Mai, pe’e mai

Māramarama i te mau fa’ati’ara’a nō te ’Ōrama mātāmua a Iosepha Semita

Nā Matthew C. Godfrey

Tuha’a fa’atere nō te ’ā’amu o te ’Ēkālesia

E aha te ta’a-’ē-ra’a i roto i nā fa’ati’ara’a e maha nō te ’Ōrama mātāmua a Iosepha Semita ? Nō te aha te reira i ta’a ’ē ai ? ’E e aha tā te reira e ha’api’i nei ia tātou ?

’Ua tāmata a’ena ānei ’outou i te fa’ati’a i te hō’ē ta’ata i te hō’ē ’ohipa pae vārua i tupu ? E aha te mau ha’apāpūra’a tā ’outou i tu’u atu ? E aha te mau ha’apāpūra’a tā ’outou i vaiiho atu ? ’Ia mana’o ’outou, e fa’ati’a ta’a ’ē ānei ’outou i te ’ā’amu mai te mea e hoa terā i mua ia ’outou, i roto i te purera’a ’ōro’a, ’aore rā e ta’ata e ’ere i te melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei ?

E mea faufa’a teie mau uira’a ’ia feruri ana’e tātou e mea nāhea tō Iosepha Semita fa’ata’ara’a i te ’ōrama o te Metua i te ao ra ’e ’o Iesu Mesia ’o tāna i fa’ari’i i New York i te matahiti 1820. ’Ua fa’a’ite Iosepha i teie ’ohipa i tupu e rave rahi taime. I teie mahana e maha fa’ati’ara’a tā tātou nā Iosepha iho :

E ’ā’amu tā Iosepha iho i pāpa’i i te tau māhanahana o te matahiti 1832. ’Ua fa’ata’a Iosepha ē ’ua haere ’oia i roto i te uru rā’au nō te pure, nō te mea ’ua ta’a ’ore ’oia nō ni’a i te mau mea pae vārua. ’Ua hina’aro ato’a ’oia ’ia fa’a’orehia tāna mau hara.
Buka ’ā’amu a Iosepha nō te matahiti 1835. ’Ua haere mai te hō’ē ’orometua, ’o Robert Matthews te i’oa, i Kirtland, Ohio. ’Ua hina’aro ’oia e paraparau ia Iosepha nō ni’a i te mau ’ohipa pae fa’aro’o, nō reira ’ua fa’ati’a Iosepha iāna i tāna ’ōrama. ’Ua pāpa’i Warren Parrish, tei tāpe’a i te buka ’ā’amu a Iosepha, i te mea tā Iosepha i parau.
E ’ā’amu mana a te ’Ēkālesia tā Iosepha i ha’amata i te matahiti 1838. ’Ua parau ’oia nō te ’Ōrama mātāmua ’ei tuha’a nō te fa’aho’i-fa’ahou-ra’a-hia mai te ’Ēkālesia. ’Ua piahia teie ’ā’amu i roto i te Poe Tao’a Rahi.
E rata tei pāpa’ihia e Iosepha i te matahiti 1842. ’Ua ani te hō’ē pāpa’i ve’a ’o John Wentworth te i’oa ia Iosepha ’ia fa’ati’a mai, nāhea Te ’Ēkālesia a Iesu Mesia i te Feiā Mo’a i te mau Mahana Hope’a nei i te tupura’a. ’Ua pāhono atu Iosepha i roto i te hō’ē rata ’e ’ua tu’u atu i te mau ha’amāramaramara’a nō ni’a i te ’Ōrama mātāmua.

’Ua pāpa’ihia te fa’ati’ara’a tāta’itahi i te taime ta’a ’ē te pupu ta’ata ta’a ’ē. E fā ta’a ’ē tā Iosepha i te ferurira’a nō te taime tāta’itahi. Terā rā ’ia tai’o ’āmui ana’e tātou i te reira, e noa’a mai te hōho’a rahi a’e ’e te māramarama a’e nō te ’ohipa i tupu nō Iosepha i roto i te uru rā’au mo’a.

E aha te mea i ta’a ’ē ai ?

Teie mau fa’ati’ara’a ato’a e mau ha’apāpūra’a ta’a ’ē. I roto te fa’ati’ara’a nō te matahiti 1832, tē rōtahi nei Iosepha i ni’a i tōna hina’aro ’ia fa’a’orehia tāna mau hara. ’Aita ’oia i fa’ahiti ta’a ’ē i tōna hina’aro ’ia ’ite e aha te ’ēkālesia mau. Tē parau nei ’oia nāhea « te Fatu » i te fāra’a mai iāna—’aita ’oia e fa’ahiti i te parau nō te ta’a-’ē-ra’a te Metua i te ao ra ’e Iesu Mesia.

Tē fa’ahiti nei nā fa’ati’ara’a nō 1835 ’e nō 1838 i te parau nō te hō’ē pūai ’ino e tāmata i te tāpe’a ia Iosepha ’eiaha ’ōna ’ia pure. Tē parau nei te fa’ati’ara’a a Iosepha nō te matahiti 1835 ē, ’ua fārereihia ’oia e nā ta’ata to’opiti, ’e te mau melahi ato’a. Tē fa’ahiti ato’a nei nā fa’ati’ara’a nō 1838 ’e nō 1842 i te parau nō nā ta’ata to’opiti, hō’ē o rāua tei parau-pāpū-hia ē ’o Iesu Mesia. Tē tūra’i nei teie nā fa’ati’ara’a e piti i te mā’imira’a Iosepha i te ’ēkālesia mau.

