Tē hina’aro nei te Metua i te ao ra ’ia paraparau ia ’outou

Mai ia Adamu rāua ’o Eva ’oia ato’a te feiā i muri iho, ’ua fa’aue mai te hō’ē melahi, « e tātarahapa ’oe ma te ti’aoro atu i te Atua nā roto i te i’oa o te Tamaiti e a muri noa atu » (Mose 5:8).

’Ua ha’api’i Iesu : « E ani, e hōro’ahia mai tā ’outou ; e ’imi, e ’itea ïa ’outou ; e pātōtō atu, e ’īritihia mai te ’ōpani ia ’outou » (Mataio 7:7). « ’Ia pure ’oe ra […] ’a pure i tō Metua […] i te vāhi mo’emo’e ra] » (Mataio 6:6). « E nā ’ō ’outou ’ia pure : E tō mātou Metua i te Ao ra, ’ia ra’a tō ’oe i’oa » (Mataio 6:9).

’Ua pure tāmau Iesu i tōna metua tāne ra. « I te reira pu’e mahana tōna ha’api’ira’a i ni’a i te hō’ē mou’a e pure, e ao noa ihora te ru’i iāna i te purera’a atu i te Atua » (Luka 6:12). « ’E […] ’ua haere atu ’oia i roto i te hō’ē mou’a nō te pure » (Mareko 6:46). « ’E tae atu ra rātou i te hō’ē vāhi ’o Getesemane te i’oa, ’ua parau mai ra ’oia i tāna mau pipi, e pārahi ’outou i ’ō nei, ’ia pure au » (Mareko 14:32). I ni’a i te sātauro, ’ua pure Iesu nō te mau fa’ehau tei fa’asātauro iāna : « E ta’u Metua, e fa’aore mai i tā rātou hara, ’aore ho’i rātou i ’ite i tā rātou e rave nei » (Luka 23:34).

Tē a’o mai nei te mau pāpa’ira’a mo’a ia tātou ’ia « pure tāmau noa » (Luka 21:36; 2 Nephi 32:9; 3 Nephi 18:15; Te Ha’api’ira’a Tumu ’e te mau Fafaura’a 10:5; 19:38; 20:33; 31:12). « ’A paraparau atu i te Fatu i te mau mea ato’a tā ’oe e rave ra, ’e nāna ho’i ’oe e arata’i i te maita’i » (Alama 37:6, 37). Ta’a ’ē noa atu i te reira, tē « mai te mea e hope te mana ato’a o tō ’outou vārua i te ha’amaita’i ’e i te ’ārue i taua Atua » (Mosia 2:20), ma te ’ite i te mau mea ato’a tā tō tātou Metua e rave nō tātou.

’Ua fa’ata’a peresideni Russell M. Nelson : « E ha’amata te fa’atura iāna iho pae vārua nā roto i te ’itera’a ē, te po’ipo’i ’āpī tāta’itahi, e hōro’a ïa nō ’ō mai i te Atua ra […] E pāruru ’oia ia tātou i terā mahana ’e terā mahana ’e e pāturu ia tātou i terā ’e terā taime (hi’o Mosia 2:21) ».

’Ua ha’api’i Nephi ē : « Mai te mea e fa’aro’o ’outou i te Vārua ’o tē ha’api’i i te ta’ata ’ia pure, e ’ite ïa ’outou i reira ē, e mea ti’a ia ’outou ’ia pure ; ’aita ho’i te vārua ’ino e ha’api’i nei i te ta’ata ’ia pure, tē ha’api’i nei rā te reira iāna ’eiaha e pure » (2 Nephi 32:8).

E fa’a’itera’a nō Te Mesia i te fa’ati’ara’a i te tamāhine a Iaeiro, nā Greg K. Olsen

Nā roto i te hi’ora’a o tō tātou Fa’aora ’e te a’o a te mau melahi ’e te mau peropheta i roto i te mau tenetere e rave rahi, ’ua ’ite pāpū tātou i te pure i te mau mahana ato’a ’ia fa’a’ite i te māuruuru nō tō tātou mau ha’amaita’ira’a, ’e ’ia pure tāmau noa i roto i tō tātou ’ā’au. E hōpoi’a nā tātou ’ia paraparau i tō tātou Metua.

