Nā vai i fa’a’ī i te ’āpo’o bāpetizora’a ?

Fa’ahōho’ara’a nā David Miles

I muri a’e te ma’irira’a i te hō’ē pereo’o uta ta’ata i Nairobi, ’ua fa’aoti māua tō’u hoa misiōnare e fa’a’ite i te ’evanelia i te mau ta’ata ato’a tā māua i ’ite ’a tīa’i ai māua i te tahi atu pereo’o uta ta’ata nō te haere i tō māua vāhi. ’Ua paraparau māua hau atu i te 400 ta’ata.

Hō’ē o rātou ’o Benard ïa, o tē rave ra i te ’ohipa patura’a fare i pīha’i iho mai. ’Ua hōro’a māua i te hō’ē Buka a Moromona ma te tu’u i te ’ōpuara’a e tai’o i te reira i te mau mahana ato’a ’e e ani i te Atua e parau mau ānei te reira.

E maha ’āva’e i muri mai, ’ua tonohia vau i Nairobi. I tā’u purera’a ’ōro’a mātāmua i reira, ’ua ’ite au ia Benard. Mai taua taime ra ’ua bāpetizo ’e ’ua fa’atōro’ahia ’oia i te Autahu’ara’a a Aarona.

’Ua ani manihini Benard ia māua ’ia haere i tōna fare nō te fārerei ’e nō te ha’api’i i tāna vahine, ’o Megan. I tō māua fārereira’a ia Megan, ’ua māere māua i tōna fa’aro’o rahi. I tōna purera’a nō te ’ite e parau mau ānei tā māua poro’i, ’ua pāhono mai te Atua i tāna pure.

’Ua ani māua ia Megan ’ia bāpetizo i te Sābati i muri iho. Terā rā, i taua hepetoma ra, ’ua fa’aara te ’oire o Nairobi e tāpūhia te pape e 10 mahana te maoro ! I muri a’e i te uiuira’a bāpetizora’a ’o Megan i te mahana mā’a, ’ua pure māua tō’u hoa misiōnare ’ia nehenehe i tōna bāpetizora’a ’ia tupu i te mahana nō muri iho.

’Ua ha’apae mātou i te mā’a, ’ua paraparau i tō mātou feia fa’atere, ’e ’ua tāmata mātou i te mau rāve’a rau nō te fa’ari’i i te pape—’aita hō’ē a’e i manuia. I taua pō ra, ’ua fa’aineine ihoā mātou nō te bāpetizora’a. I muri iho ’ua tūturi māua ’e ’ua pure fa’ahou. ’Ua fa’auruhia māua ’ia tāmau i te hō’ē hope’ara’a o te hō’ē tuiō i ni’a i te rōpīnē pape marō nō te vāhi tunura’a o te fare purera’a ’e ’ia tu’u i te tahi hope’a i roto i te ’āpo’o bāpetizora’a. ’Ua pure fa’ahou māua, ’ua pōnao ’e ’ua ho’i i te fare.

Ia po’ipo’i a’e, ’a haere ai maua i te fare pureraa, ’ua māere roa māua i te mea e ’ua ’ī te ’āpo’o i te pape ! ’Ua hi’opo’a māua i te fare tūtu, ’aita rā e pape i topa mai. ’Aita roa atu hō’ē ta’ata nō roto i te ’āma’a i ’ite noa a’e ē mea nāhea te ’āpo’o bāpetizora’a i te fa’a’īra’ahia.

’Ua bāpetizohia Megan i taua mahana ra. ’Ua haere mai te pāroita tā’āto’a nō te ’ite i tōna bāpetizora’a ’e nō te fa’ari’i iāna i roto i te ’Ēkālesia. ’Ua vai marō noa te rōpīne, terā rā, ’ua rari te mata o te mau ta’ata ato’a i te māuruuru.

’Ua ha’api’i te peresideni Russell M. Nelson, « E ha’amaita’i mai te Fatu ia ’outou i te mau semeio mai te mea e ti’aturi ’outou iāna, ’aore e fē’a’a hō’ē iti noa a’e’ [Moromona 9:21]. ’A rave i te ’ohipa pae vārua nō te ’imi i te mau temeio. » ’Ua ’ite au ē nō te mea ’ua rave māua tō’u hoa i te ’ohipa pae tino ’e te pae vārua—te purera’a, te tāmatara’a i te mau rāve’a rau, ’e te pe’era’a i te mau muhumuhu pae vārua—’ua ’ite māua i te hō’ē temeio nō ’ō mai i te Fatu ra.