Te ’Ēkālesia a Iesu Mesia i fa’aho’i-fa’ahou-hia mai

Te tuatāpapara’a nō teie matahiti o te Mai, pe’e mai nō Te Ha’api’ira’a Tumu ’e te mau Fafaura’a e fa’atumuhia ïa, e mea nāhea te Fatu i te fa’aho’i-fa’ahou-ra’a mai i tāna ’Ēkālesia ’e tāna ’evanelia nā roto mai i te mau peropheta o te mau mahana hope’a nei. E rave rahi parau pāpa’i i roto i te ve’a nō teie ’āva’e e fa’atumu nei i ni’a i te mau ha’amaita’ira’a nō te fa’aho’i-fa’ahou-ra’a mai.

Te mea tā tātou e ha’api’i mai nā roto mai i teie ve’a

Te ’āmuira’a mai i roto i te ha’aputuputura’a

I te ’api 2, tē parau mai ra te peresideni Russell M. Nelson ia tātou i te mau rāve’a e nehenehe ai tātou e ha’aputuputu atu i te Fa’aora, ’ia ha’aputuputu atu i te feiā mo’a, ’e ’ia ha’aputuputu atu i roto i te tāvinira’a i te Atua. ’A feruri i te ha’amau i te hō’ē fā nō teie ’āva’e, nō te tauturu atu i te hō’ē o teie nā huru ha’aputuputura’a e toru.

Tāvini i roto i te ’Ēkālesia i fa’aho’i-fa’ahou-hia mai

Tē parau nei Elder Patrick Kearon nō te pupu nō te Tino ’Ahuru ma Piti ’āpōsetolo, nō ni’a i te mau rāve’a tā tātou e vai ra i roto i te ’Ēkālesia a Iesu Mesia i fa’aho’i-fa’ahou-hia mai nō te « tāvini ia vetahi ’ē ma te here » (hi’o ’api 8). Tē vai ra ānei te mau ta’ata i roto i tā ’outou pāroita ’aore rā tā ’outou ’āma’a e fifi ra ? E nehenehe ’outou e pure nō teie mau ta’ata ’e e ani i te fa’aurura’a e nāhea ’outou ’ia tāvini ia rātou.

Ha’api’i mai nā roto mai Te poro’i nō te Fa’aho’i-fa’ahou-ra’a mai

I te matahiti 2020, ’ua ha’aparare te Peresidenira’a Mātāmua ’e te pupu nō te Tino ’Ahuru ma Piti ’āpōsetolo « Te Fa’aho’i-fa’ahou-ra’a mai o te ’īra’a o te ’Evanelia a Iesu Mesia : E poro’i i tō te ao nei nō te piti-hānere-ra’a o te matahiti » (hi’o ’api 40). Ma te hi’o-fa’ahou-ra’a i te poro’i nō te fa’aho’i-fa’ahou-ra’a mai, e nehenehe ’outou e feruri i teie mau uira’a : E aha te mau ’ohipa i tupu mau tei fa’ahitihia i roto ’e e mea nāhea te Fatu i te arata’ira’a i teie mau ’ohipa i tupu ?

Mai, pe’e mai fa’a’ana’anataera’a nā te ’utuāfare

Te Ha’api’ira’a Tumu ’e te mau Fafaura’a 1:30

I roto i teie ’īrava, tē fa’ata’a nei te Fatu i tāna ’Ēkālesia ’ei « ’ēkālesia mau ’e te mea ora i ni’a i te ao pā’āto’a nei ». E nehenehe te mau mana’o nō te ha’api’ira’a i muri nei e tauturu i tā ’outou mau tamari’i ’ia māramarama i te aura’a nō te parau « mau » ’e te « ora » :

