Kinsa ang Mibutang og Tubig sa Bunyaganan?

Paghulagway ni David Miles

Human mabiyai sa bus sa Nairobi, Kenya, ang akong kompanyon ug ako nakahukom nga mopakigbahin sa ebanghelyo sa tanan nga among makit-an samtang naghulat sa laing bus padulong sa among area. Nakigsulti mi og sobra sa 400 ka tawo.

Usa nila mao si Benard, nga nagtrabaho sa duol nga konstruksiyon. Gihatagan namo siya og Basahon ni Mormon ug mihagit kaniya sa pagbasa niini kada adlaw ug mangutana sa Dios kon tinuod ba kini.

Paglabay sa upat ka bulan, nabalhin ko ngadto sa Nairobi. Sa akong unang panagtigom alang sa sakramento didto, nakita nako si Benard. Nabunyagan na siya ug naordinahan ngadto sa Aaronic nga Pagkapari.

Madasigong gidapit kami ni Benard sa iyang panimalay ug tudloan ang iyang asawa, nga si Megan. Sa dihang nahimamat namo si Megan, nasorprisa kami sa iyang labihan nga hugot nga pagtuo. Sa dihang nag-ampo siya aron makahibalo kon ang among mensahe tinuod, gitubag sa Dios ang iyang pag-ampo.

Gidapit namo si Megan nga magpabunyag sa sunod Dominggo. Pero, niana nga semana ang siyudad sa Nairobi mipahibalo nga maputol ang tubig sulod sa 10 ka adlaw! Human sa interbiyo sa bunyag ni Megan sa Sabado, ang akong kompanyon ug ako nag-ampo nga ang iyang bunyag madayon sa sunod adlaw.

Nagpuasa mi, nagpakitambag sa among mga lider, ug naningkamot og lain-laing mga paagi nga makakuha og tubig—nga ang tanan wala gihapoy nahimo. Nianang gabhiona nag-andam gihapon mi sa bunyag. Dayon miluhod mi og nag-ampo. Nadasig mi nga itaod ang usa ka tumoy sa hose ngadto sa uga nga gripo sa kusina sa meetinghouse ug itaod ang pikas tumoy ngadto sa bunyaganan. Nag-ampo mi pag-usab, nanirado ug mipauli.

Pagkasunod buntag sa dihang miadto mi sa meetinghouse, sa among katingala ang bunyaganan puno na sa tubig! Gisusi namo ang gripo sa kusina, apan walay tubig nga migawas. Walay usa sa branch ang nahibalo sa unsang paagi napuno ang bunyaganan.

Si Megan nabunyagan nianang adlawa. Ang tibuok ward mianha aron mosaksi sa iyang bunyag ug miabiabi niya ngadto sa Simbahan. Ang gripo nagpabilin nga uga, apan ang mga mata sa tanan naghilak sa pasalamat.

Si Presidente Russell M. Nelson mitudlo, “Ang Ginoo mopanalangin kaninyo og mga milagro kon kamo motuo Kaniya, ‘sa walay pagduhaduha” [Mormon 9:21]. Buhata ang espirituhanong buhat sa pagtinguha og mga milagro.” Nasayod ko nga tungod kay ang akong kompanyon ug ako mihimo sa pisikal ug espirituhanong paningkamot—nag-ampo, naningkamot og lain-laing mga opsiyon, ug nagsunod sa espirituhanong mga pagdasig—nakakita kami og milagro gikan sa Ginoo.