Sila Molakaw sa Dalan sa Pakigsaad. . . . Pinaagi sa Kabukiran ug mga Sapa

Ang pamilyang Secuya nagpuyo diha sa bukiran nga bahin sa Cebu, uban sa mga ginikanan nga nagtrabaho isip mga saop aron masuportahan ang ilang lima ka anak. Sa hinapos sa semana, ang tibuok pamilya magsul- ob og pormal nga mga sinina ug mga sapatos ug magsugod sa pagpanglakaw... hangtod sa dose ka kilometro aron makaabot sa meetinghouse sa Busay 2nd Ward sa Ang Simbahan ni Jesukristo sa mga Santos sa Ulahing mga Adlaw.

“Importante kaayo nga kami mosimba matag Dominggo, tungod kay kami nakat-on og daghan sa pagpaminaw sa mga pulong ni Jesukristo,” pakigbahin ni Richelle Secuya. Kuyog sa iyang uban pang mga igsoon ug mga ginikanan, si Richelle molakaw sa tungason nga mga dalan ug dayon magtiniil aron motabok sa mga sapa, human niana siya ug ang iyang pamilya maghulat og sakyanan nga modala kanila sa simbahan.

Samtang sila nanambong sa miting sa sakramento, ang mga Secuya mobati og lahi nga matang sa katumanan. “Kami nasayod nga ang Langitnong Amahan malipay kon kami anaa sa simbahan, nga mao ang Iyang Balay,” mipahiyom ang igsoon nga lalaki ni Richelle.

Gihapon, ang pamilya nasayod sa mga hagit sa pagtuman sa sugo sa Ginoo sa pagbag-o sa ilang mga pakigsaad sa bunyag samtang ilang ipabilin nga balaan ang Adlawng Igpapahulay. “Nakahinumdom ko sa among kinagrabihan nga kasinatian,” nakahinumdom si Mitzi Secuya, ang inahan sa managsoon, “kinahanglan kami nga molakaw og tulo hangtod sa upat ka oras, nga among gibuhat sulod sa usa ka bulan.”

Sa usa ka punto, ang layo nga paglakaw nahimong hapit dili na madala sa iyang mga anak. “Adunay mga higayon nga moingon sila nga gikapoy na sila sa pagsige og lakaw,” miangkon siya, “apan mipadayon gihapon kami tungod ang among Dominggo dili makompleto kon kami moadto sa simbahan nga wala sila.”

Ang liko-likong mga dalan nga gilatas ni Sister Secuya ug sa iyang pamilya nagpakita sa iyang panaw sa pagdala sa iyang pamilya sa paglakaw subay sa dalan sa pakigsaad. Sa sinugdanan, si Sister Secuya mao lang ang miyembro sa Simbahan diha sa pamilya, apan siya nahimong dili kaayo aktibo.

Dayon, usa ka adlaw, nakakita siya og full-time nga mga misyonaryo. “Miyembro ko sa Simbahan, dali palihog,” mahinamon si Mitzi nga mitawag nila. Ang mga misyonaryo nagtakda og appoinment sa pamilya, ug midapit kanila sa pagpaminaw sa ebanghelyo ni Jesukristo.

Sa sinugdanan, si Richard Secuya dili ingon niana ka matuohon sa mga misyonaryo, apan samtang gihunahuna niya ang iyang asawa ug mga anak, nahimo siyang mas daling mosunod sa mga pag-aghat sa Espiritu. Ang tibuok pamilya nahimong mga miyembro sa Simbahan, ug naselyo alang sa panahon ug sa tanang kahangtoran diha sa templo.

“Ako nasayod nga ang Ginoo dili mobiya kanato kon kita moduol ngadto Kaniya,” nagpamatuod si Brother Secuya, “ug tinuod gayod nga maanindot nga kami karon mga miyembro na sa Simbahan. Siya nagmahunahunaon gayod kanamo.”