« Tau tāvinira’a a te mau ’āpōsetolo : E ’ohipa ’aita e ta’ata ’ē atu e nehenehe e rave », Liahona, Māti 2025.
Tau tāvinira’a a te mau ’āpōsetolo : E ’ohipa ’aita e ta’ata ’ē atu e nehenehe e rave
Nāhea te tāvinira’a nā te ao a te mau ’āpōsetolo a te Fatu nō teie ’anotau e putapū nei i te mau ta’ata ma te fa’aea ’ore.
Tē ti’a nei te pupu nō te Tino ’Ahuru ma Piti ’āpōsetolo ’ei ’ite nō Iesu Mesia nā te ao ato’a nei. E mea ta’a ’ē ’e te teimaha o tō rātou pi’ira’a. I muri a’e i tō rātou pi’ira’ahia nō te tāvini, e tāpiri rātou i te mau ’ūputa i tō rātou tōro’a ’ohipa nō te rave i tō rātou taime tā’āto’a ’e tā rātou mau tārēni nō te ha’amaita’i ia vetahi ’ē. Rātou tāta’itahi e tā rātou iho mau ō ’e te mau tārēni ta’a ’ē tei taraihia i te roara’a o tō rātou orara’a i roto i te tāvinira’a, te ha’api’ira’a ’evanelia ’e te upo’oti’ara’a i te mau fifi ma te fa’aro’o i te Fatu.
Nō pārahi noa atu rā ’o Elder Ronald A. Rasband nō te pupu nō te Tino ’Ahuru ma Piti ’āpōsetolo ’e tāna vahine, ’o Melanie, i ni’a i tō rāua pārahira’a nō te fa’aro’o i tā rāua mo’otua tamāroa i te pupu hīmene Noela a te ha’api’ira’a, tāpiri mai nei te ra’atira ha’api’ira’a ’e ani mai nei mai te peu e ti’a ia Elder Rasband e fa’ari’i poupou te huira’atira i tae mai.
’A ti’a ai ’oia i ni’a ’e ’a hi’o ai ’oia i te naho’a ta’ata ’e te pupu ’upa’upa—pauroa i hina’aro ’ia ha’amata te fa’anahora’a—’ua mana’o ’oia e fa’ari’i poupou noa i te mau manihini ’e e parau iti noa i te tahi parau. I muri iho rā, ’ua ha’amana’o ’oia i tōna pi’ira’a ’āpōsetolo ’ia ti’a tāmau noa ’ei ’ite ta’a ’ē i te mau vāhi ato’a. ’Ua parau ’oia, « ’Outou pā’āto’a tei tae mai, e’ita tā’u e nehenehe e ’ore e fa’a’ite i tō’u ’itera’a pāpū, i teie tau nō te fa’ahanahanara’a i te fānaura’a o te Mesia, nō Tōna i’oa ’e nō Tāna tāvinira’a ».
I te mau vāhi ato’a tā rātou e haere atu, te mau ta’ata ato’a tā rātou e fārerei, ’ua riro te poro’i a te mau ’āpōsetolo ’ei ha’apāpūra’a nō Iesu Mesia ’ei Tamaiti fa’aora nā te Atua. ’Ua parau Elder David A. Bednar « Nā mua roa, i te mau taime ato’a, e mau ’ite tātou nō te orara’a mau o te Fatu ’o Iesu Mesia ».
’Ua parau Elder Dale G. Renlund i te mau tuahine nō te Sōtaiete Tauturu i te hō’ē purera’a i Lonedona i te matahiti i ma’iri a’e nei « ’O Iesu Mesia te tumu tei ’ō nei tātou ». « ’Ua ’ite pāpū vau ē, tē ora nei ’Oia ! […] E tupu te semeio mau i roto i tō ’outou orara’a ’ia ’ite ana’e ’outou iho i te reira».
