“Pagkasakop diha sa Plano sa Dios ug diha sa Templo,” Liahona, Mar. 2025.
Pagkasakop diha sa Plano sa Dios ug diha sa Templo
Tulo ka baroganan nagpahinumdom nato nga kitang tanan makadawat sa mga panalangin nga gitanyag sa Dios sa Iyang mga anak.
Litrato sa Barranquilla Colombia Temple pinaagi ni Leslie Nilsson
Naglingkod ko diha sa grupo sa mga miyembro sa Simbahan. Wala pa kami magkahimamat sukad, apan aduna kami usa ka butang nga komon: kami dili minyo.
Karon, gusto ko mobalik sa hilisgotan. Sa ebanghelyo ni Jesukristo, wala kita gihulagway pinaagi sa mga ngalan. Ang atong tinuod nga pagkatawo, sama sa gitudlo ni Presidente Russell M. Nelson, mao nga kita “literal nga espiritu nga mga anak sa Dios.” Nakasabot ko nga tungod sa panginahanglan kita motawag sa pipila sa mga miyembro sa Simbahan og dili minyo. Adunay praktikal nga mga rason alang niana. Apan usahay, nga ingon og sama niini nga sitwasyon, makadugang kini nga mobati ang ubang miyembro nga murag dili sakop. Gani makapahimo nila kining lisod nga mobati nga hingpit nga nahilakip sa mga panalangin sa Dios sa kaluwasan ug kahimayaan.
Tan-awa ninyo, naghisgot kami sa templo—ug ang pipila ka tawo diha sa grupo mibati nga ang pagkadili minyo dili molakip nila sa pagdawat sa kahingpitan sa mga panalangin sa templo. Nakasabot ko; kon ikaw dili minyo diha sa nakasentro sa pamilya nga Simbahan, lisod kaayo kon unsaon nga mahatagan ka og bili. Apan nasayod usab ko nga ang Ginoo dili mohukom kon ang tawo takos ba nga modawat sa mga panalangin base sa panggawas nga mga panagway o sa mga label. Siya “[motan-aw sa] kasingkasing” (1 Samuel 16:7) ug Siya mohatag sa Iyang mga panalangin ngadto sa tanan nga mopili sa pagsunod Kaniya. Ako mituo niini sa tibuok nakong kasingkasing. Mao nga, naghunahuna niana, ania ang tulo ka baroganan aron matabangan ang mga Santos sa Ulahing mga Adlaw nga dili minyo nga masayod nga sakop sila diha sa plano sa Dios ug diha sa templo.
1. Ang Dios midisenyo sa Iyang plano alang sa matag usa sa Iyang mga anak.
Tungod kay ang bag-o ug walay kataposan nga pakigsaad sa kaminyoon gikinahanglan alang sa kahimayaan, daw ingon og ang plano sa Dios wala gihimo alang sa dili minyo (tan-awa sa Doktrina ug mga Pakigsaad 131:1–3). Apan si Elder Patrick Kearon mitudlo: “Ang matahom nga plano sa atong Amahan, gani ang Iyang ‘talagsaon’ kaayo nga plano, gidisenyo sa pagdala kaninyo balik sa panimalay, dili ang pagpahilayo kaninyo. Walay usa nga nagtukod og ali sa karsada ug nagbutang og usa ka tawo didto aron mopabalik kaninyo ug moabog kaninyo palayo. Sa pagkatinuod, ang nabali gayod hinuon kini. Ang Dios walay hunong sa pagtinguha kaninyo. Siya ‘gusto nga ang tanan Niya nga mga anak mopili sa pagbalik ngadto Kaniya,’ ug Iyang gibuhat ang tanang posible nga paagi sa pagdala kaninyo og balik.”
Dili tumong sa Dios nga isalikway kadtong dili minyo gikan sa pagtagamtam sa mga panalangin nga Iyang gitanyag. Si Presidente M. Russell Ballard (1928–2023), Akting nga Presidente sa Korum sa Napulog Duha ka Apostoles, mitudlo, “Ang mga kasulatan ug ang mga propeta sa ulahing mga adlaw nagpamatuod nga ang tanan kinsa matinud-anon sa pagtuman sa mga pakigsaad sa ebanghelyo adunay oportunidad alang sa kahimayaan.” Ang matag kalag bililhon kaayo sa mga mata sa Langitnong Amahan—sa hilabihan gayod nga Iyang gipadala ang Iyang Bugtong Anak aron mamatay ug motubos natong tanan gikan sa sala aron makabaton kita sa gasa sa kinabuhing dayon (tan-awa sa Juan 3:16–17; Doktrina ug mga Pakigsaad 18:10–12).
Kon ang nahitabo sa kinabuhi lahi kaysa gilaoman, atong makita ang atong kaugalingon nga nagkuwestyon sa atong katuyoan diha sa plano sa Dios. Apan ang Iyang plano dili gayod garantiya nga ang atong kinabuhi managsama ra tanan. Wala kita mahibalo kon unsa nga mga kalipay, mga kasagmuyo, mga kalamposan, o mga kasakit ang moabot sa atong kinabuhi. Si Presidente Dallin H. Oaks, Unang Magtatambag sa Unang Kapangulohan, miingon, “Daghan pa kaayong wala nato mahibaloi nga ang ato rang kasegurohan mao ang pagsalig sa Ginoo ug sa Iyang gugma alang sa Iyang mga anak.”