Hau atu rā i te hanahana, e pāhono mai tō tātou Metua i te ao ra i tā tātou mau pure. Hō’ē uira’a pāpū i roto i teie ao tāhuti nei e ti’a ’ia ui, ’oia ho’i, nāhea tātou ’ia fa’ari’i maita’i a’e ’e ’ia hāro’aro’a i te mau pāhonora’a, te arata’ira’a ’e te tāmāhanahanara’a nō ’ō mai i tō tātou Metua ra ?

I roto o nā hitu ’ahuru matahiti hau o tō’u orara’a, ’ua ’ite au ē, te paraparau mai nei tō tātou Metua ia tātou. ’Aita tātou i vai ’ōtahi noa. Tē ha’apa’o nei te mau ta’ata o te ra’i ia tātou ’e e tauturu ia tātou ’a ’imi ai tātou ’ia pe’e i te Fa’aora.

E ha’amata te fa’ari’ira’a i te mau pāhonora’a i tā tātou mau pure nā roto i tō tātou fa’aro’o i tō tātou Metua i te ao ra ’e i tāna Tamaiti, ’o Iesu Mesia. ’Ua parau a’enei Iesu, « ’Eiaha e mata’u, e fa’aro’o noa mai » (Mareko 5:36). Tē ti’aturi nei tātou iāna, tē fa’aitoito roa nei tātou ’ia ha’apa’o i te mau fa’auera’a, ’e ’ia ’imi i tōna rima i roto i te mau mea ato’a. « E ’aore roa te ta’ata nei e fa’a’ino i te Atua […] maori rā ia rātou ’o tē ’ore i fā’i mai i tōna rima i roto i te mau mea ato’a, ’e ’o tē ’ore ho’i e ha’apa’o i tāna ra mau fa’auera’a » (Te Ha’api’ira’a Tumu ’e te mau Fafaura’a 59:21).

’Aita te rima ’o te Atua i roto i tō tātou orara’a te tumu e tupu ai te mau ’ati ’ino ’aore rā te mau ’ati rahi i roto i tō tātou nei ao. Terā rā, te aura’a rā, i roto i tō ’outou mau taime fifi ’e te tano ’ore, e ti’a mai ’oia i pīha’i iho ia ’outou, e ha’apūai i tō ’outou ’aravihi, e tāmāhanahana ia ’outou, ’e e « ha’amo’a i tō ’oe mau ’ati ’ei maita’i nō ’oe » (2 Nephi 2:2).

Mai te mea e fa’aro’o tō tātou iāna ’e e ha’apa’o tātou i tāna mau fa’auera’a, e ha’api’i ’ohie mai tātou ’ia fa’aro’o maita’i a’e i tōna reo.

I te ’āva’e Tetepa 1993, tā’u matahiti mātāmua ’ei ti’a fa’atere rahi, te peresideni James E. Faust (1920–2007), e melo nō te Pupu nō te Tino ’Ahuru Ma Piti ’āposetolo i taua taime ra, ’ua ani manihini i tā’u vahine, ’o Kathy, ’e ’o vau nei ia haere i te hō’ē purera’a nā muri iāna i te fare ha’api’ira’a teitei nō Brigham Young. ’A ha’amana’o na, te matahiti 1993 nā mua a’e i te pararera’a o te niuniu ’āfa’ifa’i, te tūreiara’a sōtiare ’e te itenati.

I roto i tāna a’ora’a, tei pi’ihia « Te reo o te Vārua », ’ua fa’aara te peresideni Faust : « I roto i tō ’outou u’i, e ha’apūaihia ’outou e te rahira’a reo e parau nei ia ’outou nāhea ’ia ora, nāhea ’ia fa’ati’a i tō ’outou mau hina’aro, nāhea ’ia fa’ari’i i te tā’āto’ara’a o te reira. I mua ia ’outou hau e pae hānere rēni teata pata ’ōhia noa. E vai mai te mau pāpa’ira’a rorouira rau, te mau ’ohipa fa’aaura’a rorouira, te mau putu itenati ’e te mau rāve’a pāpa’ira’a ; te vai rā te nene’ira’a i te fare, ’e te ’āfata ’apo parau pe’e’utari, ’e te ’āparaura’a natihia o te fa’a’ī ia ’outou e te mau ha’amāramaramara’a rau […] Te reo e ti’a ia ’outou ’ia ha’api’i mai o te reo ïa o te Vārua ».

