Tumu parau a te feiā ’āpī nō 2025
’A hi’o i te Mesia
Te Ha’api’ira’a Tumu ’e te mau Fafaura’a 6:36
E tauturu te tumu parau a te feiā ’āpī nō 2025 ia ’outou ’ia mā’iti i te ti’aturi nā ni’a atu i te fē’a’a, ’e te fa’aro’o nā ni’a atu i te mata’u.
Tei roto ’o Kailey, ’ahuru ma hitu matahiti, i te hō’ē pupu tamāhine pompom girl ē tae roa i te taime ’a pēpē ai tōna roro. Nō te tau rapa’aura’a, ’aita ’oia i haere i te ha’api’ira’a, ’e ’ua ha’amata tōna mana’o mo’emo’e ’e te vai ’ōtahira’a. ’Ua fifi ’oia i te ’āehuehu ’e ’aita i ’ite i hea e noa’a ai te tauturu. ’Ua ani te hō’ē hoa iāna ’ia fa’aro’o i te mau misiōnare. ’Ua ha’api’i rātou iāna nō ni’a i te tāra’ehara a Iesu Mesia. Nō te ha’api’i-rahi-ra’a ’oia nō ni’a i te Mesia ’ua noa’a mai tōna tīa’ira’a, ’e e au ra iāna ē, tē toro mai ra te Atua iho i te rima iāna.
’Ua parau Kailey i tōna metua vahine : « ’Aita roa vau i putapū a’enei ē ’ua here te Atua iā’u. I teienei rā ’ua ’ite au ’ua here ’oia iā’u ».
’Ua māere ri’i tōna metua vahine, ’o Michelle. ’Ua fa’aru’e Michelle ’e tāna tāne fa’aipoipo ’o Brock, i Te ’Ēkālesia a Iesu Mesia i te Feiā Mo’a i te mau Mahana Hope’a nei i te hitura’a te matahiti o Kailey, nō te mau uira’a rau, te fē’a’a ’e te mau māna’ona’ora’a. ’Ua mana’o rāua ē e rahi a’e te ’oa’oa o tā rāua tamāhine ’āhiri ’aita te mau rurura’a ato’a ’e te mau fa’auera’a ato’a. ’Aita roa atu rāua i mana’o ē e fa’a’ere tā rāua mā’itira’a ia Kailey i te fa’ari’i i te hō’ē natira’a piri roa ’e te Atua. ’A hi’o ai Michelle ’e ’o Brock i te tauira’a o Kailey, ’ite a’era rāua ē e mea maoro ’aita rāua i putapū i te fātatara’a i te Atua, ’e ’ua hina’aro rāua e ’ite fa’ahou i te reira.
’Ua fārerei atu rāua i tō rāua ’episekōpo, ’e ’aita i maoro roa ’ua ho’i fa’ahou mai te ’utuāfare i te purera’a, ’e tae noa atu te taea’e o Kailey, ’o Braeden. Te putapūra’a i te fātatara’a i te Atua ’e te fa’atū’ati-fa’ahou-ra’a iāna—nā roto iho ā rā i te pure—’ua ho’i fa’ahou mai tō rātou fa’aro’o. ’Aita te ho’ira’a mai i te purera’a i pāhono i tā rātou mau uira’a ato’a ’aore rā mau māna’ona’ora’a, ’ua ’ite rā rātou ē e mea faufa’a a’e ’ia roa’a te natira’a pūai a’e ’e te Atua i tō rātou ti’aturi-’ore-ra’a.
’Ua ha’amata te reira i te anira’a te hō’ē hoa—e taure’a mai ia ’outou—ia Kailey ’ia hi’o atu i te Mesia. ’E ’ua nā reira ’oia !
