7 rāve’a nō te ’oa’oa i te pehe fa’auru mau

Hōho’a nā David Green

I te roara’a o te tau, ’ua riro noa ana te pehe ’ei tuha’a faufa’a roa nō te ha’amorira’a a te mau pipi a Iesu Mesia.

E rave rahi salamo i roto i te Faufa’a Tahito e mau hīmene ’āruera’a i te Fatu. Tē pāpa’i nei te Faufa’a ’Āpī ē, ’ua hīmene ’āmui Iesu ’e tāna mau ’āpōsetolo i te hō’ē hīmene purera’a, hou ’a haere ai i Getesemane (hi’o Mataio 26:30). ’E e ha’amaita’i rahi te mau hīmene purera’a i tā tātou ha’amorira’a i te mau purera’a ’ōro’a i teie mahana.

E mea ’ana’anatae roa te hāmanira’a e tupu nei nō te buka hīmene ’āpī, ’e e nehenehe tātou e tīa’i ma te ieie e rave rahi atu ā mau hīmene purera’a ’āpī, ’a nu’u noa ai te fa’anahora’a i mua. E ’ere rā te mau hīmene purera’a i te huru pehe ana’e ’o tē nehenehe e fa’auru ia tātou. ’Ua rau te huru pehe i roto i nā fa’aaura’a rorouira a te ’Ēkālesia, te Vaira’a buka ’evanelia ’e te Pehe mo’a, nō te fa’aro’o i te pehe mai te pehe pupu hīmene matarohia ē tae atu i te pehe tīhauhau nō teie tau (’aita e tītauhia ’ia riro ’ei taure’a nō te ’ana’anatae i te mau rīpene pehe Strive to be !). I roto i teie mau fa’aaura’a rorouira, e nehenehe e ’itehia mai te mau fa’aharuharura’a tano ’e te fa’auru mau, e rave rahi tei roto te ’api nota pehe ’o tā ’outou e nehenehe e hā’uti ’aore rā e hīmene iho.

Teie te tahi mau mana’o nō te tauturu ia ’outou ’ia fa’aō mai i te pehe fa’auru mau i roto i tā ’outou ha’amorira’a i te fare—noa atu ’aita ’outou i ha’api’ipi’ihia te pehe :

• ’A fa’aro’o i te mau fa’aharuharura’a o te mau hīmene purera’a ’e te tahi atu mau hīmene fa’auru mau i te roara’a o te hepetoma. E nehenehe te reira e ’itehia mai i roto i nā fa’aaura’a rorouira nō te Vaira’a buka ’evanelia ’aore rā te Pehe mo’a, ’aore rā i roto i te Vaira’a pehe i ni’a i te tahua natirara a te ’Ēkālesia.

• ’A ’imi i te mau ’ā’amu o te mau hīmene purera’a ’e ’a hi’o e aha te mea i fa’auruhia ai te reira.

• ’A hīmene i te mau hīmene purera’a ’e ’a ha’api’i mai i te mau ’āuri ta’a ’ē ma te fa’a’ohipara’a i te rāve’a ’Api nota pehe i ni’a i te fa’aaura’a rorouira Pehe mo’a ’aore rā i ni’a i te tahua natirara a te ’Ēkālesia.

• ’A fa’aro’o i te pupu hīmene a te Fare Menemene ’aore rā Strive to Be i ni’a i tā ’outou fa’anahora’a fa’aro’ora’a au roa a’e (mai te YouTube, Spotify, Apple Music, Pandora).

• ’A ha’api’i mai i te ha’uti i te mau hīmene mo’a ’e te tahi atu mau hīmene fa’auruhia i ni’a i te piāna ’aore rā te tita, ma te fa’a’ohipara’a i te mau ’api nota pehe ’aore rā te mau fa’atanotanora’a e vai ra i roto i te fa’aaura’a rorouira Vaira’a buka ’evanelia ’aore rā i ni’a i te tahua natirara a te ’Ēkālesia.

• ’A ’imi māite ’e ’a feruri hōhonu i ni’a i te mau paraparau o te mau hīmene ’e te mau hīmene mo’a fa’auruhia.

• ’A pe’e i te mau paraparau ma te fa’aro’ora’a i te mau hīmenera’a a te pupu hīmene a te Fare menemene nō Temple Square. E roa’a te mau hīmenera’a a te pupu hīmene i ni’a i te rēni YouTube.