Susiha ang Ganghaan

Litrato sa tagsulat nga naa sa rantso pinaagi ni Shaun Sutton

Sa hapit na matapos ang akong panahon isip usa ka pangserbisyo nga misyonaryo, misunod ko sa pag-aghat nga moserbisyo kaduha sa usa ka semana sa usa ka rantso didto sa Utah alang sa mga pamilya nga adunay sakop nga nagserbisyo o namatay samtang nagserbisyo sa militar. Wala gyod koy kasinatian sa bisan unsa nga may kalabotan sa rantso, apan naghinamhinam ko.

Sayo sa akong oras didto, hangyoon ko nga limpyohan ang mga puwesto sa mga kabayo. Ang akong buotan nga higala ug kompanyon kang kinsa ako mikuyog magabii aron magtudlo, si Elder Saltern, gisangonan sa pagpakita nako unsay buhaton.

Usa ka adlaw sa pag-adto sa kataposang pwesto aron manglimpyo, misunod ko og sulod ni Elder Saltern. Sa akong hunahuna nakadawat ko og malumong impresyon nga mangutana mahitungod sa pagsira sa ganghaan sa among luyo. Gibaliwala ra nako ang hunahuna ug mitrabaho sa pagpanglimpyo.

Ang kabayo nga anaa sa pwesto, si Shrek, mao ang usa sa labing dakong kabayo diha sa rantso. Misugod siya sa pagbalhin-balhin nga nahadlok samtang nanglimpyo kami. Dayon, si Shrek kalit lang nga migawas sa abli nga ganghaan ug midagan paingon sa ubang mga kabayo nga anaa sa gawas sa toril.

Salamat na lang, usa sa mga tawo nga sinati na sa rantso mikuha og usa ka balde nga oats ug paspas nga milingla sa kabayo pabalik. Samtang gibutang niya og balik si Shrek sa puwesto niini, mitan-aw siya nako ug nalingaw nga nangutana, “Unsay atong nakat-onan?”

Ang klaro kaayo nga leksiyon mao nga kanunayng isira ang ganghaan. Napahinumdoman ko sa usa ka kasulatan nga akong nabasa nianang buntaga nga mitudlo nako nga motugyan “ngadto sa mga pagdani sa Balaang Espiritu” (Mosiah 3:19).

Sa dihang si Elder Saltern ug ako misulod sa pwesto ni Shrek, akong gibaliwala ang pag-aghat sa Espiritu nga isira ang ganghaan. Akong gilimitahan ang Espiritu sa pagtambag lamang nako sa unsay sa akong hunahuna “espirituwal” nga mga butang nga may kalabotan sa mga kasulatan o sa mga sugo. Kini nga kasinatian nakahimo nakong mapaubsanon. Akong naamgohan nga ang kahibalo sa Espiritu mas labaw pa kaysa akong gituohan—bisan kon mahitungod kini sa rantso!

Si Presidente Thomas S. Monson (1927–2018) mitudlo, “Hinumdomi nga kini nga trabaho dili lamang inyo ug [akoa]. … Kon kita anaa sa buluhaton sa Ginoo, may katungod kita sa panabang sa Ginoo.”

Tingali wala ko magtudlo sa ebanghelyo diha sa rantso, sama sa akong buhaton inigka gabii niana kauban ni Elder Saltern, apan angayan ko sa balaanong tabang ug direksiyon—bisan samtang manglimpyo sa mga pwesto sa mga kabayo.