Tingali wala kita mahibalo kon nganong ingon niini ang atong naagian sa pagkakaron. Apan ang pagsalig sa Dios ug sa Iyang gugma mahimong magdala og katin-awan kon giunsa Niya sa paghimo ang Iyang plano alang sa tanan Niyang mga anak—lakip nimo.
Litrato sa sulod sa Rome Italy Temple Visitors’ Center pinaagi ni Massimo Criscione
2. Ang templo naghupot og personal nga mga panalangin alang sa tanan.
Tingali maghunahuna kita bahin sa mga pagselyo nga nagpasabot lamang sa bana ug asawa. Apan agi og dugang sa paghiusa sa mga magtiayon ngadto sa Ginoo, ang mga pagselyo mohiusa sa mga pamilya sa kahangtoran. Pinaagi sa mga pagselyo, ang tanang anak sa Dios makatagamtam sa mga panalangin kon motuman sila sa ilang mga pakigsaad.
Ang gahom sa pagselyo mohimong balido sa tanang ordinansa sa pagkapari didto sa langit ug dinhi sa yuta. Si Elder D. Todd Christofferson sa Korum sa Napulog Duha ka Apostoles mitudlo: “[Ang gahom sa pagselyo] makapahimo sa indibidwal nga kaluwasan ug sa pamilya nga kahimayaan nga makab-ot sa tanang mga anak sa Dios bisan asa ug bisan kanus-a sila nagpuyo dinhi sa kalibotan. Walay laing teyolohiya o pilosopiya o awtoridad nga makatupong sa maong kahigayonan nga maglakip sa tanan. Ang gahom sa pagselyo usa ka hingpit nga pagpadayag sa kaangayan, kaluoy, ug gugma sa Dios.” Ang mga panalangin nga gitanyag sa Ginoo hilabihan ka malukpanon nga maanaa kini sa tanan kinsa mohimo ug motuman sa mga pakigsaad ngadto Kaniya.
Mas masabtan nato kon unsa ka malukpanon ang plano sa Dios kon kita mosimba diha sa balay sa Ginoo. Ang paggahin og panahon diha sa templo, sama sa gitudlo ni Presidente Nelson, “motabang ninyo nga maghunahuna og celestial ug sa pagsabot kinsa gayod kamo, unsa ang inyong maabot, ug sa matang sa kinabuhi nga inyong maangkon sa kahangtoran.” Mipasabot usab siya nga ang pagsimba diha sa templo maghatag nato og proteksyon, mas lig-on nga pagpamatuod, kahupayan, personal nga pagpadayag, naglambo nga kahibalo ug gahom, ug mas dakong panabot bahin sa plano sa Dios.
Minyo man kita o dili minyo, ang templo adunay personal espirituwal nga mga pribilihiyo alang natong tanan—usa kini ka dapit nga maglig-on ug maghatag og gahom sa tanang nagtinguha nga magpaduol sa Dios. Alang sa dugang, tan-awa sa sidebar nga “Pagpalig-on pinaagi sa Pagsimba diha sa Templo.”
3. Diha sa templo, kita makapalambo sa atong relasyon ni Jesukristo.
Diha sa templo, ang labing gitutokan mao si Jesukristo. Siya ang sentro sa plano sa Dios ug mao ang rason nga kitang tanan makadawat og kaluwasan ug kahimayaan. Si Presidente Nelson mitudlo: “Ang balay sa Ginoo mao ang balay sa pagkat-on. Didto ang Ginoo nagtudlo sa Iyang kaugalingong paagi. Didto ang matag ordinansa nagtudlo bahin sa Manluluwas. Didto kita makat-on unsaon sa pag-abli sa tabil ug makigsulti sa langit sa mas klaro. Didto kita makat-on unsaon sa pagpapahawa sa kaaway ug paggamit sa gahom sa pagkapari sa Ginoo sa paglig-on nato ug niadtong atong gimahal. Unsa kaha kita kamatinguhaon nga makabaton og kadangpan didto.”
Makakaplag kita og kadangpan ug pagkasakop diha sa templo pinaagi sa pagpangita sa Manluluwas diha sa mga ordinansa ug mga pakigsaad. Sa pagbuhat sa ingon, makakaplag kita og ebidensya nga Siya nahigugma nato ug nga “ang tanan managsama ngadto sa Dios” (tan-awa sa 2 Nephi 26:33). Tungod sa Iyang gugma kanato, Siya gusto nga kita mohulma og “relasyon nga walay kataposan” uban Kaniya ug makadawat og akses ngadto sa usa ka “espesyal nga matang sa gugma ug kaluoy” pinaagi sa atong mga pakigsaad. Kon kita mohimo ug motuman sa mga pakigsaad sa templo, atong mapalig-on ang atong relasyon ngadto Kaniya, nga maghatag kanato og “paglaom, hingpit nga kalipay, ug positibo nga panglantaw sa tibuok natong kinabuhi”—bisan unsa pa man ang atong mga kahimtang.