa komunikasyon nga mapuno na kamo sa impormasyon. … Ang tingog nga kinahanglan ninyong kat-onan sa pagpatalinghog mao ang tingog sa Espiritu.”

Si Presidente Boyd K. Packer (1924–2015), Presidente sa Korum sa Napulog Duha ka Apostoles, mitudlo bahin sa hinay, hinagawhaw nga tingog sa Espiritu sa dihang nagsaysay sa kasinatian ni John Burroughs, usa ka naturalist, samtang naglakaw siya uban sa mga higala diha sa parke nga puno sa mga tawo. Ania ang mga pulong ni Presidente Packer:

“Bisan pa man sa kasaba sa kinabuhi sa siyudad [si Mr. Burroughs] nakadungog sa tingog sa usa ka langgam.

“Mihunong siya ug naminaw! Kadtong nag-uban kaniya wala makadungog niini. Mitan-aw siya sa palibot. Walay usa nga nakamatikod niini.

“Nakapabalaka kini kaniya nga ang tanan wala makamatikod sa usa ka butang nga hilabihan kanindot.

“Mikuha siya og sinsilyo sa iyang bulsa ug giitsa kini. Mihagtok kini sa dalan nga mitagingting, sama ra kakusog sa tingog sa langgam. Ang tanan milingi; nakadungog sila niana!

“Lisod ang paglahi sa tingog sa usa ka langgam gikan sa mga tingog sa nagdasok nga tawo sa siyudad. Apan makadungog kamo niini. Makadungog gayod kamo niini kon inyong bansayon ang inyong kaugalingon sa pagpaminaw niini.”

Ang mga pagtulun-an ni Presidente Packer bahin sa Espiritu Santo nahitabo niadtong 1979, usa ka panahon diin ang kinabuhi mas hilom ug ang kasaba sa kalibotan mas minos kaysa karon.

Si Presidente Nelson mitudlo, “Kon mas tagdon ninyo ang mga post sa social media kaysa mga paghunghong sa Espiritu, niana gibutang ninyo ang inyong kaugalingon sa espirituwal nga peligro.”

Si Presidente Faust miingon, “Kon maminaw kita sa tingog sa Espiritu, kinahanglang atong ablihan usab ang atong mga dunggan, ipunting ang mata sa pagtuo ngadto sa gigikanan sa tingog, ug makanunayong mohangad ngadto sa langit.”

Kini nga tingog sa Espiritu nagagikan sa atong kahibalo ug sa atong mga pagbati. “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing” (Doktrina ug mga Pakigsaad 8:2). Paminaw sa inyong konsensya—ang pagpadayag kasagaran magsugod diha.

Mag-ampo nga adunay Matuohon nga Kasingkasing

Ang mga tubag ug ang mga pagbati dili mapugos. Kita mag-ampo ug maghulat nga adunay matuohon nga kasingkasing. Ang ubang mga tubag dili moabot niini nga kinabuhi, apan alang sa mga matarong, ang Ginoo sa kanunay mopadala sa Iyang kalinaw (tan-awa sa Juan 14:27). Ang mga tubag kasagaran moabot kon kita mag-ampo sa pagtabang niadtong anaa sa atong palibot. Usahay, moabot kini “pagtulun-an ngadto sa lain nga pagtulun-an, lagda ngadto sa lain nga lagda” (Doktrina ug mga Pakigsaad 98:12).

Ang tingog sa langit mahimong moabot nato sa wala damha nga mga panahon ug sa wala damha nga mga lugar, apan atong makaplagan ang atong labing mahinungdanong mga oportunidad diha sa hilom nga mga luna ug sagrado nga mga lugar. Sa akong hilom nga mga pag-ampo ug mga pamalandong sa buntag, akong nakaplagan ang mahinungdanon nga mga panalangin. Ang inadlaw, personal, dili mabalda nga pagbasa sa mga kasulatan, bisan og usahay naandan na lang, sa ubang mga higayon magdala kini sa tingog sa Espiritu sa sulod sa atong kasingkasing sama sa kalayo.

Usahay, ang mga pagbati piho nga magagikan sa unsay atong gibasa, ug usahay, ang unsay atong gipamalandongan maghatag og tubag ngadto sa lahi gayod nga problema. Hinumdomi ang mga pulong ni Elder Robert D. Hales: “Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan.”

Samtang ang kasaba ug ang mga makabalda sa kalibotan naglibot kanato, ang Ginoo mimando sa Iyang propeta sa pagtukod og mas daghan pang mga templo. Dinhi niining sagrado nga mga balay sa Ginoo, samtang atong biyaan ang atong mga hagit sa gawas apan mosulod inubanan sa atong mga pag-ampo ug mga pagpakabana, kita tudloan sa mga kamatuoran bahin sa kahangtoran.

Sa milabayng tuig, si Presidente Nelson mihatag nato niining maanindot nga saad: “Minahal kong mga kaigsoonan, ania ang akong saad. Walay laing mas dugang makatabang kaninyo sa paggunit sa gunitanan nga puthaw kaysa pagsimba sa templo kanunay kon gitugot sa inyong mga sirkumstansiya. Walay laing mas makapanalipod kaninyo samtang inyong masugatan ang mga gabon sa kangitngit sa kalibotan. Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga mas makasabot sa talagsaong plano sa Dios. Walay laing mas dugang makahupay sa inyong espiritu atol sa mga panahon sa kasakit. Walay laing mas dugang moabli sa kalangitan. Wala!”

Ang matag kinatibuk-ang komperensiya nagdala og dugang nga abundang mga panalangin. Sa umaabot nga bulan sa Abril, sa makausa pa, magkita kita sa kinatibuk-ang komperensiya aron maminaw sa tingog sa Ginoo. Moadto kita sa kinatibuk-ang komperensiya nga nakaaampo ug nakapangandam. Alang sa matag usa nato, adunay mga kabalaka nga nagkinahanglan og dinaliang pagtagad ug sinsero nga mga pangutana. Moadto kita aron bag-ohon ang atong pagtuo sa atong Manluluwas, si Jesukristo, ug palig-onon ang atong abilidad sa pagbatok sa mga tentasyon. Moadto kita aron matudloan gikan sa kahitas-an. Ako mosaad kaninyo nga kon kamo mangandam ug mainampoong moadto sa mga sesyon sa kinatibuk-ang komperensiya, mabati ninyo ang mga tubag sa inyong mga kabalaka, ug kamo masayod nga ang “impluwensya sa langit” maanaa kaninyo.

Pagbaton og hugot nga pagtuo nga ang inyong Langitnong Amahan makigsulti kaninyo. Siya makigsulti gayod! Tugoti nga ang inyong hugot nga pagtuo diha Kaniya ug sa Iyang Bugtong Anak makatabang ninyo sa pag-abli sa tabil ug sa pagdawat sa tingog sa inyong Amahan. Ako mopamatuod nga Siya anaa ug nahigugma kaninyo sa dili matukib nga mga pulong.