’Ua parau Iesu Mesia : « ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u » (Te Ha’api’ira’a Tumu ’e te mau Fafaura’a 6:36). ’O te fa’aurura’a ïa i muri i te tumu parau a te feiā ’āpī nō 2025. ’A vaiiho na ia mātou ’ia fa’a’ite e nāhea ’outou i te mā’iti i te ti’aturi nā ni’a atu i te fē’a’a, ’e te fa’aro’o nā ni’a atu i te mata’u ’a hi’o ai i te Mesia :
Nā te pae ’aui i te pae ’atau : Tuahine Runia, Peresideni Freeman, Tuahine Spannaus
Tamara W. Runia
’Ia fifi ana’e au, e mea tauturu nā’u ’ia feruri ia Iesu Mesia ma tōna rima toro. ’Ia hi’o ana’e au iāna, e ha’amana’o vau i te mau parau o te hīmene, « Haere au ’e Iesu » : « E’ita roa ’oia e fa’aru’e iā’u, noa atu ’ua topa vau ».
Emily Belle Freeman
’Ia tai’o ana’e au i teie tuha’a pāpa’ira’a mo’a, e ha’amana’o vau ia Petero i ni’a i te roto nō Galilea. Te rōtahira’a i ni’a i te vero ’ua fa’arahi ïa i tōna mata’u ’e tōna fē’a’a, ’e tomo ihora i roto i te mau ’are pūai. Te rōtahira’a rā i ni’a i te Fa’aora, ’ua ti’a ïa iāna ’ia rave i te hō’ē mea ’o tāna i ’ore i rave nā mua a’e : ’ua haere ’oia nā ni’a i te pape ! E mea fa’ahiahia mau. E aha tē noa’a ia ’outou ’ia rave mai te mea e hi’o ’outou iāna ?
Andrea Muñoz Spannaus
’Ia ha’amata ana’e au i te ri’ari’a, noa atu te vāhi tei reira vau ’aore rā te huru vaira’a, e feruri pāpū vau i tō’u tā’amura’a ’e te Metua i te ao ra ’e ’o Iesu Mesia. E fa’ahiti au e rave rahi taime i roto i tō’u ferurira’a : E TAMĀHINE AU NĀ TE ATUA. E tāmau noa vau i te rave i te reira ē tae roa i te taime e ha’amata ai au i te maita’i mai. E tupu iho ā te reira !
Nā te pae ’aui i te pae ’atau : Taea’e Wilcox, Peresideni Lund, taea’e Nelson
Bradley R. Wilcox
’A ui ia ’outou iho ’o vai tē ha’ape’ape’a rahi nei nō ’outou ’e ’o tē here rahi nei ia ’outou. ’O tō ’outou ānei nā metua ’e tō ’outou feiā fa’atere o te ’Ēkālesia ? ’O te mau ta’ata ānei i ni’a i te mau rāve’a tūreiara’a tōtiare ’o tei fa’ariro noa paha ia ’outou ’ei nūmera ? ’A hi’o atu i te Metua i te ao ra ’e i te Mesia. Tē ha’ape’ape’a mau nei rāua nō ’outou !
Steven J. Lund
’A ha’amana’o i te mea tei fa’aha’amana’ohia ia ’outou, ’ia fa’ahiti ana’e ’outou i nā tumu parau a te pupu Autahu’ara’a a Aarona ’e a te Feiā ’Āpī Tamāhine : E tamaiti ’aore rā e tamāhine here ’outou nā te Atua. ’Ia vai te fa’aro’o ē e fa’anahora’a tā tō tātou Metua nō ’outou. Te hi’ora’a i te Mesia, te aura’a ra, ’o te ’itera’a ïa ē tei rōpū tāna tāra’ehara i taua fa’anahora’a ra.
Michael T. Nelson
Te tai’ora’a i te mau pāpa’ira’a mo’a, ’o te hi’ora’a atu ïa i te Mesia ! E mo’e iho ā te fē’a’ara’a ’e te mau mata’u ’ia ha’amana’o tātou i te mau temeio ’e te mau ha’api’ira’a a Iesu. E fāna’ora’a mau tō tātou i te fa’ari’ira’a i tāna mau parau. E tano te reira i te mau huru vaira’a ato’a tā tātou e fa’aruru i roto i tō tātou orara’a.