I roto i te Liahona, nō Tiunu 2024, ’ua fa’ahiti Elder J. Devn Cornish, hō’ē Hitu ’Ahuru huimana fa’atere fa’aturahia, i te uira’a « E aha tā tātou e parau nei ’ia parau ana’e tātou ē, e mea mau te ’Ēkālesia ? » E nehenehe ’outou e fa’a’ite atu i tā ’outou mau tamari’i i te tahi mau tuha’a pāpū nō teie parau pāpa’i. E aha te mau ’ohipa pae vārua tā ’outou i ora mai nō te tauturu ia ’outou ’ia ’ite ē, e mea mau te ’Ēkālesia—tē arata’ihia nei te reira e Iesu Mesia, e ha’amanara’a tōna nō te autahu’ara’a, tē arata’ihia nei te reira e te mau peropheta, ’e tē fa’a’ite nei te reira i te ’evanelia a Iesu Mesia ?
Mai te mea e nehenehe, ’a ani atu i tā ’outou mau tamari’i ’ia tauturu mai ia ’outou ’ia pōfa’i mai i te hō’ē rauere ’aore rā i te hō’ē ’āma’a na’ina’i i ni’a i te tumu rā’au ’aore rā i te aihere tāpiri mai. ’A tau’āparau e aha te ’ohipa e tupu mai i teienei ’aita te reira i tīhonohia i te tumu rā’au. Nō te aha te rauere ’aore rā te ’āma’a e pohe ai ? ’A tai’o Ioane 15:4, i reira te Fa’aora e fa’aau ai iāna iho mai te vine ’e i tāna mau pipi mai te mau ’āma’a. Nāhea te ’Ēkālesia a Iesu Mesia e nehenehe ai ’ia fa’arirohia mai te hō’ē ’ēkālesia ora ?

Nō roto mai i te ve’a Nō te Pūai o te Feiā ’Āpī

Tumu parau a te feiā ’āpī nō 2025 : « ’A hi’o i te Mesia »

Tē fa’a’ite nei te mau peresidenira’a rahi nō te Feiā ’Āpī Tamāhine ’e te Feiā ’Āpī Tamāroa ’e vetahi i te tumu parau o teie matahiti.

Te mau fa’ati’ara’a nō te ’Ōrama Mātāmua

E aha tā tātou e nehenehe e ha’api’i mai nā roto mai i te mau fa’ati’ara’a ta’a ’ē a Iosepha Semita nō ni’a i tāna ’Ōrama Mātāmua ?

Te pāpa’ara’a parau o te fa’aho’i-fa’ahou-ra’a mai

’A hi’o i te tahi o te mau tuha’a rahi o te fa’aho’i-fa’ahou-ra’a mai i roto i te ha’api’ira’a i te ’evanelia a Iesu Mesia.

« E’ita e nehenehe » ha’api’ira’a tao’a

E nehenehe te hō’ē ’api parau e tauturu i te feiā ’āpī ’ia hi’o ē, te ti’aturira’a i te Atua ’o te ’ē’a maita’i roa a’e nō te pe’e, ’ia tāmata-ana’e-hia tō rātou mau ti’aturira’a ’aore rā ’ia fārerei ana’e rātou i te mau uira’a e ha’afēa’a.

Nō roto mai i te ve’a Hoa

’Uru rā’au mo’a tiorama

’A tauturu i tā ’outou mau tamari’i ’ia hāmani i te hō’ē tao’a nō te ha’api’i rahi mai nō ni’a ia Iosepha Semita ’e te fa’aho’i-fa’ahou-ra’a mai.

’A tunu ana’e i te mā’a !

’A fa’aineine i te hō’ē tāpura mā’a maita’i nō te ’amu’amu ’e te ’utuāfare ’e nō te ’atu’atu i tō ’outou tino.

Te purera’a i roto i te ua

’A tai’o nō ni’a i te hō’ē tamāhine tei putapū i te aroha o te Atua, noa atu ’aita tāna mau pure i pāhonohia mai te au i tōna hina’aro.

Mau ’ā’amu o te pāpa’ira’a mo’a

’A hi’o atu i te papara’a ’āpī nō ni’a i te ’ā’amu o te ’Ēkālesia ’e Te Ha’api’ira’a Tumu ’e te mau Fafaura’a, ma te ha’amata nā ni’a i te ’Ōrama Mātāmua.