’A pe’e i te peropheta

E riro e 600 matahiti HM, i muri a’e i te ha’amoura’ahia ’o Ierusalema e Nebukanesa, te ari’i nō Babulonia, e pupu iti nō te ’ōpū o Iuda tei fa’ati’ahia ’ia fa’aea i te fenua nei, ’e te toe’a ’ua hōpoi-tītī-hia ïa i Babulonia. I roto i te ta’ata tei fa’aea mai, ’o Ieremia ïa te peropheta ’e ’o Iohanana, te tamaiti a Karea, te tāpena nō te nu’u.

E tau fifi mau ’e te ataata nō teie toe’a nō Iuda tei ti’a i ni’a i te ’ē’a iho o nā nūna’a pūai rahi e piti tei tama’i na te tahi i te tahi i te hope’a. E fa’aotira’a fifi mau nō te ta’ata : e fa’aea ānei i Ierusalema, ’aore rā, mai tei mā’itihia e te rahira’a, e haere i ’Aiphiti e ora ai ? Nō te ’imi i te arata’ira’a, ’ua fāriu ’o Iohanana ’e te mau ta’ata i ni’a ia Ieremia nō te ani iāna ’ia ui atu i te Fatu nā ni’a i tō rātou i’oa, i te nā-’ō-ra’a : « ’Ia fa’a’ite mai tō Atua ra ’o Iehova i te ’ē’a ’ia haere mātou, ’e te mea e au ia mātou ’ia rave ra » (Ieremia 42).

’Ua fa’ari’i ’o Ieremia ’e ’ua parau ihora : « Nā’u e pure i tō ’outou Atua ra ia Iehova, tā ’outou i parau mai na, ’e ’o tā Iehova e parau mai iā’u ra, ’o tā’u ïa e fa’a’ite atu ia ’outou, e ’ore roa ïa mea e vaiihohia e au. » ’Ua parau fafau te mau ta’ata : « ’Ei ’ite mau Iehova ’e te ha’avare ’ore ia mātou nei, ’e ’o tā tō Atua ra tā Iehova ’ia tono mai ia ’oe e fa’a’ite ia mātou nei, ’ia ’ore mātou ’ia nā reira. I te maita’i ’e te ’ino ato’a, e fa’aro’o ā mātou i te reo o tō mātou Atua ra ia Iehova. »

’Ua ’imi Ieremia i te parau a’o a te Fatu, ’e i tōna pae ’ua parau fafau ’o Iohanana ’e te mau ta’ata ’ia ha’apa’o i te mea ato’a tā te Fatu e heheu mai. ’Ahuru mahana i muri mai, ’ua fa’ari’i Ieremia i te parau a te Fatu. Ha’aputuputu ihora ’oia i te mau ta’ata nō te hōro’a i te poro’I : « ’Ua tae mai ra te parau a Iehova […] I ti’a ia ’outou i te pārahi i teie nei fenua, e patuhia ’outou e au i ni’a, e ’ore e tu’u i raro ; e tanuhia ’outou e au, e ’ore e tā’ihitumu […] ’Eiaha e mata’u i te ari’i o Babulonia, tā ’outou e mata’u na […] ’ei pīha’i iho ho’i au ia ’outou ’ei fa’aora, ’e ’ia ora ’outou i tāna rima. […] ’Eiaha ’outou e tae i Aiphiti ; e ’ite mau ïa ’outou ē ’ua fa’a’ite hua atu ho’i au ia ’outou i teie nei mahana » (Ieremia 42–43).

’Ua nāhea te mau ta’ata i te pāhonora’a i te parau a’o a te Fatu tei nā roto mai i tāna peropheta ? Te vāhi ’oto, ’ua fa’aoti a’ena rātou i tō rātou mana’o. ’Ua ’imi rātou i te ha’apāpūra’a ’eiaha rā te arata’ira’a mau. I pari atu ra ’o Azaria, Iohanana ’e te tahi atu feiā fa’atere te’ote’o ra ē ’ua ha’avare ’o Ieremia, i te nā-’ō-ra’a : « E ha’avare tā ’oe ra : ’aore tō mātou Atua ra, ’o Iehova, i tono mai ia ’oe ’ia parau mai ē, ’Eiaha ’outou e tae i Aiphiti, ’a pārahi ai i reira. » Ma te tāu’a ’ore i te mau arata’ira’a a te Fatu, ’ua ha’apa’o ’ore Iohanana, te mau tāpena ’e te mau ta’ata, ’e haere atu ra i ’Aiphiti. Mai tei tohuhia, ’ua ha’amouhia rātou i te harura’a Babulonia ia ’Aiphiti (Ieremia 43).

