Sa Unsang Paagi nga ang Atong mga Pakigsaad Makatabang Nato nga Makaangkon sa Gahom sa Dios?

Gilitratohan ni Connor Johnson

Ang matag usa kanato adunay oportunidad sa paghimo og sagrado nga mga pakigsaad ngadto sa Dios sa langit mismo. Naghimo kita niining mga pakigsaad samtang moapil kita sa mga ordinansa sa pagkapari. Kon kita motuman niining mga pakigsaad, Siya mopanalangin nato sa Iyang gahom.

Atong hinumdoman ang mapanagnaon nga direksiyon ni Presidente Russell M. Nelson kabahin kon unsaon sa pag-akses sa gahom gikan sa Dios: “Matag lalaki ug matag babaye kinsa moapil sa mga ordinansa sa pagkapari ug kinsa mohimo ug motuman sa mga pakigsaad sa Dios adunay direktang agianan ngadto sa gahom sa Dios.” Kining direktang agianan ngadto sa gahom sa Dios mao ang gasa nga mabination Niyang gipakigbahin sa Iyang mga anak.

Unsa kaha ang gipakita niini nga gahom, nga buhong nga moabot gumikan sa pagtuman sa mga pakigsaad nga atong gihimo pinaagi sa mga ordinansa sa pagkapari sa inyong inadlaw nga kinabuhi? Sa unsa nga paagi nga ang usa ka babaye sa pakigsaad makaangkon niining balaang gahom?

Manghinaot ko nga ang usa ka personal nga ehemplo motabang ninyo samtang inyong buhaton ang espirituwal nga pagpalagsik nga buhat sa pagkat-on alang sa inyong kaugalingon kon unsay gipasabot nga matugahan uban sa gahom sa Dios.

Usa ka adlaw nakadawat ko og mensahe sa text gikan sa akong umagad nga babaye nga si Amy: “Pag-ampo alang kang Dottie.”

Ang akong apong babaye nga si Dottie wala makatulog sa miaging gabii. Si Amy nagpuwaw sa tibuok gabii uban kaniya ug miingon nga si Dottie gihilantan. Gipainom ni Amy si Dottie og tambal, apan init gihapon ug dili mahimutang. Ug ang akong anak nga si Connor nagbiyahe tungod sa trabaho ug dili pa makauli sulod sa laing duha ka adlaw.

Sa dihang mibuntag na, nakita ni Amy nga nangluspad na ang mga ngabil ni Dottie. Ang iyang mga kamot usab luspad ug bugnaw nga hikapon. Dayon si Amy adunay impresyon, “Dad-a si Dottie ngadto sa doktor sa mga bata [pediatrician].” Mipatalinghog siya niana nga pag-aghat, mitawag sa opisina sa pediatrician, ug miseguro nga ila dayong atimanon si Dottie.

Maayo gani, ang opisina sa pediatrician atbang ra sa balay sa akong mama. Gibati ni Amy nga mohapit sa balay sa akong mama. Ang akong mama nagtrabaho sa iyang nataran ug malipayong mibantay sa kwatro anyos nga igsoong babaye ni Dottie, nga si Goldie, samtang dad-on ni Amy si Dottie ngadto sa pediatrician. Tubag kadto sa kabalaka ni Amy mahitungod sa panginahanglan sa mobantay ni Goldie ug moatiman ni Dottie sa samang higayon.

Nahibaloan sa pediatrician nga si Dottie adunay pneumonia, tungod tingali nga nakasuyop og tubig nga pangkaligo pipila ka adlaw na ang milabay. Gitambalan si Dottie og mga antibiotics ug migahin sa nahibilin sa adlaw diha sa mga bukton sa iyang inahan, gipahandag aron maabli ang agianan sa hangin ug masayon ang iyang pagginhawa.

Mitanyag ko nga mohapit og panihapon sa akong pagpauli. Ug misugot si Amy, diin ako mapasalamaton. Natingala ko giunsa nga makaya ni Amy human nga walay kinatulgan, sa kabug-at nga adunay nasakit nga bata ug sa panginahanglan nga mobantay ni Goldie.

Nagpaingon ko sa ilang balay dala ang pagkaon gikan sa restawran ug nakita si Amy ug ang mga batang babaye nga malinawon. Dihay dugang kalagsik ni Amy ug kahayag sa iyang panagway. Kalma siya, bisan nag-atubang og laing gabii nga mag-inusara uban sa masakiton nga si Dottie. Wala siya mahadlok. Masaligon siya. Kalinaw kadto nga dili matugkad sa tawo. Gusto lang ko nga molingkod sa makadiyot ug tagamtamon ang kalinaw.

Naningkamot si Amy sa pagtuman sa iyang mga pakigsaad ngadto sa Dios ug gipanalanginan sa Iyang makapalig-on nga gahom. Ang Espiritu miaghat niya nga molihok sa iyang gibuhat sa pag-atiman ni Dottie. Ug ang gahom sa Ginoo mipalambo sa iyang kapasidad sa pagsulbad sa mga panginahanglan sa iyang pamilya pinaagi sa pailob ug gugma ug uban sa kalmang kaseguroan nga ang tanan maayo ra.

Mao kini ang panalangin sa gahom sa Dios, nga atong magamit pinaagi sa sagrado nga mga pakigsaad ug tungod sa maulaong sakripisyo sa Manluluwas. Kini nga gahom mousab kanato, molig-on kanato, mohatag nato og kalinaw, ug modugang sa atong kapasidad sa pagtuman sa atong balaanong gitudlo nga mga reponsibilidad isip mga babaye.