’Ua paraparau te Atua i te feiā mo’a mātāmua—E paraparau ānei ’oia iā’u ?

Te pure ha’eha’a a Iosepha

’Ua ha’amata ma te hō’ē uira’a. ’E ’ua riro mai mai tā Elder Alexander Dushku nō te Hitu ’Ahuru i parau ’ei « ’ana’ana ’ū’ana o te māramarama ’e te parau mau. » Nā roto i te pure ha’eha’a a Iosepha Semita ’ua tupu te hō’ē fārereira’a nehenehe ’e te Metua i te ao ra ’e Iesu Mesia (hi’o Iosepha Semita—’Ā’amu 1:14–17). Noa atu te māere ’ia paraparau mata ’e mata ’e te Atua, e ’ohipa varavara ’e te mo’a.

Noa atu ē, e’ita tātou pā’āto’a e fāna’o mai ia Iosepha, « e nehenehe ato’a e roa’a ia tātou i tō tātou iho pou o te māramarama—hō’ē hihi i te hō’ē ā taime. » ’Ia ui ana’e tātou i te hō’ē uira’a ma te tūturi ma te pure ha’eha’a, e fa’ari’i tātou i te pāhonora’a nō ’ō mai i te Atua nā roto i te Vārua Maita’i.

Hōho’a nō te ’āpo’o bāpetizora’a i te hiero nō Ogden (Utah, Marite)

Te mana o te hiero

’Ua fa’atūsia te feiā mo’a i Kirtland (Ohio) i tō rātou taime, te moni ’e te pūai nō te patu i te fare o te Fatu. I te ha’amo’ara’a o te hiero nō Kirtland, ’ua pure Iosepha Semita i te Atua ’ia ha’amaita’i mai i teie feiā mo’a ha’apa’o maita’i i te mana ’a tomo mai ai rātou ’e ’a ha’amori ai (hi’o Te Ha’api’ira’a Tumu ’e te mau Fafaura’a 109:13). E riro mai te hiero « ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te hanahana ’e nō te Atua » (Te Ha’api’ira’a Tumu ’e te mau Fafaura’a 109:16).

I te mau mahana hope’a nei, ’ua ha’amaita’ihia tātou e mau hiero ’ati a’e te ao nei. ’Ua parau-fafau-hia mai ē e fa’ari’i tātou i te heheura’a ’a haere ai i te hiero. ’Ua parau te peresideni Russell M. Nelson ’aita i maoro a’enei ē, « i roto i te hiero e nehenehe tātou e ‘fāri’i i te ’īra’a nō te Vārua Maita’i’ [Te Ha’api’ira’a Tumu ’e te mau Fafaura’a 109:15]. ’A feruri na e aha te aura’a nō te reira fafaura’a i roto i te parau nō te matarara’a te mau ra’i i te ta’ata e ’imi ma te tu’utu’u ’ore i te parau mau mure ’ore. »

Te uira’a a Hyrum i te peropheta

’Ua uiui a’enei tō ’outou mana’o e aha te huru ’ia ui i te peropheta ’ia paraparau i te Atua nō ’outou ? ’Ua nā reira ’o Hyrum, te taea’e o te peropheta Iosepha. ’Ua fa’ari’i ’oia i teie parau a’o a te Fatu nā roto ia Iosepha : « Inaha, ’o Hyrum ’oe, tā’u tamaiti ; ’a mata na i te ’imi i te bāsileia o te Atua, ’ei reira e ’āmui-ato’a-hia mai ai te mau mea ti’a ato’a » (Te Ha’api’ira’a Tumu ’e te mau Fafaura’a 11:23).