« Nāhea vau e nehenehe ai e tauturu i te patu i tō rātou fa’aro’o ia Iesu Mesia ? » te parau ïa a Elder Quentin L. Cook i te mau melo nō Sydney, Auterāria, ma te fa’ati’a nāhea teie uira’a i te ha’amau i tāna mau parau poro’i e rave rahi matahiti.
Tē fa’a’ite mai nei tā rātou mau ha’api’ira’a i te hō’ē mana’o rū ’e te hina’aro tā rātou e fa’ari’i nō vetahi ’ē ’ia ti’a ma te mo’a nō te hi’o ’e nō te ’ite i te Fa’aora ’e nō te ’ite i tōna maita’i tāra’ehara (hi’o 3 Nephi 11:15). ’Ua ’umehia tā rātou mau ha’api’ira’a nā roto i te here ’e te hāro’aro’ara’a. E mea mārū tā rātou tāparura’a ’ia tātarahapa e mea pāpū rā. E mea pāpū maita’i tō rātou hina’aro ’ia tupu te mau melo i roto i te mau mea a te Atua mai te hō’ē mea e’ita e tano ’ia vaiiho. ’Ia fa’aro’o ana’e te ta’ata i te hō’ē ’itera’a pāpū tei hōro’ahia mai e te hō’ē ’āpōsetolo, e nehenehe te ’ā’au e putapūhia ’e e taui te mau orara’a.
Mau ’ite nō Iesu Mesia
E hōro’a mai te ’āpōsetolo tāta’itahi i te mau tārēni ’e te mau ’itera’a ta’a ’ē nō te fa’a’ite i tāna ’ohipa. Rātou tāta’itahi ’ua manuia i roto i tāna tōro’a ’ohipa. E mea ta’a ’ē tō rātou huru ta’ata ’are’a hō’ē ā tā rātou mau maita’i. E mea ’oa’oa rātou, te pae maita’i tā rātou e tāpe’a mai ’e mea tāmarū ’ia pārahi i pīha’i iho ia rātou. Nō reira, te feiā e fārerei i te hō’ē ’āpōsetolo a Iesu Mesia e fa’ahiahia rātou i tō rātou huru maita’i ’e tō rātou huru nātura mau.
Tē vai nei te tahi rūra’a nō ni’a i te mau ’āpōsetolo nō te rave fa’aoti ho’i i te mau mea—hō’ē hina’aro rahi nō te ha’amaita’i, nō te hōpoi mai i te tāmāhanahanara’a ’e nō te fa’a’ite i tō rātou ’itera’a pāpū.
’Ua parau te peresideni Jeffrey R. Holland mono peresideni nō te pupu nō te Tino ’Ahuru Ma Piti ’āpōsetolo, « A toru ’ahuru matahiti i teienei vau i te ha’amaita’ihia ’ia ’āmui e te mau melo nō te Pupu nō te Tino ’Ahuru ma Piti ’āpōsetolo nō Te ’Ēkālesia a Iesu Mesia i te Feia Mo’a i te Mau Mahana Hope’a nei ». « Rātou tāta’itahi, ’ua tauturu teie mau ta’ata ato’a iā’u ’ia riro ’ei pipi maita’i a’e nā Iesu Mesia.
« ’A putuputu ai mātou ’aita i maoro a’enei nō te pata i te hō’ē hōho’a pupu, ’ua ’ite au i te māuruuru rahi ’ia riro ’ei tuha’a nō te hō’ē fa’anahora’a tāmau a te mau pipi, tahito ’e nō teie tau ato’a nei, a Iesu Mesia.
« Te mau i’oa ’e te hōho’a mata […] i roto i teie tauira’a pupu i te roara’a o te tau, terā rā te mea faufa’a roa : ’ua fa’ari’i te ’āpōsetolo tāta’itahi i te fa’auera’a ‘’ia riro ’ei ’ite ta’a ’ē nō te i’oa o te Mesia i roto i te ao ato’a nei’ [hi’o Te Ha’api’ira’a Tumu ’e te mau Fafaura’a 107:23]. ’Aita e ’ohipa au roa a’e i hōro’ahia i te hō’ē ta’ata, ’e ’aore rā, i te hō’ē pupu ta’ata maori rā o te rave i te reira ».
