Mau rāve’a nō te mau poro’i hanahana

Te ’itera’a i te taime tē paraparau ra te Atua, e tītauhia ïa te fa’aro’o ’e te ti’aturi. E tūtaro noa te fa’aro’o i roto ia Iesu Mesia. E tītauhia ato’a ’ia ti’aturi iāna. ’Ua parau ’oia :

« Inaha, e fa’a’ite au ia ’oe, i roto i tō ’oe ferurira’a ’e i roto i tō ’oe ’ā’au na, nā roto i te Vārua Maita’i, ’o tē tae i ni’a ia ’oe ’e ’o tē pārahi i roto i tō ’oe ’ā’au.

« I teienei, inaha, ’o teie te vārua o te heheura’a » (Te Ha’api’ira’a Tumu ’e te mau Fafaura’a 8:2–3).

’Aita rā te heheura’a ’e te arata’ira’a hanahana e tae mai nā roto noa i te tīa’ira’a i te hō’ē fa’a’itera’a pae vārua. E mea ti’a ia tātou ’ia ’ohipa. Mai tā tā’u vahine i parau mai nō tā’u a’ora’a nō te ’āmuira’a, e mea ti’a noa ia tātou i te tahi taime ’ia « ha’amata. »

I tō māua Isabelle tāvinira’a ’ei feiā fa’atere misiōni i roto i te misiōni nō Lyon i Farāni, ’ua tītauhia iā’u ’ia fa’aoti i hea te misiōnare tāta’itahi e haere ai i roto i te misiōni ’e te taime e rave ai i terā fa’auera’a ’ohipa. ’Ua ’ite mai au ē, e arata’i te Vārua iā’u mai te mea e pure au nō te tauturu ’e i muri iho e fa’a’ohipa i tō’u ferurira’a maita’i a’e. E tae mai ïa te ha’apāpūra’a i te taime e haere te mau mea i tō rātou vaira’a.

I roto i tō’u pi’ira’a i teienei, e tonohia vau i roto i te mau titi nā roto i te ’Ēkālesia, nō te fa’anaho fa’ahou i te mau peresidenira’a titi. ’A uiui ai māua tō’u hoa i te ta’ata, e tae mai ia māua te mau mana’o i te ferurira’a ’e i te ’ā’au, ’e te mau nīno’a mana’o. E ’āpo’o māua ’e e pure ’āmui. I te pae hope’a, e tae mai te heheura’a ’e e ha’apāpū mai te Fatu ia māua ’o vai tāna i pi’i nō te tāvini.

E fa’anahora’a ’ohipa te ’itera’a i te taime e paraparau mai ai te Atua ’e te ’itera’a i tōna hina’aro. Tītauhia ’ia fa’a’ite i tō tātou ineine ’ia rave ma te fa’aro’o ’e te ti’aturi.

Te hō’ē rāve’a faufa’a roa e paraparau mai ai te Atua i tāna mau tamari’i, e mea nā roto mai ïa i te mau peropheta. Te vaira’a te hō’ē peropheta i te fenua nei i teie mahana e parau ’āpī maita’i roa ïa ! E fa’ari’i ’oia i te heheura’a nō ’ō mai i te Atua ra nō te fa’atere ’e nō te arata’i i te ’Ēkālesia (hi’o Amosa 3:7). E nehenehe ato’a tātou e fa’ari’i i te arata’ira’a ’e te pārurura’a nā roto i te pe’era’a i tāna mau ha’api’ira’a. E ’ere i te mea ’ōhie noa, ’ua fa’aue mai rā te Fatu ia tātou ’ia pe’e i te peropheta « ma te fa’a’oroma’i ’e te fa’aro’o » (Te Ha’api’ira’a Tumu ’e te mau fafaura’a 21:5).

’Ei hi’ora’a « Te ’Utuāfare : E poro’i i tō te Ao nei », ’ua pāpūhia e parau tohu mai te taime ’a fa’a’itehia ai te reira ’a 30 matahiti i teienei. Tē pāhono nei te reira e rave rahi fifi ’o tā tātou i ’ore i mana’o na, ’e tē hōro’a nei i te mau arata’ira’a ’o tā tātou i ’ore i ’ite e tītauhia mai—tē ’ite nei rā tātou i teienei. E ’ere paha te mau arata’ira’a a te peropheta te mea tā tātou e hina’aro e fa’aro’o i te tahi taime. E’ita paha te reira e tū’ati i te mau peu nei a te tōtaiete. Noa atu rā, e arata’ihia tātou ’e e pāruruhia ’ia pe’e ana’e tātou i te peropheta.

’A ui i te mau uira’a ’e ’a ’imi i te mau pāhonora’a

I te ’ōmuara’a o te fa’aho’i-fa’ahou-ra’a mai, pinepine te Atua i te pāhono mai i te mau uira’a a te peropheta Iosepha Semita ’e tā vetahi ’ē ato’a. I te taime ’a ’ohipa ai Iosepha ’e ’o Oliver Cowdery i ni’a i te ’īritira’a i te Buka a Moromona, ’ua tae rāua i ni’a i te mau ha’api’ira’a a te Fa’aora nō ni’a i te ha’api’ira’a tumu o te bāpetizora’a (hi’o 3 Nephi 11:23–33). ’Ua hina’aro rāua e ha’api’i rahi mai ā ’e ’ua haere atu i roto i te uru rā’au nō te pure. ’Aita i maoro, ’ua fā mai Ioane Bāpetizo ’e ’ua fa’aho’i mai i te ha’amanara’a nō te bāpetizora’a nā roto i te utuhira’a nō te matarara’a i te hara.

