Ha’apa’o i tā tātou mau fafaura’a

vahine mata ’ata’ata e pārahi ra i ni’a i te patu ’ōfa’i

E nehenehe te mau parau pāpa’i i roto i te mau ve’a a te ’Ēkālesia nō teie ’āva’e e tauturu ia ’outou, ’a « ha’apa’o [ai ’outou] i te mau fafaura’a » tā ’outou i rave (Te Ha’api’ira’a Tumu ’e te mau Fafaura’a 25:13).

Te ha’api’ira’a e ’apo mai i roto i teie ve’a

Fa’aro’o i te reo o te ra’i

I te ’api 2, tē fa’aha’amana’o mai nei Elder Neil L. Andersen nō te pupu nō te Tino ’Ahuru ma Piti ’āpōsetolo ia tātou ē, e nehenehe te māniania o te ao nei e fa’a’ōnevaneva ia tātou i te reo o te Vārua. Tē vai ra ānei te mau fa’anevanevara’a i roto i tō ’outou orara’a ’o tē ha’afifi nei i te tū’ati atu i te Atua ? E nehenehe ’outou e ha’amau ’ei fā i teie ’āva’e ’ia fa’aiti mai i teie mau fa’anevanevara’a, mai te tu’ura’a i te taime rahi a’e nō te ha’amorira’a i roto i te hiero ’aore rā te ravera’a i te ha’apaera’a rāve’a tūreiara’a tōtiare.

Tauturu ia vetahi ’ē ’ia fa’ari’i i te mau ha’amaita’ira’a a te Atua

Tē ’āparau nei te parau ve’a i te ’api 18, nāhea te mau melo o te ’Ēkālesia e nehenehe ai e ’ite i te ’oa’oa ’e te tā’amura’a i roto i te hiero o te Fatu, noa atu te huru o tō rātou ti’ara’a tīvira. E aha tā ’outou e nehenehe e rave nō te tauturu i tō ’outou mau hoa feiā mo’a ’ia māramarama ’e ’ia fa’ari’i i te mau ha’amaita’ira’a tā te Metua i te ao ra i pūpū mai, i tāna mau tamari’i ato’a ’o tē ha’apa’o i te mau fafaura’a ’e ’ōna ?

Fa’ari’i ’e ’ite e heheura’a terā

’A tai’o i te parau ve’a i te ’api 44 nā Elder Christophe G. Giraud-Carrier nō te Hitu ’Ahuru, nō te ’ite mai e pae mana’o nō te fa’ari’i ’e nō te ’ite e heheura’a terā. E aha te tuha’a o tō ’outou orara’a tei tītauhia te arata’ira’a a te Atua ? E nehenehe e fa’a’ohipa i te mau parau tumu i ha’api’ihia e Elder Giraud-Carrier, ’a ’imi ai ’outou i te fa’aurura’a nō ’ō mai i te Atua ra i teie ’āva’e.

Fa’a’ana’anataera’a ’utuāfare a te Mai, pe’e mai

Te Ha’api’ira’a Tumu ’e te mau Fafaura’a 20:75–79

I te taime ’a fa’ati’ahia ai te ’Ēkālesia a Iesu Mesia tei fa’aho’i-fa’ahou-hia mai i te matahiti 1830, ’ua fa’aue te Fatu i tōna mau ta’ata « ’ia ta’iruru pinepine mai nō te rave i te pāne ’e te uaina ’ei ha’amana’ora’a i te Fatu ra ia Iesu » (Te Ha’api’ira’a Tumu ’e te mau Fafaura’a 20:75). E nehenehe ’outou e tāmata i teie ’ohipa e rave ’e tō ’outou ’utuāfare, nō te ha’api’i rahi mai nō ni’a i te ’ōro’a mo’a :

Tai’o i te mau pure o te ’ōro’a mo’a i roto Te Ha’api’ira’a Tumu ’e te mau Fafaura’a 20:77, 79. E nehenehe ’outou e tauturu i tā ’outou mau tamari’i ’ia māramarama i te mau parau mātau-’ore-hia, mai te ta’o « ha’amo’a ».

E aha nā mea e toru tā tātou e parau fafau e rave tātou ? E aha te ha’amaita’ira’a tā te Fatu i parau fafau mai ia tātou ’ei fa’aho’ira’a ?
E aha te tahi mau rāve’a e nehenehe ai tātou e « ha’amana’o noa » i te Fa’aora i roto i te hepetoma, ’ei ta’ata hō’ē ’e ’ei ’utuāfare ?
E hina’aro paha tō ’outou ’utuāfare e tāmata i te tāmau ’ā’au i te mau pure o te ’ōro’a mo’a. E nehenehe ’outou e fa’a’ohipa i te mau hōho’a tauturu ’ei tauturu. I muri iho e ani i te mau melo o te ’utuāfare, e aha tā rātou i ha’api’i mai i te ferurira’a i te mau parau o te mau pure o te ’ōro’a mo’a.

Nō roto mai i te ve’a Nō te pūai o te feiā ’āpī

Upo’oti’ara’a i ni’a i te mau fifi o te pure

Hi’o mai i te mau mana’o ’ōhie nō te upo’oti’ara’a i te mau ha’afifira’a mātauhia nō te pure.

E haere ma te Vārua

Tai’o i teie mau mana’o nō te tauturu i te feiā ’āpī ’ia ’ite mai, nāhea te Metua i te ao ra i te paraparau mai ia rātou nā roto i te Vārua Maita’i.

Te rāve’a ’eiaha roa atu e ’ore e manuia fa’ahou

Tauturu i te feiā ’āpī ’ia taui i tā rātou hi’ora’a i te manuia-’ore-ra’a ’e te hepohepo.

Feiā ’āpī ’ori ’e te tipi ura

Hi’o mai i te ’ā’amu ma te hōho’a nō te feiā ’āpī ’ori ’e te tipi ura i Vaihī, i Marite, ’e te mea tā rātou i ha’api’i mai nō ni’a i te ’evanelia maoti tā rātou tārēni hō’ē roa.

Nō roto mai i te ve’a Hoa

Ha’amātau ia tātou i te mau ’api ’auro

Fa’a’ohipa i te pāpa’ara’a parau i te tuha’a Mai, pe’e mai nō teie ’āva’e, nō te tauturu i tā ’outou mau tamari’i ’ia ha’api’i mai ’ua nāhea te Buka a Moromona i te ha’amatara’a.

Fa’aro’o i te Vārua Maita’i

Tai’o i te mau ’ā’amu ’e hīmene i te hō’ē hīmene ’āpī nō roto mai i te ve’a nō teie ’āva’e, nō te tauturu i tā ’outou mau tamari’i ’ia ha’api’i mai, tē nāhea ra te Metua i te ao ra i te paraparau mai ia tātou nā roto i te Vārua Maita’i.

Te mau tamari’i ea maita’i ’e te ’oa’oa

I roto i te tuha’a Nā te tamari’i pa’ari, hi’o mai i te mau mātēria nō ni’a i te ora maita’i i te pae manava ’e te ea o te ferurira’a.

Mānava nā Mātetāta mai !

Fārerei i tō tātou hoa ia Lauren ’e ha’api’i tē nāhea ra ’oia i te pe’e ia Iesu. I muri iho, ’a tai’o rahi atu ā nō ni’a ia Mātetāta ’e mai te aha te huru te ’Ēkālesia i reira.