Tē paraparau rā Elder Dieter F. Uchtdorf i te hō’ē ’āmuira’a ta’a ’ē nō te mata’eina’a nō Ierusalema i te pū BYU nō Ierusalema i te 22 nō ’Ēperēra 2023.
’Ua parau ’o Elder Dieter F. Uchtdorf i tōna rāterera’a nā te mau vāhi mo’a i ’Īserā’ela i te matahiti 2023, « ’Ua rahi roa atu tō’u mana’o māuruuru nō te Fa’aora i teie mahana ’a feruri ai tātou i tāna tusia i roto nā piti vāhi ta’a ’ē ». « ’Ua haere mātou e māta’ita’i i te ’ō o te mēnema », i te vāhi te tino o te Mesia i tu’uhia ai.
« ’Ua haere ato’a mātou e māta’ita’i i terā vāhi e hi’ohia e te tahi mau ta’ata te ’ō nō Getesemane. ’A haere ai mātou i rotopū i te mau tumu ’ōlive e rave rahi tenetere i te pa’ari, ’ua fa’aro’o mātou i te mau ’īrava pāpa’ira’a mo’a i te fa’a’itera’a i te tusia hanahana a te Fa’aora nō tātou i roto i te ’ō ’e i ni’a i te sātauro.
« Te māuiuira’a o Iesu Mesia i roto i te ’ō nō Getesemane ’e i ni’a i te sātauro, ’e e ti’a ai i tō tātou fa’atura hope ’e tō tātou fa’atura hope roa. Mai te reira ato’a te mau ’ohipa fa’ahiahia tei tupu i te toru o te mahana i muri a’e i tōna fa’asātaurora’a, e au roa ’ia mana’o fa’ahiahia ’e te māuruuru mure ’ore i roto i tō tātou ’ā’au ’e tō tātou ferurira’a.
« ’Ei pipi nā te Mesia, ’ua ha’amaita’ihia vau i te porora’a i tō’u ’itera’a pāpū ē, tē ora nei ’Oia ! »
I roto i tāna poro’i tūreiara’a sōtiare nō ni’a i te parau o te fa’aturara’a i te Fatu, ’ua fa’aitoito Elder Gerrit W. Gong, « Tāmau noa ana’e i te paraparau ma te māuruuru tāmāhanahana ’e te mana’o tura nō te ’ohipa ’e te hanahana o te Atua, nā reira ato’a nō te maita’i, te hāmani maita’i ’e te aroha ’o Iesu Mesia ’e nō Tāna tusia tāra’ehara ».
Fa’aineinera’a i te hō’ē ’Āpōsetolo
’Ua parau te peresideni Russell M. Nelson « E mea maoro, nō te Fatu, ’ia fa’aineine i te hō’ē ’āpōsetolo » . « ’Ia pi’ihia taua ta’ata ra i te Tino ’Ahuru ma Piti, tē vai rā tā te Fatu hō’ē mea ta’a ’ē Tāna e tīa’i nei ’ia tauturu mai taua ta’ata ».
I ni’a i te reira ’ē’a o te ’āpōsetolo tāta’itahi, e tae mai te mau hi’opo’ara’a—« te mau hi’opo’ara’a ma te itoito ’e te fa’a’oroma’i »—’ia ’imi noa te vārua ta’ata i te mau taime ato’a, i te tahi taime e mau tupura’a ataata pohe roa.
« Tē vai noa rā te hō’ē hi’opo’ara’a i te mau taime ato’a », e parau teie a te peresideni Nelson, ma te fa’ata’a i te ’ohipa i roto i te tāvinira’a a te Fatu. « ’Ua hina’aro ānei ’outou e rave i te mau ’ohipa pa’ari mau ? I te taime ihoā ’outou ’a fa’a’ite ai ē, ’ua hina’aro ’outou e rave i tā ’outou tuha’a, e tauturu mai ’Oia ia ’outou ».
