« E nehenehe mau ānei tā’u e ti’aturi i te arata’ira’a a te peropheta ? », Liahona, Māti 2025.
Feiā ʼāpī paʼari
E nehenehe mau ānei tā’u e ti’aturi i te arata’ira’a a te peropheta ?
’Ua mā’iti noa na vau ’ia pe’e i te peropheta, e nehenehe rā ānei au e ti’aturi iāna i teie taime ?
Fa’ahōho’ara’a nā Kylee Bodily
I tō’u fa’ari’ira’a i te niuniu ē, e fa’aho’ihia vau mai tā’u misiōni, ’ua riri roa vau ’e te ta’a ’ore.
E rave rahi ’āva’e hou vau e ha’amāuruuruhia ai, ’ua fa’aoti te Peresidenira’a Mātāmua e fa’aho’i iā’u i te fare, ’oia ato’a te tahi atu mau misiōnare, nō te tahi tama’i nā te ara tā’u i mana’o ē e mau parau noa mai terā. ’Aita hō’ē a’e fa’a’itera’a ē e tupu te hō’ē ’ohipa.
’Aita vau i mana’o ē, e ha’ape’ape’a.
Fē’a’a i te fa’aurura’a
’Ua hina’aro noa na vau e tāvini i te hō’ē misiōni ’e ’ua rave itoito i te ’ohipa nō te fa’aoti i taua fā ra. Mea iti roa te moni, ’ua ’itehia mai rā iā’u te hō’ē ’ohipa ’o tei tauturu iā’u ’ia ’aufau i tā’u misiōni. I tō’u ’īritira’a i tā’u pi’ira’a, ’ua putapū vau e mea tano te reira, ’e ’ua ’ite au nō ’ō mai te reira i te Atua ra.
I muri iho, nō te pararera’a o te ma’i pe’e COVID-19, ’ua tauihia tā’u tonora’a i te hō’ē misiōni i Utah e iva ’āva’e te maoro hou vau ’a reva atu ai i te ara nō tā’u misiōni mau. ’Ua māmā roa vau ’e ’ua ’oa’oa roa i te taera’a i te hope’a i reira, i te vāhi tā te Atua i pi’i mau iā’u ’ia haere.
I muri iho, ma’a ’āva’e noa i muri a’e i tō’u taera’a i reira, ’ua fa’aātea-’oi’oi-hia vau i te mau ta’ata ’e te fenua ’o tā’u i here. E au ra iā’u tē ’īriti-’ē-hia ra tā’u mau mea ato’a.
E au ra iā’u ’ua ha’avarehia vau. ’Ua fē’a’a mau vau e mā’itira’a fa’auruhia ānei teie.
Ma te māuruuru ’ore, ’ua rave au i te manureva nō te ho’i i Texas. Nō tō’u fa’aho’ira’a mana’o-’ore-hia, ’aita tō’u pāpā ’e tō’u mau taea’e ’e mau tuahine i haere mai i te taura’a manureva nō te fa’ari’i iā’u i te fare.
E ha’amaita’ira’a nō te ataata-’ore-ra’a
Tau mahana noa i muri a’e i tō’u fa’aru’era’a i tā’u misiōni, ’ua ha’amāheaituhia vau ’a tupu ai te hō’ē tama’i ataata rahi i pīha’i iho i te vāhi i reira vau i te tāvinira’a. I te reira taime, ’ua ’ite mau vau maoti te pe’era’a i te peropheta ’ua ataata-’ore-mau-hia vau. ’Ua fa’a’īhia vau i te māuruuru rahi nō te peropheta ’e tāna fa’aurura’a.
’Ua parau fafau vau iā’u iho ē, e ha’apa’o noa vau i te mea tā te peropheta e parau, noa atu ’aita tō te reira e aura’a i te reira taime.
’Aita i maoro a’enei, ’ua parau Elder Ulisses Soares nō te pupu nō te Tino ’Ahuru ma Piti ’āpōsetolo : « Tē vai nei te mau peropheta, e tāpa’o ïa nō te here o te Atua i tāna mau tamari’i. Nā rātou e fa’a’ite i te mau parau fafau ’e te nātura mau o te Atua ’e o Iesu Mesia. »
Tē ti’aturi mau nei au ē, e auvaha parau te peresideni Russell M. Nelson nā te Fatu. Tē ’ohipa ti’a nei ’oia ’e te Metua i te ao ra ’e te Fa’aora nō te arata’i ia tātou i te pārurura’a, ’e nō te hōro’a ia tātou i te tīa’i ’e te arata’ira’a i roto i te mau tau fifi.
Te mau ha’amaita’ira’a nō te pe’era’a i te peropheta
Mai te mea tē uiui noa ra ā ’outou ē, ’ua pi’ihia ānei te peropheta e te Atua, tā’u a’o ’o te ravera’a ïa i tāna mau anira’a. ’A tāmata i te tai’o fa’ahou i te mau a’ora’a a te peresideni Nelson i te ’āmuira’a ’aita i maoro a’enei, ’e ’a ’imi māite i te mau pāpa’ira’a mo’a tāna i fa’aue mai. ’A rave i tāna mau anira’a ’e ’a ’imi i te mau ha’amaita’ira’a tāna i fafau i pīha’i iho i te reira mau anira’a.
’Ua ha’api’i ato’a Elder Soares : « Nā roto i te pe’era’a [i te mau peropheta], e ’oa’oa a’e tō tātou orara’a ’e e rave ’atā ’ore a’e, e ’ōhie a’e ’ia amo i te mau pe’ape’a ’e te mau fifi, ’e tē hāmani nei tātou i te hō’ē ha’ana tama’i nō tātou nō tē pāruru ia tātou. »
’Ua ’ite mata vau i teie mau ha’amaita’ira’a i roto i tō’u orara’a, i te pe’era’a i te mau arata’ira’a a te peropheta. ’Ua ’ite au ē, e roa’a teie mau ha’amaita’ira’a i te mau ta’ata ato’a e tu’u i tō rātou ti’aturira’a i te Atua ’e i tāna peropheta.