I te tahi taime, e tae mai te arata’ira’a nā roto i te tahi atu mau ta’ata. ’Ua a’o mai te peresideni Russell M. Nelson ’ia « ’imi i te arata’ira’a i pīha’i iho i te mau reo e nehenehe tā ’outou e ti’aturi—te mau peropheta, te mau hi’o, ’e te mau heheu parau ’e i roto i te muhumuhu a te Vārua Maita’i. » Noa atu ē, e’ita tā tātou pā’āto’a e nehenehe e ui ’āfaro i te peropheta i tā tātou mau uira’a, e nehenehe rā tātou e fa’ari’i i te pāhonora’a i tā tātou iho mau uira’a.

Hōho’a nō Oliver Cowdery nā Lewis A. Ramsey

’Imira’a ma te fa’aro’o a Oliver

E tauturu hau a’e i te maita’i ’o Oliver Cowdery nō Iosepha i roto i te ’īritira’a o te Buka a Moromona. I te matahiti 1829 rā, ’ua tupu tōna mana’o ’ino’ino. Nō te aha e’ita tāna e nehenehe e ’īriti ? ’Ua hōro’a te Fatu ia Oliver i te tahi parau a’o ta’a ’ē nō ni’a i te huru e noa’a ai te pāhonora’a i tāna uira’a—e parau a’o e tano ato’a nō teie nei tau.

E uira’a ana’e tā tātou, tē fa’aitoitohia nei tātou ’ia ’imi i te reira, ma te fa’aro’o ’e ma te tūru’i i ni’a i te mau mana’o e tae mai (hi’o Te Ha’api’ira’a Tumu ’e te mau Fafaura’a 9:6–9). Te mau mana’o e tae mai, mai te mana’o ïa i te ’ā’au, e mana’o māhanahana ’aore rā e mana’o hau. Mai tā Elder Mathias Held nō te Hitu ’Ahuru i parau : « ’ia tū’ati ana’e [te ferurira’a ’e te fa’aurura’a a te Vārua Maita’i], e fa’a’itehia mai te hō’ē hōho’a hope roa nō te vai-mau-ra’a o te mau mea mai tōna vaira’a mau. »

Hōho’a nā Craig Alan Shelley

Te mau ha’amaita’ira’a patereareha o te ’utuāfare Smith

I roto te mau ha’amaita’ira’a patereareha i te ’Ēkālesia mai te tau mai ā o te Faufa’a Tahito (hi’o Genese 48). I te fa’anahora’ahia te ’Ēkālesia i te mau mahana hope’a nei, ’ua parau te Atua ia Iosepha ’ia pi’i i tōna metua tāne, Joseph Smith metua, ’ei patereareha, i te matahiti 1834. Toru mahana i muri mai, ’ua putuputu te ’utuāfare Smith ’ia ti’a ia Iosepha Semita, metua ’ia hōro’a i te hō’ē ha’amaita’ira’a patereareha i tāna tamari’i tāta’itahi ’e tō rātou hoa fa’aipoipo. ’Ua hōro’a mai teie mau ha’amaita’ira’a i te parau a’o ’e te tāmāhanahanara’a i tō rātou orara’a.

Ta’a ’ē noa atu te fa’ahitira’a i te ’ōpū, te ha’amaita’ira’a « e pāpa’ira’a mo’a nō ’outou iho » ïa. ’A tai’o tāmau ai tātou i tō tātou ha’amaita’ira’a patereareha, « ’ia fa’aherehere i tāna mau parau, ’ia feruri i te reira ’e e ora ’ia vai ti’a-mā noa nō te fari’i i te mau ha’amaita’ira’a tei fafauhia i roto i teie orara’a ’e i te ao mure ’ore ».

Hōho’a nō Emma Smith, nā Lee Greene Richards

Te arata’ira’a ta’a ’ē a Emma nō ’ō mai i te Atua

’Ei vahine fa’aipoipo nō te peropheta, ’ua tāfifi ’o Emma Smith i te mau tāmatara’a ’e te mau umeumera’a tei tītauhia i tōna ’utuāfare ’ia amo. I roto i Te Ha’api’ira’a Tumu ’e te mau Fafaura’a 25, e nehenehe tātou e tai’o i te mau parau tāmāhanahana ’e te ha’apūai a te Metua i te ao ra ia Emma ra.