’A paraparau ai ’oia i te mau melo i Auterāria, ’ua hōro’a Elder Cook i te tahi ’itera’a nō ni’a i te huru te mau melo o te pupu nō te Tino ’Ahuru ma Piti ’āpōsetolo i te ’itera’a ē, ’aita rātou i ineine ’e ’aita i ’āfaro roa mai tā te feiā fa’atere o te pāroita e mana’o ato’a nei. ’Ua parau ’oia ē, « Te rirora’a ’ei ’āpōsetolo, i roto i te tāvinira’a a te Fatu, e ’ohipa fa’ahaeha’a mau te reira ».
’Ei ’āpōsetolo pi’i-’āpī-hia, ’ua fa’ata’a mai ’o Elder Neil L. Andersen ē, noa atu tē mana’o nei ’oia e mea tano ’ore ’ōna ’e te haeha’a, tē tu’u nei ’oia i tōna ’oa’oa i roto i te Fatu tei ha’amaita’i iāna e te hō’ē a’e ’aravihi : « ’Ua ’ite au ma te maita’i roa ’e te pāpū nā roto i te mana o te Vārua Maita’i ē, ’o Iesu te Mesia, te Tamaiti Herehia a te Atua ».
« ’Ua anihia mai iā’u, e aha te huru ’ia riro ’ei ’āpōsetolo ’āpī roa a’e », ’ua parau mai Elder Patrick Kearon te mahana i muri a’e i tōna pi’ira’ahia i roto i te pupu nō te Tino ’Ahuru Ma Piti.
« Tē vai rā tō’u mau mana’o ’e mea pāpū iā’u ē, te mau ’ohipa e tae i mua nei ’ua hau i tō’u pūai. E tāparu rā vau nō te tahi tauturu ta’a ’ē. Tē ti’aturi pāpū nei rā vau i te hō’ē Metua here i te Ao ra ’e i tāna Tamaiti, tō tātou ho’i Fa’aora. ’E ’ua ’ite vau ē, e tauturu mai Rāua. Tē ti’aturi nei au i ni’a ia Rāua. ’E e fa’aitoito vau ’ia rave mai tō’u pūai ato’a, nā te tau roa, ’ia riro ’ei ’āpōsetolo ’o tā ’outou e tīa’i nei.
« ’E nō reira, i teie mahana, tē fifi nei au, e 24 hora i muri noa i te pi’ira’a, ’ua ti’a iā’u ’ia fa’ari’i ē, mai te mea e mahana ’ino teie nō ’oe…tei hau i ni’a a’e i tō ferurira’a, e ha’amana’o, tei pīha’i iho vau ia ’oe ».
’Ua arata’ te peresideni Russell M. Nelson i te hō’ē pupu feiā fa’atere nō te ’Ēkālesia, mai ia Elder Gerrit W. Gong, nō te hō’ē tere e fārerei i te ari’i ’e te ari’i vahine nō Tonga i te matahiti 2019. E fārerei te mau ’āpōsetolo i te mau ta’ata fa’atere teitei ’e te mau upo’o fa’atere hau fenua ’ia ’īriti i te mau ’ūputa o te mau fenua i te ’evanelia. ’Ua parau te peresideni Nelson E rave rahi matahiti i tītauhia nō te fa’aineine i te mau ’āpōsetolo nō teie tonora’a rahi nō rātou, .
Mau ti’ahau ana’e nō te ao nei
’Ia au i Te Ha’api’ira’a Tumu ’e te mau Fafaura’a 107:23, i reira tō te Fatu pi’ira’a i nā Tino ’Ahuru ma Piti ’āpōsetolo ’ia riro « ’ei mau ’ite pāpū nō te i’oa nō te Mesia i roto i te ao pā’āto’a nei », ’ua parau te peresideni Nelson : « E ’āpōsetolo te melo tāta’itahi o te Tino ’Ahuru ma Piti nō te ao tā’āto’a nei. E ti’a iāna ’ia ha’api’i i te mau tuha’a ato’a o te ao nei, e tae noa atu i te mau ta’ata ’e te mau reo ’e te ’ā’amu ».
