’Ia vai tū’ati noa i te Fa’aora

Fa’ahōho’ara’a nā David Miles

’I te hō’ē tau māhanahana, ’ua haere tō’u ’utuāfare i te tau fa’afa’aeara’a i te pae apato’a nō te fenua Taina, i reira mātou i te terera’a nā ni’a i te mau mōtō-4-huira nā roto i te uru rā’au ’e te ua. I tō mātou taera’a i te vāhi tāpaera’a o te mau mōtō-4-huira, ’ua māere roa mātou i te hōro’ara’a mai te mau ta’ata arata’i i te mau pereue pāruru ’e te mau taupo’o te mau tīti’a mata pāruru. Noa atu te maita’i ’e te haumi o te reva ’ua mana’o mātou ē ’ua rahi roa te mau tauiha’a, ’ua ’ō’omo rā mātou i terā mau taiha’a.

I muri a’e i tō mātou fa’ari’ira’a i te mau arata’ira’a nō te fa’ahoro, ’ua tere mātou ’e ’ua tāpae i ni’a i te tupu’ai mou’a o tō mātou tere. I reira ’ua fa’aea mātou nō te inu i te pape ’e nō te tāmarō i te hou i ni’a ia mātou tāta’itahi.

’Ua fa’ata’a mai tō mātou ta’ata arata’i e mea fifi ri’i te ha’apoura’a. E titauhia ia mātou ’ia tāpiri roa te tahi i te tahi, e ia fa’ariro mai te pero’o auahi e ia ti’aia te mau mōtō-4-huira te tahi i te tahi nō te ha’apa’ari i te pupu.

’A ha’amata ai mātou i te pou, ’ua pi’i mātou te tahi i te tahi nō te fa’atanotano i tō mātou ha’apoura’a. ’Ua fa’aātea marū noa mātou, ma te vaiiho i te hō’ē ārea i rotopū i tō’u faura’o ’e te mōtō-4-huira o tō’u pāpā ē tō’u tuahine iti, ’ō Vivi. I taua iho taime ra, ’ua pe’e ’o Vivi ’e tō’u pāpā i rāpae atu i tō rāua faura’o ! ’Ua ’ou’a a’e ra tō’u pāpā i ni’a ia Vivi nō te pāruru iāna i te mōtō 4 huira ia tere ’e ta’ahuri atu i ni’a iāna.

’Ua topa roa tō mātou hau i tō mātou ’itera’a atu i tō’u pāpā ’e ’o Vivi i te ti’ara’a mai ’e te tahitahira’a i te repo i ni’a i tō rāua piripou ’āvae roa. Maoti te ahu pāruru tā rāua i ’ō’omo, ’ua pēpē ri’i noa tō’u pāpā. ’Ua ri’ari’a roa ’o Vivi ē ’aita rā ’oia i pēpē. I tō mātou ha’aputuputu fa’ahoura’a, ’ua fa’aha’amana’o-ha’apāpū mai te arata’i ia mātou e ti’a ia mātou ’ia fa’atū’ati maita’i i tō mātou mau mōtō-4-huira ’ia ’ore te reira ’ia ta’ahuri fa’ahou.

I roto i te orara’a, e riro tātou i te fa’ahemahia i te feruri e nehenehe tā tātou e rave i te mau mea nā roto ia tātou hina’aro. Tē mana’o nei tātou ē ’aita e tītauhia ia tātou i te ’ō’omo i te ha’ana tama’i pāruru o te ’evanelia, e riro ho’i te reira ’ei mea au ’ore. ’Oia ato’a, e riro paha tātou i te feruri e mea fifi i te tahi taime ’ia vai tū’ati noa i tō tātou Metua i te ao ra. ’Ia ’ore tātou e nā reira, e nehenehe tātou e tere nā ni’a i te mau ’ē’a ri’ari’a ’e te ataata o te ao nei o tātou ana’e, ma te ro’ohia i te mau ’ati ’e te mau pēpē ’ino pae vārua.

Mai te mea e fa’a’ohipa tātou i te pārurura’a tā te ’evanelia e hōro’a mai ’e e vai tū’ati noa i te Metua i te ao ra ’e ia Iesu Mesia, e nehenehe tātou e fa’aruru i te mau tāmatara’a e vai nei i mua i roto i tō tātou orara’a. Noa atu te ri’ari’a ’e ’aore rā te fa’ari’ari’ara’a i te ’ē’a, ’e nehenehe tātou e manuia i pīha’i iho ia rāua.