’Ua ha’api’i mai te peresideni Boyd K. Packer (1924–2015), peresideni nō te pupu nō te Tino ’Ahuru Ma Piti ’āpōsetolo, nō ni’a i te reo iti tāmau ’e te ha’iha’i o te Vārua i tōna fa’ati’ara’a i te hō’ē ’ā’amu nō John Burroughs, hō’ē ’aivana’a nō te nātura, ’a hāhaere ai ’oia nā muri i te mau hoa i roto i te ’āua i ’ī i te ta’ata e rave rahi. Teie te mau parau a te peresideni Packer :

« I ni’a i te māniania o te ’oire ’ua fa’aro’o [Burroughs Tāne] i te hīmene a te hō’ē manu.

« U’a fa’aeari’i ’oia ’e ’ua fa’aro’o ! ’Aita te feiā i pīha’i iho iāna i fa’aro’o i te reira. ’Ua hiʼo hā’ati a’era ’oia. ’Aita e ta’ata ’ē atu i fa’aro’o i te reira.

« ’Ua fifi ri’i ’oia nō te ’erera’a te ta’ata i teie ’ohipa nehenehe mau.

« ’Ua rave ’oia i te hō’ē moni mai roto mai i tōna pute ’e ’ua pata i te reira i roto i te aore. I te tai’ara’a punu o te moni i te topara’a, e ’aita i hau a’e i te hīmene a te manu. Pauroa te ta’ata i huri mai ; ’ua fa’aro’o rātou i te reira !

« E mea fifi hoa ’ia fa’ata’a ’ē i te mau māniania ato’a o te terera’a pere’o’o i te hīmene o te hō’ē manu. E nehenehe rā e fa’aro’hia. E nehenehe tā ’outou e fa’aro’o maita’i mai te mea ē, e ha’api’i ’outou ia ’outou iho ’ia fa’aro’o i te reira ».

’Ua tupu te mau ha’api’ira’a a te peresideni Packer nō ni’a i te Vārua Maita’i i te matahiti 1979, i te hō’ē tau mea iti te māniania i tō teie tau.

’Ua ha’api’i te peresideni Nelson : « Mai te mea rā ē, e mea rahi a’e tō ’outou haʼapaʼora’a i te natiraʼa sōtiare hau atu i te mau muhumuhu a te Vārua, te tu’u ra ’outou ia ’outou iho i roto i te fifi pae vārua ».

’Ua parau te peresideni Faust ē, « Mai te mea e, e fa’aro’o tātou i te reo o te Vārua, e ti’a ’ia ’īriti i tō tātou tari’a, ’ia fāriu i te mata o te fa’aro’o i ni’a i te puna o te reo, ’e ’ia hi’o ’aueue ’ore i te ra’i ra ».

E tae mai teie reo o te Vārua i tō tātou ferurira’a ’e i tō tātou mau nīno’a mana’o. « E fa’a’ite au ia ’oe, i roto i tō ’oe ferurira’a ’e i roto i tō ’oe ’ā’au na, nā roto i te Vārua Maita’i, ’o tē tae i ni’a ia ’oe ’e ’o tē pārahi i roto i tō ’oe ’ā’au » (Te Ha’api’ira’a Tumu ’e te mau Fafaura’a 8:2 ’A fa’aro’o i tō manava—pinepine te heheura’a i te ha’amata i reira.

Pure ma te ’ā’au ti’aturi

E’ita te mau pāhonora’a ’e te mau mana’o e fa’ahepohia. E pure tātou ’e e tīa’i tātou ma te ’ā’au ti’aturi. E’ita te tahi mau pāhonora’a e tae mai i roto i teie orara’a, i te feiā parauti’a rā, e tono noa mai te Fatu i tōna hau (hi’o Ioane 14:27). E tae pinepine mai te mau pāhonora’a ’ia pure ana’e tātou nō te tauturu i te feiā ’ati a’e ia tātou. I te tahi taime, e tae mai te reira « te fa’aue nā ni’a iho i te fa’aue, te a’o nā ni’a iho i te a’o » (Te Ha’api’ira’a Tumu ’e te mau Fafaura’a 98:12).

E nehenehe te reo o te ra’i e tae mai ia tātou i te mau taime mana’o-’ore-hia ’e i te mau vāhi mana’o-’ore-hia, e ’ite rā tātou i tā tātou mau rāve’a māere i roto i te mau vāhi hau ’e te mau vāhi mo’a. I roto i te hau o tā’u mau pure i te po’ipo’i ’e te feruri-hōhonu-ra’a, e ’itehia iā’u te mau ha’amaita’ira’a ta’a ’ē mau. Te tai’ora’a tu’utu’u ’ore i te mau pāpa’ira’a mo’a, noa atu mea tai’o noa, e hōpoi mai te reira i te reo o te Vārua i tō tātou ’ā’au mai te auahi i te huru ’ia tae i te tahi taime.