E po’i tā rātou ’ohipa i te ao tā’āto’a nei E fārerei rātou i te mau upo’o o te mau tuha’a fenua, te mau ta’ata rahi o te tuha’a fenua iho, te mau ve’a ’e te mau melo o te ’Ēkālesia i roto i te mau vāhi rarahi ’e te mau vāhi ’ōmo’e. Te tahi taime e mea roaroa te tīa’ira’a ’e e mea rohirohi ato’a. ’Ei mau ti’ahau nō te Fatu iesu Mesia, e ’ere fa’ahou tō rātou orara’a nō rātou iho.
I roto i te hō’ē tere fārereira’a, 12 mahana tāvinira’a nā te ao nei i te matahiti i ma’iri a’enei nā roto i nā ono fenua nō Europa—i reira te ta’oto-pinepine-ra’a i roto i te manureva ’a tere noa ai i terā fenua e terā fenua—’ua fārerei Elder D. Todd Christofferson i te mau fa’aterera’a hau, te mau misiōnare rave tāmau ’e te mau melo o te ’Ēkālesia o te mau fenua.
Hō’ē rā rurura’a faufa’a roa, te fārereira’a ïa e te Fa’atere hau o te Hiro’a nō te fenua Croatia, i reira ’oia i te pūpūra’a i te tauturura’a a te ’Ēkālesia nō te tauturu i te mau tītīhoria e horo mai nei i tō rātou fenua Ukraine i ’atihia e te tama’i. ’Ua ’ite mātou… e rave rahi rāve’a ta’a ’ē…tā mātou e nehenehe e ’āmui atu [te tōtauturu] i te feiā i roto i te fifi rahi », te parau ïa a Elder Christofferson.
I muri a’e i tōna fārereira’a i te feiā fa’atere nō Dar es Salaam, Tanzania, nō te fa’aara nō te hō’ē ō a te ’Ēkālesia ’ei ’ōpuara’a tōtauturu rahi nā te ao nei i te matahiti 2024, ’ua fārerei Elder Gary E. Stevenson e te mau melo ’e te mau misiōnare.
I roto i te hō’ē tere e iva mahana i te mau fenua nō ’Āfirita i te matahiti i ma’iri a’enei, ’ua tere Elder Gary E. Stevenson i te pū nō te ea nō Makuburi i Dar es Salaam, Tanzania, i reira te ’Ēkālesia e tauturu ai i te fa’arahira’a o teie pū. « ’Ia ’ite ana’e tātou i te tāvinira’a e hōro’ahia i te mau metua vahine ’e te mau tamari’i i ’ō nei », tē parau nei Elder Stevenson, « putapū te ’ā’au ».
Nō te fa’aha’amana’o i te 30ra’a o te matahiti o te ’Ēkālesia i Taputiha, ’ua fārerei Elder Renlund i te fa’atere hau mātāmua nō Taputiha, ’ua parau ’oia nōna e « ta’ata fa’ahiahia roa ».
S’Ua parau te ’āpōsetolo, e taote māfatu tātuha’ahia, i te fa’atere hau mātāmua ē, tē pūpū nei te ’Ēkālesia a Iesu Mesia 2 mirioni hau ’ia nehenehe i te hō’ē pū rapa’aura’a māfatu e hāmanihia tāpiri noa i te fare ma’i i Siem Reap, e 320 km i te pae ’apato’erau nō Phnom Penh, e ’āfa’i mai te reira i te tahi tauturu nō te rapa’aura’a i te feiā ma’i mai tōna metua tāne i te huru, tei pohe a’enei.
