Ang Tinuod nga Kahulogan sa Pagpangalagad

Mapasalamaton ko alang sa 2025 nga mga Prayoridad sa Area nga gipaila sa Kapangulohan sa Area sa Pilipinas. Ang gihatagan og gibug-aton kabahin sa pagpangalagad ubos sa unang prayoridad nga “Duol Ngadto ni Kristo” nakapahinumdom nako sa usa ka sulat nga akong nadawat gikan sa usa ka bishop kaniadto.

“Usa ka Dominggo, usa ka kabos nga inahan sa walo ka anak miduol aron makigkita kanako sa akong opisina. Siyam ka bulan na siyang mabdos sa iyang ikasiyam nga anak. Nabalaka siya nga ang iyang bana walay kwarta nga ikabayad alang sa pagpahimugso sa iyang anak. Nagtrabaho ang bana isip usa ka gwardiya nga gamay ra ang sweldo. Mao nga, miduol siya nako, iyang bishop, aron mangayo og tabang.

“Akong giduso ang kalabot niini ngadto sa akong presidente sa stake aron mangayo sa iyang tambag. Sa akong kahibulong, ang presidente sa stake misulti nako nga dili siya tabangan tungod kay ang iyang pagmabdos mokabat og siyam ka bulan busa ang magtiayon kinahanglan nga nangandam alang niini. Tingali nakahinumdom ka niining palisiya nga epektibo kaniadto. Apan ang mabdos nga asawa klaro nga walay panghunahuna ug pagbansay sa pag-andam mao nga siya miduol ngari nako aron mangayo og tabang.

“Usab, nangutana ko sa presidente sa stake kon makahatag ba kami og tabang nga pagkaon. Miingon siya nga dili tungod kay “ang simbahan nakahatag na og pagkaon ngadto nianang pamilyaha sa makadaghang higayon ug gani ang amahan nagpabilin nga dili kaayo aktibo tungod sa usa ka paglapas nga dili siya mopasaylo.” Dayon ako mitubag, “Unya ang mga anak sa mabdos nga asawa ug ang mga anak nga aktibong miapil sa Simbahan? Dili kita makatugot nga mag-antos sila, dili ba?” Mitubag siya og balik, “Pasagdi nga ang mga pag-antos sa pamilya mahimong usa ka tunglo ngadto sa amahan nga dili matinud- anon.” Kini nga tambag hilabihan nga nakahasol kanako. Wala ko makasabot kaniadto kon nganong mibiya ko niana nga panag-istorya nga nasakitan pag-ayo ug nahasol.

“Ang kabos nga inahan mihimugso sa bata, apan ako walay ikatabang. Dili ko makatabang sa balayronon sa ospital. Ako walay awtoridad, ug ang presidente sa stake misulti nako nga siya dili mosuporta sa bisan unsang hangyo nga tabang pinansiyal. Gikobra sa amahan iyang duha ka buwan nga sweldohan agi og bale gikan sa iyang kompanya aron ibayad sa ilang balayranan. Gumikan niini ang pamilya walay kalan-on nga makaon.

“Midesisyon ko nga makigpulong sa konseho sa ward aron mahisgotan ang maong butang. Midisisyon ko sa paghatag sa pamilya og pagkaon. Gamit ang kantidad nga akong mahatag sa akong kapasidad isip bishop, akong gihangyo ang Presidente sa Elders Korum sa pagpalit og 50 ka kilo nga bugas ug gihangyo ang Presidente sa Relief Society sa pagpalit og mga grocery lakip ang mga panginahanglan sa bata ug sa inahan. Ako dayong gipangutana ang konseho kon unsa orasa kasagaran ang bana mauli gikan sa trabaho. Miingon sila nga, alas 8:30 sa gabii. Mao nga, akong gibisita ang pamilya sa alas 9:00 sa gabii.

“Ang balay gamay ra, ngitngit, ug diha sa taliwala sa umahan. Walay kuryente. Apan, sa akong katingala, ang mga Presidente sa Elders Quorum ug Relief Society uban sa ilang mga magtatambag nag-una na sila nako didto. Sila mipaila-ila nako ngadto sa amahan. Wala siya makatuo nga ang usa ka batan-on nga bishop nga sama nako natawag ug nga ako miadto sa iyang balay nianang gabhiona.

“Milili ko sa bintana ug nakita ang mga anak nga nagtupad nga nanghigda diha sa salog, naghuot sa pagpangatulog. Sa usa ka suok didto ang inahan uban sa iyang bag-ong anak nga naghigda sa salog.