I te tahi taime, nō roto ihoā mai i te mea e tai’ohia rā te mau fa’aurura’a, ’e vetahi, nō te mau mea e ferurihia rā, nā te reira hōro’a i te pāhonora’a nō te hō’ē fifi ’ē roa. E ha’amana’o nā i te mau parau a Elder Robert D. Hales : « ’Ia hina’aro tātou i te paraparau i te Atua, e pure tātou. ’E ’ia hina’aro tātou ’ia paraparau mai ’oia ia tātou, e ’imi tātou i roto i te mau pāpa’ira’a mo’a. »

’A fa’a’ati noa ai te māniania ’e te fa’anevanevara’a o te ao ia tātou, ’ua fa’aue te Fatu i tāna peropheta ’ia patu rahi atu ā i te mau hiero. I roto i teie mau fare mo’a o te Fatu, ’a vaiiho ai tātou i tō tātou mau tāmatara’a i rāpae, tē tomo rā tātou i roto i tā tātou mau pure ’e mau māna’ona’ora’a, ’ua ha’api’ihia tātou i te mau parau mau nō te tau mure ’ore.

Hō’ē matahiti i ma’iri a’enei, ’ua hōro’a mai te peresideni Nelson ia tātou i teie fafaura’a fa’ahiahia : « E au mau taea’e, ’e au mau tuahine here, teie tā’u fafaura’a. ’Aita hō’ē mea e tauturu hau atu ia ’outou ’ia tāpe’a pāpū i ni’a i te ’āuri maori rā te ha’amori-tāmau-ra’a i roto i te hiero ’ia au i te huru o tō ’outou orara’a. ’Aita hō’ē mea e pāruru hau atu ia ’outou ’ia fārerei ana’e ’outou i te mau māhu pōiri o te ao nei. ’Aita hō’ē mea e ha’apūai hau atui tō ’outou ’itera’a pāpū nō ni’a i te Fatu Iesu Mesia ’e tāna tāra’ehara ’aore rā, e tauturu ia ’outou ’ia hāro’aro’a hau atu i te fa’anahora’a nehenehe a te Atua. ’Aita hō’ē mea e tāmarū hau atu i tō ’outou vārua i roto i te mau taime māuiui. ’Aita hō’ē mea e ’īriti hau atui te mau ra’i. ’Aita hō’ē a’e ! »

E hōro’a mai te ’āmuira’a rahi tāta’itahi i te tahi atu ā mau ha’amaita’ira’a e rave rahi. I te ’āva’e nō ’Ēperēra, e putuputu fa’ahou ā tātou i roto i te ’āmuira’a rahi nō te fa’aro’o i te reo o te Fatu. Tē haere mai nei tātou i te ’āmuira’a rahi ma te pure ’e te fa’aineinera’a. Nō tātou e rave rahi, tē vai nei te ha’ape’ape’ara’a ’e te mau uira’a o te ’ā’au. ’Ua hina’aro tātou i te fa’a’āpī i tō tātou fa’aro’o i te Fa’aora ia Iesu Mesia ’e e ha’apūai i tō tātou ’aravihi ’ia pāto’i i te fa’ahemara’a. ’Ua haere mai tātou ’ia ha’api’ihia mai te ra’i mai. Tē fafau atu nei au ia ’outou ē, ’a fa’aineine ai ’outou ’e ’a haere mai ai ’outou nā roto i te pure i te mau tuha’a purera’a o te ’āmuira’a rahi, e fa’ari’i ’outou i te mau pāhonora’a i tā ’outou mau mana’ona’ora’a, ’e e ’ite ’outou ē, tei ni’a ia ’outou te « rima o te ra’i ».

’Ia vai te fa’aro’o, ē tē paraparau mai nei tō ’outou Metua i te Ao ra ia ’outou. ’oia mau ! ’A vaiiho i tō ’outou fa’aro’o iāna ’e i tāna Tamaiti here ’ia tauturu ia ’outou ’riro ’ei tuha’a nō te pāruru ’e e fa’ari’i i te reo o te Metua. Tē fa’a’ite pāpū nei au ē, tei reira ’oia ’e tē here nei ’oia ia ’outou hau atu i te mau parau e nehenehe e parau.