’Ia ’imi ana’e tātou i tā tātou iho mau poro’i tāmāhanahanara’a nō ’ō mai i te Metua i te ao ra, e nehenehe e ani i te mau ha’amaita’ira’a autahu’ara’a. Mai tā te peresideni James E. Faust (1920–2007), tauturu piti i roto i te Peresidenira’a Mātāmua i ha’api’i : « E nehenehe te mau ha’amaita’ira’a autahu’ara’a e tauturu ia tātou i roto i te mau fa’aotira’a iti ’e te rahi o tō tātou orara’a. Mai te mea ē, nā roto i tā tātou mau ha’amaita’ira’a autahu’ara’a, e nehenehe tātou e ’ite i te hō’ē noa tuha’a iti o te ta’ata tā te Atua i ’ōpua ia tātou ’ia riro, e mo’e ïa tō tātou mata’u ’e e ’ore roa tātou e fē’a’a fa’ahou. »

Hōho’a nō Joseph F. Smith nā Albert Salzbrenner

Te ’imira’a pāpa’ira’a mo’a a Joseph F. Smith

I te tā’irira’a te ma’i, te tama’i ’e te pohe i te ao nei i te matahiti 1918 ra, ’ua fāriu te peropheta Joseph F. Smith i ni’a i te mau pāpa’ira’a mo’a nō te pāhonora’a. I muri a’e i tōna tai’o-māite-ra’a i te mau parau a Petero i roto i te Faufa’a ’Āpī, ’ua ha’amata ’oia i te feruri ’e i te mānavanava. ’Ua haruhia ’oia i roto i te hō’ē ’ōrama nō te ’Ēkālesia, i reira ’oia i te ’itera’a i te Fa’aora tē fa’anaho ra i te ’ohipa misiōnare i roto i te ao vārua. (Hi’o Te Ha’api’ira’a Tumu ’e te mau Fafaura’a 138.)

Mai tā Elder Robert D. Hales (1932–2017) nō te pupu nō te Tino ’Ahuru Ma Piti ’āpōsetolo i ha’api’i : « ’Ia hina’aro tātou i te paraparau i te Atua, e pure tātou. ’E ’ia hina’aro tātou ’ia paraparau mai ’oia ia tātou, e ’imi tātou i te mau pāpa’ira’a mo’a. » Te mau papa’iraa mo’a, ’o te mau parau ïa a te Atua tei fa’ahereherehia i roto i te papa’ira’a, ’e i tō tātou nei tau, e’ita e nehenehe e parau te matarara’a te reira ia tātou. ’A tai’o ’e ’a mānavanava ai tātou i te mau pāpa’ira’a mo’a, e ’itehia mai ia tātou te tauturu a tō te ra’i tei tītauhia na.

Hōho’a nā John McKinney

Te mau tauto’ora’a ’ā’au tae nō te fa’aro’o iāna

’Ua ha’api’i mai te peresideni Russell M. Nelson : « ’A ’imi ai tātou ’ia riro ’ei pipi nā Iesu Mesia, ’ia riro tā tātou mau tūtavara’a ’ia fa’aro’o iāna ’ei tūtavara’a ’ā’au tae mau. ’Ei tūtavara’a ferurihia ’e te tāmau māite tā tātou nō te fa’a’ī i tō tātou orara’a i te mau mahana ato’a i tāna mau parau, i tāna mau ha’api’ira’a, i tāna mau parau mau. » Mai te feiā mo’a mātāmua te huru, e nehenehe tātou e fa’ari’i i te mau poro’i nō ’ō mai i te Atua ra, e poro’i ta’ata hō’ē ’e te pāpū.

’Ua paraparau te Atua ia rātou. E paraparau ’oia ia tātou. Tā tātou noa ’o te fa’aro’ora’a iāna.