“Ang amahan misulti kanako nga naulaw kaayo siya sa pagdawat sa pagkaon gikan sa Simbahan tungod kay siya dili kaayo aktibo sulod sa dugay nang panahon. Apan ang iyang pamilya nagkinahanglan niini, ug siya mapasalamaton. Gisultihan nako siya nga wala kami miadto aron paliton ang iyang pagkaaktibo sa simbahan. Wala ko makaila kaniya, mao nga nganong magpakabana pa man ko. Apan miingon ko ngadto niya, “adunay nakaila nimo. Siya nasayod sa mga panginahanglan sa imong pamilya. Siya ang imong Amahan sa Langit. Siya mipadala kanamo dinhi aron sa pagpahibalo nimo nga Siya nagpakabana ug nahigugma nimo.

“Ang amahan mihilak. Mibakho siya sama sa usa ka gamayng bata diha sa among atubangan. Kaming tanan natandog sa iyang emosyon.

“Ako siyang gisultihan nga sa Dominggo, kinahanglan dili siya mosimba. Bisan gani sa sunod semana o sa sunod bulan. Ako siyang gipasidan-an nga ako dili makapugong sa mga isulti ug mga panghunahuna sa mga tawo. Tingali mahimong makadungog siya sa uban nga moingon nga mitunga siya tungod lang kay nakadawat siya og tabang gikan sa Simbahan, ug kini mahimong makapasakit sa iyang mga pagbati. Apan kon interesado siya sa pag-adto dili igsapayan sa unsay mahimong isulti sa mga tawo, ilabi na kon siya nakaila sa espiritu nga nagdapit kaniya, siya welcome nga moadto sa simbahan bisan unsang higayona.

“Nangita ko niya pagka-Dominggo, apan wala siya mitunga. Wala usab siya nagpakita sa misunod nga pipila ka semana. Paglabay sa duha ka bulan, samtang nagpahigayon ko sa miting sa sakramento, nakita nako ang usa ka tawo nga misulod sa tigomanan sa sakramento [sacrament hall]. Mao kadto ang amahan, hinayng misulod ug milingkod sa kataposang laray. Apan siya natingala ug pagkataudtaod nahimong emosyonal kaayo sa pagkadungog sa presidente sa stake nga mipahibalo sa akong pagka-release isip usa ka bishop. Miingon siya nga nangandoy siya sa pipila ka higayon nga nagserbisyo uban kanako sa bisan unsang kapasidad diha sa ward. Apan siya miuyon sa pagbuhat niini sa iyang bag-o nga bishop.

“Unom ka bulan ang milabay ang akong kanhi magtatambag mipahibalo nako nga ang brother mao ang labing kugihan nga home teacher sa ward sukad.

“Kini nga kasinatian an nagtudlo kanako og dako kaayo kabahin sa pagpangalagad. Naghunahuna ko sa pagpakigbahin niini diha nimo. Apan naghunahuna ko kon pila kaha ka mga bishop karon ang nakadawat og samang tambag gikan sa silang mga lider, misunod niini, ug gipalong ang gugmang putli diha sa ilang kasingkasing diha sa proseso. Manghinaot ko nga wala. Kon adunay usa man, ako manghinaot nga siya maghinulsol ug mamaayo.”

Sa dihang gibasa nako kining sulat gikan sa usa ka maayong kanhi nga bishop, mihilak ko. Gibati nako ang pagbubo sa Espiritu nga nagkompirmar ngari kanako nga kining batan-on, gipugngan, ug sanglit matinud-anon nga bishop mao Iyang disipulo. Ako nag-ampo alang niana nga presidente sa stake aron nga siya malamdagan sa gahom sa gugma, kapuangod ug gugmang putli nga gipakita dili lang pinaagi niining maayo nga bishop apan usab sa Ginoo ug Manluluwas nga si Jesukristo.

Sa paghatag og giya ug direksiyon, ang Kapangulohan sa Area milatid sa 2025 nga Panglantaw ug mga Prayoridad sa Area. Kining dinasig nga mga baroganan nagtudlo sa tinuod nga doktrina nga motabang sa pagpalig-on sa mga indibiduwal, mga pamilya, mga ward, ug mga stake samtang kita mangandam alang sa Ikaduhang Pag-anhi ni Jesukristo.

Sa iyang panapos nga mensahe atol sa Oktubre 2024 nga Kinatibuk-ang Komperensiya, si Presidente Nelson miingon, “Dili pa sayo kaayo o ulahi na kaayo nga kamo mahimong usa ka matinguhaon nga disipulo ni Jesukristo. Dayon kamo makasinati sa hingpit nga mga panalangin sa Iyang Pag-ula. Kamo usab mahimong mas epektibo sa pagtabang sa pagpundok sa Israel. Busa karon, ako manawagan kaninyo nga ipahinungod pag-usab ang inyong mga kinabuhi ngadto ni Jesukristo. Duol ngadto Kaniya ug ihalad ang inyong tibuok nga kalag ngadto sa Kaniya. Kini mao ang sekreto sa usa ka kinabuhi sa hingpit nga kalipay.”