Nāhea tā Tātou mau Fafaura’a e Tauturu ai ia Tātou ’ia Tūru’i i ni’a i te Mana o te Atua ?

Hōho’a nā Connor Johnson

E rāve’a tā tātou tāta’itahi ’ia rave i te mau fafaura’a mo’a e te Atua mau o te ra’i. E rave tātou i te mau fafaura’a i te taime e fa’ari’i tātou i te mau ’ōro’a o te autahu’ara’a. ’A ha’apa’o ai tātou i tā tātou mau fafaura’a, e ha’amaita’i mai ’Oia ia tātou e Tōna mana.

E ha’amana’o ana’e i te arata’ira’a a te peresideni Russell M. Nelson nō ni’a i te rāve’a nō te fa’ari’i i te mana nō ’ō mai i te Atua ra : « Te mau tane ’e te mau vahine ato’a o te rave i te mau ’ōro’a o te autahu’ara’a ’e o te rave ’e o te ha’apa’o i te mau fafaura’a e te Atua, e noa’a ïa ia rātou i te mana o te Atua ». ’Ua riro teie tū’atira’a i te mana o Te Atua ’ei hōro’a hāmani maita’i Nāna nō Tāna mau tamari’i.

E aha te huru o teie mana, ’o tē tae mai nā roto i te ha’apa’ora’a i te mau fafaura’a i ravehia nā roto i te mau ’ōro’a o te autahu’ara’a, i te mau mahana tāta’itahi ? Nāhea hō’ē vahine o te fafaura’a e tūru’i ai i ni’a i teie mana hanahana ?

Tē ti’aturi nei au ē, e tauturu teie hi’ora’a tā’u i fa’ari’i ia ’outou, ’a rave ai ’outou i tā ’outou iho ’ohipa pae vārua nō te ’apo mai i te aura’a o te fa’ari’ira’a i te mana o te Atua.

I te hō’ē mahana ’ua fa’ari’i au i te hō’ē poro’i a tā’u tamāhine ho’ovai ’o Amy : « ’A pure na nō Dottie ».

’Aita tā’u mo’otua tamāhine ’o Dottie i ta’oto i te pō nā mua atu. ’Ua ha’apa’o noa ’o Amy i te terā pō tā’āto’a iāna ’e ’ua parau mai, e fiva tō Dottie. ’Ua pau i te hōro’ahia i te rā’au, tei ni’a noa ā te fiva ’o Dottie ’e ’aita ’oia i fa’aea i te hurihuri noa. Inā tā’u tamaiti ’o Connor i te tahi atu vāhi nō tāna ’ohipa ’e ’aita i ’ōpuahia e ho’i mai i te fare nō nā mahana e piti i muri mai.

I te po’ipo’i a’e, ’ua ’itehia mai e te māmā ’ua nīnamu roa te vaha ’o Dottie. ’Ua nīnamu ato’a tōna nā rima ’e ’ua to’eto’e ’ia tāpe’ahia. ’Oi’oi roa Amy i te pe’e i te fa’aurura’a, « ’A rave ia Dottie, ’āfa’i i te taote tamari’i ». ’Ua ha’apa’o ’oia i taua fa’aurura’a, ’ua niuniu i te taote, ’e ’ua ha’apāpū ia rātou ē, e rave ’oi’oi rātou ia Dottie.

’Aua’e rā, tei ’ō noa mai te taote i te fare o tō’u māmā. ’Ua fa’auruhia rā Amy ’ia tere nā te fare o tō’u māmā. Tē rave rā tō’u metua vahine i te ’ohipa i roto i tāna ’āua ’e ’ua fa’ari’i e rave i te tuahine nō Dottie e maha matahiti tōna, ’o Goldie, ’a ’āfa’i ai Amy ia Dottie i te taote tamari’i. ’Ua riro te reira ’ei pāhonora’a i te mana’ona’ora’a a Amy nō ni’a i te ha’apa’ora’a ia Goldie ’e ia Dottie hō’ē ā taime.

’Ua ’itehia te ma’i ’o Dottie nā te taote, e ma’i fa’a’orura’a māhāhā, nō te inura’a paha i te pape o tāna i hapu. ’Ua rapa’auhia Dottie ’e ’ua fa’afa’aea i te toe’a o te mahana i roto i te rima o tōna metua vahine, tei māha i te mana’o nō te matarara’a i mau uaua hutira’a aho ’e tei ti’a ia Dottie ’ia huti ’ohie i te aho.

’Ua parau vau ē, nā’u e ho’o i te mā’a i terā pō ’ia ho’i au i te fare. ’E ’ua fa’ari’i Amy i te reira, o tā’u ïa i ’oa’oa roa. ’Ua uiui tō’u mana’o e mea nāhea tā Amy fa’anahora’a i te mau ’ohipa i muri a’e i te hō’ē pō huehue mai teie te huru, te ha’ape’ape’ara’a nō te hō’ē pēpē, ’e te ha’apa’ora’a ia Goldie.

I tō’u tomora’a atu i roto i tō rātou fare e te mā’a, ’ua ’ite au ia Amy ’e tāna nā tamāhine e fa’afa’aea rā ma te hau. ’Ua oraora mai te huru ō Amy ’e ’ua ’itehia te māramarama i ni’a i tōna hōho’a mata. ’Ua vai hau noa ’oia, ’e tē ha’amata nei ’ia fa’aruru i te tahi atu pō e te ma’i ’o Dottie. ʼAita ʼoia i mata’u. ’Ua vai noa ’oia i roto i te ti’aturira’a. E hau tei roa’a mai tei hau a’e i te mana’o. ’Ua hina’aro noa vau ’ia pārahi ’e ’ia feruri i teie mau ’ohipa i tupu ’ia tāmau roa i te reira.

Tē tūtava nei Amy i te ha’apa’o i tāna mau fafaura’a e te Atua ’e ’ua ha’amaita’ihia ’Oia nā roto i Tōna mana fa’aitoito. ’Ua fa’auru te Vārua iāna i te mau ’ohipa e ti’a ’ia rave nō te ’atu’atu ia Dottie. ’E ’ua ha’amaita’i te mana o te Fatu i tōna ’aravihi nō te pāhono i te mau hina’aro o tōna ’utuāfare ma te fa’a’oroma’i ’e te here ’e ma te ha’apāpūra’a hau ē, e maita’i te mau mea ato’a.

Teie te ha’amaita’ira’a nō tō te Atua mana, tē roa’a ia tātou nā roto i te mau fafaura’a mo’a ’e maoti te tusia tāra’ehara a te Fa’aora. E taui teie mana ia tātou, e ha’apūai ia tātou, e tāmarū ia tātou, e hōro’a mai ia tātou i te ti’aturira’a, e hōro’a mai i te hau, ’e e fa’arahi i tō tātou ’aravihi nō te rave hope roa i tā tātou mau hōpoi’a hanahana ’ei vahine.