Nō te aha e mau ta’a-’ē-ra’a ?

Tē vai ra te tahi mau tumu nō te mau ta’a-’ē-ra’a i roto i te mau fa’ati’ara’a.

Te huru o te meharo

I te tahi taime tē mana’o nei tātou e vai noa tō tātou mau ha’amana’ora’a ma te taui ’ore. E ’ere rā mai te reira te meharo ’ia ’ohipa. E ha’amana’o ta’a ’ē tātou i te mau mea ’ia pa’ari ana’e tātou. E nehenehe te hō’ē ’ohipa i tupu nā mua atu e ’apo mai i te tahi aura’a ta’a ’ē nā roto i te tahi atu mau ’ohipa e tupu i roto i te orara’a. E vai noa te ha’amana’ora’a tumu, e nehenehe rā te tahi mau ha’apāpūra’a e taui. E’ita e nehenehe e parau ē e ’ere tō tātou ha’amana’ora’a i te parau mau ’aore rā i te mea pāpū, e mau tuha’a noa tei ha’amana’o-ta’a-’ē-hia i terā taime ’e terā taime.

E fā ta’a ’ē

E mau tumu rau tā Iosepha nō te fa’ati’a i tōna ’ā’amu. I te matahiti 1832, tē pāpa’i ra ’oia i tōna iho ’ā’amu, nō reira ’ua fa’atumu rahi atu ā ’oia i ni’a i te aura’a o te ’Ōrama mātāmua nōna iho. I te matahiti 1838 ’e 1842, ’ua parau ’oia nō ni’a i te ’Ōrama mātāmua mai te hō’ē tuha’a nō te maura’a mai te ’Ēkālesia. Nō reira ’ua tūra’i ’oia i te parau nō tōna hina’aro ’ia ’ite tei hea te ’ēkālesia mau.

E pupu ta’ata ta’a ’ē

E ’ere Robert Matthews ’e ’o John Wentworth i te melo nō te ’Ēkālesia. Tītauhia ia Iosepha ’ia fa’atano i ni’a ia rāua i tāna fa’ati’ara’a. ’Ua fa’aue ’oia i te fa’ati’ara’a nō te matahiti 1838 nō te mau melo o te ’Ēkālesia. ’Ua mana’o paha ’oia ē e tai’o-noa-hia tāna fa’ati’ara’a nō te matahiti 1832 e te mau hoa piri ’e te mau melo o te ’utuāfare.

E aha te mea e tū’ati ra ?

I roto i nā fa’ati’ara’a e maha, hō’ē ā ha’apāpūra’a tumu. ’Ua ta’a ’ore Iosepha nō ni’a i tōna iho fa’aorara’a ’e te fa’aorara’a o te ao nei. ’Ua tai’o ’oia i te Iakobo 1:5–6 ē, e nehenehe ’oia e fa’ari’i i te mau pāhonora’a i tāna mau pure. ’Ua haere ’oia i roto i te uru rā’au ’e ’ua pure. ’Ua fā mai te mau ta’ata o te ra’i iāna. ’Ua pi’i rātou iāna ma tōna i’oa. ’Ua parau rātou ē, ’aita te mau ’ēkālesia i taua taime ra e ha’api’i nei i te mau ha’api’ira’a tumu tano.

E aha tā te mau fa’ati’ara’a e ha’api’i nei iā’u

Mea au nā’u ’ia tai’o i nā fa’ati’ara’a ta’a ’ē, nō te mea tē tauturu nei te reira iā’u ’ia māramarama maita’i a’e i te ’Ōrama mātāmua. E nehenehe au e ’ite pāpū atu ā nō te aha Iosepha i ta’a ’ore ai ’e i hina’aro ai e pure. E nehenehe au e putapū pūai atu ā i te Vārua ’a tai’o ai au nō ni’a i te aura’a o te ’Ōrama mātāmua nō Iosepha, i te mau taime ta’a ’ē o tōna orara’a. ’Ia ’āmuihia, e tauturu nā fa’ati’ara’a iā’u ’ia ’ite ē, tē parau ra Iosepha i te parau mau. ’Ua ’ite ’oia i te Atua te Metua ’e ia Iesu Mesia i roto i te uru rā’au mo’a. E fa’arahi te reira i tō’u tīa’ira’a ē e ti’a ato’a iā’u ’ia fa’ari’i i te mau pāhonora’a i te mau pure.

Fa’ati’ara’a	Te tumu tā Iosepha i parau i pure ai ’oia	’O vai tā Iosepha i parau ’ua fā mai
1832	’Ia fa’a’orehia tāna mau hara	Te Fatu
1835	Nō te ’ite mai ’o vai tei tano ’e ’o vai tei hape nō ni’a i te ha’apa’ora’a fa’aro’o	E piti ta’ata—nā mua hō’ē, pe’ehia e te tahi—’e te mau melahi
1838	Nō te ’ite mai e aha te ’ēkālesia mau a te Mesia	Te Metua ’e tāna Tamaiti ’o Iesu Mesia
1842	Nō te ’ite mai e aha te ’ēkālesia mau a te Mesia	« E piti tino hanahana »