Elder Dale G. Renlund e aroha rima ra ia Samdech Moha Borvor Thipadei HUN Manet, te fa’atere hau mātāmua nō te Basileia nō Taputiha i Phnom Penh, i te 22 nō Tēnuare 2024. Teie rurura’a fa’ahiahia, ’o te taime mātāmua ïa nō te hō’ē ti’a fa’atere o te ’Ēkālesia i te fārereira’a i te upo’o fa’atere hau nō te Bāsileia nō Taputiha.
« ’Ua fāna’o vau ’ia pārahi i pīha’i iho i te mau melo, te feiā fa’atere, ’e te mau misiōnare i Ulaanbaatar, i Mogolia, ’e i Kyoto, Hiroshima, Fukuoka, Sapporo, ’e Tokyo, Tāpōnē », teie ïa te parau a Elder Ulisses Soares i muri a’e i tōna tere i te area nō Asia Apato’erau i te matahiti 2024. « I roto i te mau rurura’a ato’a ’aore rā, te mau fārereira’a ta’ata hō’ē, ’ua ’ite au i te here ’e te fa’aro’o fa’ahiahia o teie mau ta’ata nō te Fatu. ’Ua putapū roa tō rātou ’ā’amu nō tō rātou fa’afāriura’a ’e ’ua ha’apūai i tō’u iho ’itera’a pāpū nō Iesu Mesia ’e nō tāna ’evanelia i fa’aho’i-fa’ahou-hia mai i ni’a i te fenua nei.
« …’Auē ïa ha’amaita’ira’a nō’u ’ia fa’ari’i i te Vārua o te Fatu ’e tōna here i rotopū i teie mau pipi rahi a te Mesia i roto i teie mau fenua ».
’Ohipa nā te mau ’Āpōsetolo
Te ’īritira’a i te mau ’ūputa i te ’evanelia i roto i te mau fenua e rave rahi, e hōpoi’a ïa a te ’āpōsetolo : « Te Tino ’Ahuru ma Piti tei tonohia mai, tei mau i te mau tāviri, nō te ’īriti i te ’ūputa nā roto i te poro’i o te ’evanelia a Iesu Mesia » (Te Ha’api’ira’a Tumu ’e te mau Fafaura’a 107:35).
I te parau a te peresideni Nelson ’ei melo nō te Tino ’Ahuru ma Piti, e mea huru ’ē te mau ’īritira’a o te mau ’ūputa tāta’itahi nō te ’evanelia. I te tahi taime e ha’a te Vārua i ni’a i te hō’ē ti’a fa’atere nō terā fa’aterera’a hau ē tae roa « ’ua ha’amata ’oia i te taui i tōna ferurira’a nō ni’a ia mātou », te parau ïa a te peresideni Nelson. I te tahi a’e taime, ’ua ’īritihia te hō’ē ta’ata tei ’ore i hina’aro e paraparau i te feiā fa’atere o te ’Ēkālesia i tāna piha tōro’a, ’e ’ua hōro’a mai te Fatu « i te hō’ē ta’ata tā mātou e nehenehe e paraparau atu ». I roto i te reira mau hi’ora’a ato’a, ’ua parau te peresideni Nelson, « hō’ē ā huru te poro’i [nō te ra’i mai] iā’u nei : « ’A fa’aitoito ā.… ’Eiaha e taiā Mai te mea rā ’aita ihoā e nehenehe ia ’outou, nā’u ïa e tauturu atu ».
E tae mai te ’oa’oa nō te ’ohipa a te hō’ē ’āpōsetolo, ’ia rave ’aifāito ana’e rātou i te mau fifi nō te paraparaura’a i te mau pupu rarahi ’e te aupurura’a i te ta’ata hō’ē. E haere rātou e fārerei i te mau melo i tō rātou fare nō te hōro’a i te ha’amaita’ira’a ānei, nō te fa’a’ite i te māuruuru, ’aore rā nō te hōro’a i te tahi ha’api’ira’a.