Nāhea tātou i mua i te mau parau a te mau peropheta ora ? ’Ua fa’aro’o te Fatu i te mau pure o teie toe’a nō Iuda, ’e ’ua pāhono ia rātou nā roto i tāna peropheta. I teie mahana, tē tāmau nei ’oia i te paraparau nā roto i te mau peropheta ora ’e te feiā tei pi’ihia nō te fa’atere. ’Ua parau te Fatu : « Nā roto i tō’u iho reo ’e ’aore rā nā roto i te reo o tō’u mau tāvini, hō’ē ā ïa » ’e ’ua parau fafau ē « te mau mea ato’a tā rātou e parau ma te fa’auruhia e te Vārua Maita’i, e riro ïa ’ei pāpa’ira’a mo’a, e riro ïa ’ei hina’aro nō te Fatu, e riro ïa ’ei mana’o nō te Fatu, e riro ïa ’ei parau nā te Fatu, e riro ïa ’ei reo nō te Fatu, ’e ’ei mana ho’i nō te Atua ē tae noa atu i te fa’aorara’a » (Te Ha’api’ira’a Tumu ’e te mau Fafaura’a 1, 68).

I teie mahana, ’ua ’ati tātou i te mau reo e rave rahi, te reo tāta’itahi e fa’a’ite i tā rātou parau mau ’e mau mana’o firotohia. Mai ia Korihora i roto i te Buka a Moromona, e rave rahi o teie mau reo e fa’a’ite pāpū nei ē ’aita e Mesia, ’e ’aita e ta’ata tē nehenehe e ’ite i te ananahi, ’e e’ita e nehenehe e ti’aturi i te mau mea ’aita te mata e ’ite, ’e e manuia te ta’ata nā roto i tōna māramarama ’e e upo’oti’a nā roto i tōna pūai (hi’o Alama 30). ’Ia pe’e tātou i taua huru reo ra, e hahi ’ē tātou. Terā rā, ’o rātou e mea pūai i te pae vārua ’e ’o te fa’aro’o i te mau muhumuhu a te Vārua Maita’i, e’ita rātou e ha’avarehia. Terā rā, e ataatara’a rahi a’e e nehenehe e matara mai mai roto mai i te ’atu’atura’a i teie mau mana’o, ’o tē fa’ariro ia tātou ’ei ta’ata ma te ha’a ’ore ’e te tāu’a ’ore i tō tātou ti’ara’a pipi.

I roto i te ’Ēkālesia a te Fatu tei fa’aho’ihia mai, ’ua ha’amaita’ihia tātou e arata’ira’a tā tātou nā te peropheta ora, ’o te peresideni Russell M. Nelson. E hi’o na i tāna parau a’o fa’auru : e fa’ariro i te Sābati ’ei mahana sabati ’ei mahana hina’arohia, vaiiho i te Atua ’ia upo’oti’a i roto i tō ’outou orara’a, « Fa’aro’o iāna », feruri tiretiera, rave i te ’ohipa vārua nō te fa’ari’i i te heheura’a ta’ata hō’ē, fa’ari’i i te mana o te haerera’a i mua i te pae vārua, fa’a’ohipa i te i’oa ti’a o te ’Ēkālesia, tai’o māite i te Buka a Moromona, ’ei ta’ata fa’atupu hau, ’e tu’u i te taime rahi a’e nō te ha’amorira’a i roto i te hiero.

’Ua ha’api’i te peresideni James E Faust : « ’Ua parau-fafau-hia mai tātou ē e fa’ari’i te Peresideni o te ’Ēkālesia i te arata’ira’a nō tātou pā’āto’a, ’oia te heheu parau nō te ’Ēkālesia. Tei roto tō tātou pārurura’a fifi tīa’i-’ore-hia i te fa’aro’ora’a i te mea tāna e parau ’e te pe’era’a i tāna parau a’o. » ’Ia pe’e tātou pā’āto’a i te peropheta ’ia fa’ari’i ho’i tātou i te mau ha’amaita’ira’a o te ra’i.