Tō’u ’ē’a nō te fa’a’oroma’i māite

Hōho’a nō te ta’ata pāpa’i nā Shaun Sutton

I tō’u ho’ira’a i te fenua Philipino apato’a i te matahiti 2016 i muri a’e i tō’u tāvinira’a i te hō’ē misiōni maita’i roa i te fenua Philipino apato’erau, tē tīa’i ra vau i te taime e haere ai au i te ha’api’ira’a tuatoru Brigham Young University–Hawaii ’e ’ia fa’ari’i i te tahi atu mau ’ohipa fa’ahiahia e tīa’i ra i te feiā ’āpī pa’ari.

Mai te reira taime, ’ua ha’amata a’era vau i te pārarai. ’Ua ’itehia i tō’u taote ē e ma’i ’arapo’a rahi tō’u. ’Ua ri’ari’a roa vau i te mau fa’ahope’ara’a mai te mea e’ita teie ma’i e rapa’auhia.

Noa atu te rapa’aura’a, ’ua ha’amata tō’u tino i te taui. ’Ua ha’amata tō’u mata i te ’oru, ’e ’ua pārarai roa vau. ’Ua ’ape au ’ia patahia tō’u hōho’a ’e ’ia hi’o iā’u i roto i te hi’o-hipa nō tō’u hōho’a rāpae.

’Ua ha’amata marū noa te rā’au i te tauturu. E toru rā matahiti i muri mai, ’ua ’itehia i ni’a iā’u te piti o te ma’i—e ma’i fa’aturuma. ’Ua ha’afifi teie nā ma’i e piti i tō’u ti’aturira’a iā’u iho. E fa’aitoito vau nō te ti’a i ni’a i te ro’i nō te haere i te ha’api’ira’a, ’e ’ua mana’o vau e’ita e mara’a iā’u ’ia tāvini i roto i te ’Ēkālesia.

’Ua riri au i te mea ’ua vaiiho te Atua ’ia tupu te reira. ’Ua uiui au nō te aha e ti’a ai iā’u ’ia tāvini ma tō’u ’ā’au ato’a ’e tō’u vārua ato’a mai te mea e ’āfai noa mai te reira i te mau tāmatara’a. Nō reira, ’ua fa’ari’i rā vau i te tāmahanahanara’a nā roto i teie mau parau a te peresideni Jeffrey R. Holland, Mono peresideni nō te Pupu nō te Tino ’Ahuru Ma Piti ’Āpōsetolo : « E roa’a ’ia fa’aora i te ferurira’a i pararī mai te mau ivi i pararī ’e te mau ’ā’au i pararī e fa’aorahia ra. » ’Ua ta’i au i tō’u fa’aro’ora’a i te reira mau parau. ’Ua tītauhia i tō’u vārua ’oto ’ia fa’aorahia.

’Ua pa’ari au i roto i te hō’ē ’utuāfare ha’apa’o maita’i, ’e ’ua vai pāpū noa tō’u fa’aro’o i te Metua i te ao ra ’e ia Iesu Mesia noa atu te māuiui ’e te pāpū ’ore. ’Ua fa’ari’i marū ’e ’ua fa’atano vau iā’u iho i tō’u mau huru tupura’a ’āpī.

I teienei, e va’u matahiti i muri mai, ’aita vau i fa’ataere fa’ahouhia e tō’u mau ma’i. Tē fa’ari’i nei au i te reira ’ei tuha’a nō te orara’a. ’Ua maita’i mai au. E nehenehe au e tāvini ’e e ora hope roa i te orara’a, noa atu e tāmau noa te mau tāmatara’a o te ea i tō’u orara’a tā’āto’a. ’Ua ha’api’i au ē ’ua riro te fa’a’oroma’i-māite-ra’a ’ei tuha’a nō te tāhuti nei (hi’o Te Ha’api’ira’a Tumu ’e te mau Fafaura’a 121:7–8). Tē ha’api’i nei au i te inu i tā’u ’āu’a maramara ’e ’ia vai pūai noa.

Tē ’ohipa nei au i teienei i roto i te piha tōro’a nō te hō’ē Ai taiete ’ite i hāmanihia ’e tē ha’api’i nei au i te pō i ni’a i te natirara i te Fare Tua Toru Teitei Brigham Young–Pathway nā te ao ato’a nei. ’Ua fa’aea vau i te ui « Nō te aha ē ’o vau ? » ’e ’ua ha’amata vau i te ui « E aha tā’u e nehenehe e ha’api’i ? Nafea vau e nehenehe ai e fāna’o i teie ’itera’a ? »

’Ia hi’o atu vau i muri, tē ’ite nei au ē tei pīha’i iho te Metua i te ao ra ’e ’o Iesu Mesia iā’u i te mau taime ato’a. Ia haere i mua , ’ua ’ite au ’o vai tā’u e nehenehe e ti’aturi (hi’o Maseli 3:5–6 ; 2 Nephi 4:34).