’Ua fa’afāna’o te ’Ēkālesia i te tauturu i te hō’ē ’oire iti tei vāvāhihia e te miti fa’a’ī i te Fenua Pāpua

I te ta’irira’a te « miti nanu » i ni’a i te motu nō Parama i te pae tō’o’a o te rā nō te Fenua Pāpua, i te 22 nō ’Ātopa 2024, ’aita tō te huira’atira o taua ’oire iti ra e horora’a. E ma’a hora noa, e rave rahi fare tei vāvāhihia, nā reira ato’a te mau fa’a’apu, ’e ’ua ’ī roa te mau ’āpo’o pape i te pape miti.

Fātata e maha hānere ta’ata e ora ra i ni’a i teie motu nehenehe, e motu mo’emo’e rā i te pae tō’o’a o te rā nō te Fenua Pāpua. Piri i te toru o te tuha’a, e mau melo nō te ’āma’a nō Parama, nō te titi nō Daru a Te ’Ēkālesia a Iesu Mesia i te Feiā Mo’a i te mau Mahana Hope’a nei.

I te taera’a te parau ’āpī nō te ’ati i te fare pū nō te titi i Daru, ’ua ha’a ’oi’oi te feiā fa’atere o te ’Ēkālesia nō te tono atu i te tauturu. ’Ua hāponohia te mā’a, te pape, te ’ie ’e te tīti’a pape, mai te ’oire pū nō te Fenua Pāpua, ’o Port Moresby, i te hō’ē poti pārahurahu i Daru.

Mai Daru atu, ’ua fa’ahaerehia atu te tauiha’a ’e te mau misiōnare ’aravihi i te pae nō te tauturu ’ati a te piha tauturura’a i te ao nei a te ’Ēkālesia, nā reira ato’a te mau misiōnare ’e te feiā fa’atere o te ’Ēkālesia i reira, i te ’ō’o’a nō Pāpua i te ’ānāvai Fly River, ’e tāpae atu i te motu nō Parama.

I te tāpaera’a i reira, ’ua ’itehia te mau fare pēpē ’e te mau fa’anahonahora’a huru rau ’a te ’oire iti tei ’ino roa, ’o te feiā mo’a ato’a rā ma te mana’o ’āteu ’e te ti’aturi, tei ha’amata a’ena i te ha’a nō te patu fa’ahou i tō rātou ’oire iti pēpē.

I te tāpaera’a te poti pārahurahu, ’āpe’ehia e te mau poti dinghies nā mua a’e i te avatea, e ti’afā i terā 29 nō ’Ātopa, ’ua pāpa’u roa nō te tāpiri mai i te tahatai ’e i te ’oire iti, nō reira ’ua fa’autahia te mau tauiha’a i ni’a i te mau poti na’ina’i, rātou tei tāpiri mai i te tahatai.

’Aita rā te mau poti na’ina’i i piri atu i te hō’ē kilometera, nō reira ’ua haere mai te huira’atira nā raro i te mau poti ra.

Terā avatea tā’āto’a, ’ua ’āmui te huira’atira ’e te mau misiōnare nō te haere ’e nō te ho’i mai e piti kilometera i roto i te nanura’a miti nō te ta’ita’i i te mā’a, te pape mā ’e te mau tīti’a pape, i tahatai roa.

’Ua hau i te toru hora te maoro nō te ta’ita’i i te mau tauiha’a mai te mau poti i te ’oire iti.

’Ua ’āpapahia te mau tauiha’a i te vāhi pū o te ’oire ’a fa’aineinehia ai te ’ōperera’a i te huira’atira.

I te otira’a te mau tauiha’a ato’a i te ta’ita’ihia i roto i te ’oire, ’ua fa’ari’i te mau ’utuāfare ma te māuruuru i tā rātou tuha’a, tā rātou i ta’ita’i mai i tahatai.

I Port Moresby, ’ua feruri ’o Johnny Leota, te fa’atere o te piha tōro’a i reira, i te mau ha’amaita’ira’a tei ’ite-pinepine-hia i roto i te mau fifi. « I muri mai i te vāvāhira’a a te miti nanu, ’ua ’ana’ana mai te ’āteura’a ’e te fa’aro’o o te ta’ata nō te motu nō Parama, i te fa’ari’ira’a rātou ma te ’oa’oa i te tauturu rū, nō te tauturu ia rātou i roto i teie tau fifi nō tō rātou orara’a. ’Ua rahi mai tō rātou māuruuru ’e tō rātou here i te Fa’aora ’a ’ite ai rātou i tōna here nā roto i teie tauturura’a rū a te ’Ēkālesia. I roto i te mau tauto’ora’a tāmau nō te tauturu atu ia rātou, e mātutuhia ’e te feiā fa’atere o te huira’atira i reira i te mau rāve’a nō te pāruru ia rātou i te mau ’ati nō ananahi. »

E’ita te fa’aho’ira’a i te motu nō Parama i tōna vaira’a ’ana’ana e tupu ’oi’oi. ’Ua ’ite rā te feiā mo’a nō Parama, nā reira ato’a tō rātou mau hoa ’e mau ta’ata tupu ē, e’ita rātou e fa’aruru i teie fifi ’o rātou ana’e, ’e tei pīha’i iho ia rātou Te ’Ēkālesia a Iesu Mesia i te Feiā Mo’a i te mau Mahana Hope’a nei nō te tauturu, i te pae mātēria ’e i te pae vārua, ’a ha’a ’āmui noa ai teie feiā mo’a a te Atua ’e tō rātou ta’ata tupu nō te patu fa’ahou i tō rātou motu ’āi’a nehenehe ’e te mo’emo’e tei pēpē.