I te tahi atu taime, ’ua fa’a’ite Emma, te vahine a Iosepha, i tōna mau māna’ona’ora’a nō ni’a i te reporepo o te mau tāne e puhipuhi nei i te ’ava’ava paipu ’e ’o tē ’au’au i te ’ava’ava i roto i te mau rurura’a. ’Ua tu’u atu Iosepha i teie ’ohipa i mua i te Fatu ’e ’ua fa’ari’i i te hō’ē heheura’a—« E parau pa’ari » (Te Ha’api’ira’a Tumu ’e te mau Fafaura’a 89:1)—nō ni’a i te mau peu mā nō te maita’i i te pae tino ’e te pae vārua o te mau tamari’i a te Atua.

Teie mau hi’ora’a—’e e rave rahi atu ā—tē fa’aha’amana’o mai nei ia tātou ē, ’aita e fifi te mau uira’a ’ia ’imi ana’e tātou i te mau pāhonora’a i ni’a i te ’avei’a ti’a. Mai te peu e tu’u tātou i tā tātou mau uira’a i mua i te Fatu, e ’ite mai tātou i te mau pāhonora’a. I te tahi taime e tae ’oi’oi mai te mau pāhonora’a. Te mea pinepine rā, e tae mai te mau pāhonora’a « te fa’aue nā ni’a iho i te fa’aue, i te a’o nā ni’a iho i te a’o, te tahi vāhi iti i’ō nei ’e te tahi vāhi iti i ’ō atu » (2 Nephi 28:30). E tīa’i paha tātou i te mau pāhonora’a nō te tauturu ia tātou ’ia ha’api’i mai ’e ’ia tupu i te rahi, e pāhono mai rā te Atua ia tātou mai te au i tōna iho hina’aro, i tāna rāve’a ’e tāna tārena.

’Ia tītau-roa-hia ana’e ia tātou ’ia tīa’i i te Atua ’ia paraparau mai ia tātou, e mea faufa’a roa ’ia tāpe’a tātou i ni’a i te mea tā tātou i ’ite ’e te mau ’ohipa i tupu nō tātou. ’Aita ana’e, e mo’ehia paha te reira ia tātou. ’Eiaha tātou e fē’a’a i te mau ’ohipa i tupu nō tātou ’e te Vārua, nō te mea noa tē fifi nei tātou. I taua mau taime ra, e mea ti’a roa ia tātou ’ia ho’i mai i roto i tō tātou ferurira’a ’e ’ia ha’amana’o i te mea tā tātou i putapū ’a ’ite ai i tō tātou fātatara’a i te Atua.

’Ua ui Alama i te hō’ē taime i teie mau uira’a hi’opo’ara’a i te nūna’a o Zarahemela :

« ’Ua fānau-vārua-hia ānei ’outou i tā te Atua ra ? ’Ua fāri’i ānei ’outou i tōna hōho’a i roto i tō ’outou nā mata ? ’Ua ’itea ānei ia ’outou teie tauira’a rahi i roto i tō ’outou na ’ā’au ? […]

« ’E i teienei, inaha, tē parau atu nei au ia ’outou na […] mai te mea ē ’ua ’itea ānei ia ’outou te tauira’a o tō ’outou ’ā’au, ’e mai te mea ē ’ua tupu tō ’outou hina’aro ’ia hīmene i te hīmene nō te aroha fa’aora, tē ui atu nei au ia ’outou ē, ’ua ti’a ānei ia ’outou i te hina’aro i te reira i teienei ? » (Alama 5:14, 26).

E mea ti’a ’ia hi’o maita’i tātou ē e ha’amana’o tātou i te mau ’itera’a pae vārua, ’eiaha rā e tūra’i i te hiti. ’Ia ui pinepine tātou ia tātou iho : « ’Ua ti’a ānei iā’u i te hina’aro i te reira i teienei ? » E ha’apūai te reira ia tātou i te mau taime e au ra e mea māmū te Atua. E maita’i ato’a mai tātou nō te ’ite terā te mau taime tē paraparau nei ’oia ia tātou.

Te ’āparaura’a ’e tō tātou Metua i te ao ra e ’ohipa ora ïa. E rave tātou i tā tātou tuha’a nō te tāpe’a ora mai i te reira, ma te ’imi-itoito-ra’a ’e te fa’atupura’a i te mau rāve’a nō te mau poro’i hanahana. E nehenehe tātou e pure pinepine ’e ma te tu’utu’u ’ore i te Atua nō te hau, te tāmāhanahanara’a ’e te arata’ira’a. E nehenehe tātou e ’imi māite i tāna parau i roto i te mau pāpa’ira’a mo’a ’e ’ia putapū i te fa’aurura’a a te Vārua. E nehenehe ato’a tātou e pe’e i te arata’ira’a a te peropheta.

’A vai tū’ati noa ai tātou ’e tō tātou Metua here i te ao ra, e nehenehe tātou e riro ’ei mauha’a i roto i tōna rima nō te tauturu iāna i roto i tāna ’ohipa fa’ahiahia. Maoti te ha’apa’ora’a i te mau mana’o ’e te mau muhumuhura’a tā tātou e fa’ari’i, e nehenehe tātou e tauturu ia vetahi ’ē ’ia putapū ē, ’ua ’ite maita’i ’e ’ua here te Atua ia rātou ’e tē hina’aro nei ’ia paraparau ia rātou.

Te ha’apāpūra’a ē, tē fa’aro’o nei ’e tē paraparau nei te Atua i tāna mau tamari’i ’o te hō’ē ïa ha’amaita’ira’a rahi mau. E hōro’a mai te ’āparaura’a hanahana tāmau ’e ’ōna i te arata’ira’a tei tītauhia nō te fano nā roto i te tere o te orara’a.