’A hi’opo’a i te ’ūputa

Hōho’a nō te ta’ata pāpa’i i te fare fa’a’amura’a nā Shaun Sutton

I te pae hope’a o tā’u tau misiōnare, ’ua pe’e au i te tahi fa’aurura’a ’ia rave i te ’ohipa e piti mahana i te hepetoma i roto i te hō’ē fare fa’a’amura’a nō Utaha nō te nu’u fa’ehau ’e te mau ’utuāfare tei ora mai. ’Aita roa atu vau i ’ite i te hō’ē noa a’e mea nō ni’a i taua ’ohipa ra, terā rā, ’ua ’oa’oa roa vau.

I te ’ōmuara’a o tō’u taime i reira, ’ua anihia iā’u ’ia tāmā i te mau fa’aeara’a o te pua’ahorofenua. ’Ua fa’ata’ahia tō’u hoa tāua maita’i roa e haere e ha’api’i i te mau pō, ’o Elder Saltern, nō te fa’a’ite mai iā’u i te mea e rave.

Tō’u taera’a atu i te piha fa’aeara’a hope’a nō te tāma, ’ua pe’e au ia Elder Saltern i roto. ’I tō’u ferurira’a, ’ua fa’ari’i au i te tahi mana’o marū nō te ani ’ia ’ōpani i te ’ūputa i muri ia māua. ’Ua fa’aru’e au i terā mana’o ’e ’ua tāmā vau.

’O Shrek te tahi pua’ahorofenua rahi roa i roto i te fare fa’a’amura’a. ’Ua ha’amata ’oia i te hitahita rahi ’a tāmā ai māua. ’I taua iho taime ra, ’ua horo o Shrek i rāpae i te piha nā roto i te ’ūputa matara noa ’e ’ua horo atu ra nā pīha’i iho i te tahi atu mau pua’ahorofenua i rāpae i te mau ’āua.

’Aua’e rā, ’ua haru te tahi rave ’ohipa ’aravihi o te fare fa’a’amura’a i te hō’ē pātete ’āvena ’e ’ua fa’aho’i ’oi’oi mai ’oia i te pua’ahorofenua. ’A tu’u ai ’oia ia Shrek i roto i tōna piha, ’ua hi’o mai ’oia iā’u ’e ’ua ui mai ra, « E aha tā tātou i ha’api’i ? »

Te ha’api’ira’a pāpū ’o tē tāpirira’a ïa i te ’ūputa. ’Ua fa’aha’amana’ohia iā’u te hō’ē pāpa’ira’a mo’a tā’u i tai’o i taua po’ipo’i ra o tei ha’api’i iā’u ’ia auraro « i te mau arata’ira’a a te Vārua Mo’a » (Mosia 3:19).

I tō māua Elder Saltern tomora’a atu i roto i te piha o Shrek, ’ua tāu’a ’ore au i te muhumuhu a te Vārua Maita’i nō te ’ōpani i te ’ūputa. ’Ua tūra’i au i te Vārua ’ia muhumuhu noa mai i te mea tā’u i mana’o e mau mea « pae vārua » i tū’atihia i te mau pāpa’ira’a mo’a ’e ’aore rā i te mau fa’auera’a. ’Ua fa’aha’eha’a teie ’ohipa iā’u. ’Ua ’ite a’era vau e ’ua rahi roa a’e te ’ite o te Vārua i tā’u i ’ite—’oia ato’a i te fa’a’amura’a i te ’ānīmara !

’Ua ha’api’i te peresideni Thomas S. Monson (1927–2018), « ’A ha’amana’o e ’ere nā ’outou ’e nā’u ana’e teie ’ohipa. Mai te mea tei roto tātou i te ’ohipa a te Fatu, e ti’ara’a tō tātou ’ia fa’ari’i i te tauturu a te Fatu. »

’Aita paha vau i ha’api’i i te ’evanelia i te fare fa’a’amura’a, mai tā’u e rave i taua ’āru’i ra ’e ’o Elder Saltern, ’ua ti’a rā iā’u ’ia fa’ari’i i te tauturu ’e te arata’ira’a a te ra’i—’oia ato’a nō te tāmā i te piha fa’aeara’a o te pua’ahorofenua.