’Ua parau ’o Elder Bednar : « Tē tono nei te Fatu i te hō’ē melo nō te pupu nō te Tino ’Ahuru ma Piti i te mau vāhi ta’a ’ē i te mau taime tano nō rātou i reira e fārerei ai i te mau ta’ata ha’apa’o maita’i feiā mo’a i te mau mahana hope’a nei ’e rātou ato’a e fifi nei ’aore rā e hina’aro nei i te tāmāhanahanara’a ’e te ha’apāpūra’a. Nā te Atua e arata’i i teie mau fārereira’a ».
Tē aroha nei ’o Elder David A. Bednar ’e tōna hoa fa’aipoipo ’o Susan, i te mau ta’ata i muri a’e i tōna paraparaura’a i te hō’ē rurura’a i Toluca, Mehiko, i te 5 nō Novema 2023.
I te tahi mau taime, e tei mua i te nūna’a tā rātou tāvinira’a, mai tā Elder Stevenson i rave i roto i te hō’ē ’āmuira’a rahi i Nairobi, Kenya, tei ha’apurorohia i ni’a i te ’āfata teata. « E uira’a e ti’a ’ia vai i roto […] i tō ’outou ferurira’a, ‘E aha te hō’ē ’āpōsetolo ?’» Tā Elder Stevenson ïa i parau i roto i te tahi ha’apurorora’a. « ’Ua pi’ihia tātou […] nō te haere i roto i te mau nūna’a o te ao nei ’e ’ia fa’a’ite pāpū nō ni’a i te Ti’ara’a Tamaiti hanahana ’o Iesu Mesia, te Tamaiti a te Atua ora ».
« ’Ōna ana’e te tumu », ’ua parau Elder Dieter F. Uchtdorf. « Tē ti’a nei tātou Nōna. Nō Te Atua ana’e te tumu ’e nō Tōna maita’i rahi ’e Tōna faufa’a rahi e roa’a ai te ’oa’oa o Tāna mau tamari’i ».
I te tahi taime e piri roa a’e tā rātou ’ohipa i tō rātou iho fare—’oia mau. Tē tātā’i rā Elder Bednar i te tāpo’i o tōna fare i te hō’ē mahana ’e ’ua haere atu ’oia i te fare toa nō te ho’o mai i te tahi mau tauiha’a. ’Ua ’ahu ’oia i te ’ahu ’ohipa : te piripou ’āvae ’e te tīa’a, te piriaro ’e te hō’ē taupo’o.
« ’Ua ha’afātata mai te hō’ē ta’ata iā’u ’a mā’iti noa ai au i tā’u mau tauiha’a, nā ’ō mai nei ē, ‘Elder Bednar, ’aita tō ’oe ’ahu e huna i tō ti’ara’a.’ ’Ua ’ata māua, ’e ’ua ui mai nei ’oia : ‘E nehenehe ānei tā’u e ui atu i te tahi uira’a ?’
« ’Ua pāhono atu vau, ‘Nō reira vau i haere mai ai.’
« ’Ua pāhono maira ma te ui i te tahi atu uira’a, ‘E aha ho’i ?’
« ’Ua parau vau ē, […] tei ’ō nei au nō te mea ’ua ’ite te Atua ē, e fārerei tāua i roto i teie fare toa ’e tē vai rā tā ’oe hō’ē ’ohipa e hina’aro e ani. ’A ani mai na i tā ’oe uira’a.’
« ’ua ’āparau māua 15 minuti i te maoro i rōpū i te mau vaira’a tauiha’a, ’e ’ua tāmata vau e tauturu iāna e ’ite i te pāhonora’a i tāna uira’a. E ’ohipa pata haere noa anei teie fārereira’a i teie ta’ata i teie fare toa ? ’E ’aore rā, ’ua riro anei teie ’ā’amu ’ei ’ohipa i arata’ihia e te hō’ē Fa’aora tei ’ī i te here […] nō te pāhono i te mau ha’ape’ape’ara’a a teie ta’ata tei ’ī i te fa’aro’o—nōna ānei teie tupura’a ?
« Tē ti’aturi nei au ē, i roto i te ’ohipa a te Fatu, ’aita e ’ohipa e ’aita i ’ōpuahia. E faufa’a rahi tō te mau vārua ta’ata i tō te Atua hi’ora’a mai ».
Tē pata rā ’o Elder Neil L. Andersen i te hōho’a i te 22 nō Fepuare 2024, i te ’oire iti nō Jaime Cardinal Sin, i Manila, Firipino, i reira tō te ’Ēkālesia i te tātā’ira’a e toru nā tura pape.
Te Fa’arurura’a i te mau tāmatara’a ma te fa’aro’o i te Fatu
Te mau fifi rarahi ’e te ’ātitirau e fa’aruruhia nei e te mau ’āpōsetolo o teie mahana. E ’imi rātou i te fa’aurura’a ’a ha’api’i ai ’e ’a aupuru ai rātou i te hō’ē ’āmuira’a nā te ao ato’a nei, hau atu i te 17 mirioni melo o te ’Ēkālesia e tāmatahia nei nā roto i te mau ’ārepurepura’a poritita, te hōho’a faufau, te mau tūra’ira’a tūreiara’a sōtiare ’aore rā te fa’arava’ira’a faufa’a pāpū ’ore. E tū’ino te mau ’ārepurepura’a tama’i rotopū i te mau nūna’a i te ’ohipa. Te ha’afifihia nei te au maita’ira’a o te sōtiare nā te paura’a ’o te mau faufa’a tume o te ao nei.
’Ua ha’apa’o-māite-hia te mau melo nō te Tino ’Ahuru ma Piti nā roto i tā rātou mau hōpoi’a ’e te hīa’ai ’ia patu i te fa’aro’o i roto i te hō’ē ao tei ’ere i te fa’aro’o.
« E mea pāpū maita’i ē, tē natu nei te mana o te Fatu i te feiā fa’atere o te ’Ēkālesia, e natu ma te […] rū », te parau ïa a te peresideni M. Russell Ballard (1928–2023), mono peresideni o te pupu nō te Tino ’Ahuru ma Piti ’āpōsetolo. « Te uira’a e ti’a ia tātou pā’āto’a ’ia ui ia tātou iho, ‘tē tāpe’a rā ānei tātou i te tere o tā [tātou feiā fa’atere] ?’ E ti’a ia tātou tāta’itahi ’ia ineine nō te pāhono i taua uira’a ra. E nehenehe vau e ha’apāpū ia ’outou ē, e tumu parau rahi teie tā te pupu nō te Tino ’Ahuru ma Piti ’āpōsetolo e ’āparau nei […] E ’ere teie te taime nō te tāmarū ’aore rā nō te tūtau i roto i tā tātou mau pi’ira’a […] »
« E ti’a ia tātou ’ia ineine nō te tāpe’a noa i pīha’i iho i tō tātou feiā fa’atere, nō te ta’ahi i ni’a i tō rātou mau ta’ahira’a pe’epe’e ».
« ’Ei feiā ’āpe’e ia Iesu Mesia, tē ’imi nei tātou ’ia riro mai tō tātou Fa’aora ’e ’ia pe’e i tōna hi’ora’a i roto i te mau mea ato’a tā tātou e rave nei », te parau ïa a Elder Uchtdorf. « Mai te taime iho ā e tu’u tātou i te ’āvae i ni’a i te ’ē’a nō te ti’ara’a pipi, e ha’amata te mau ha’amaita’ira’a ’ite-mata-hia ’e tei ’ite-’ore-hia nō ’ō mai i te Atua ra, i te tae mai i ni’a ia tātou.
« Noa atu te vāhi tei reira tātou, e nehenehe ’outou ’e ’o vau e haere nā ni’a i te ’ē’a o te ti’ara’a pipi i teie mahana iho. ’Ia vai haeha’a noa tātou ; e pure ana’e tātou i tō tātou Metua i te ao ra ma tō tātou ’ā’au ato’a ’e ’ia fa’a’ite i tō tātou hina’aro ’ia ha’afātata atu Iāna e ’ia ha’api’i mai nō ni’a Iāna ».