« Nāhea vau e noa’a ai te hō’ē ’itera’a pāpū pūai a’e nō Iosepha Semita ’e te fa’aho’i-fa’ahou-ra’a mai ? »

« Te hō’ē ’ohipa tā’u i rave nō te ha’apūai i tō’u ’itera’a pāpū nō te Fa’aho’i-fa’ahou-ra’a mai, ’o te tai’ora’a ïa i te ’ā’amu o te ’ōrama mātāmua i te mau pō ato’a hou vau e tā’oto ai. ’Ia tai’o ana’e au ē, ’ua fa’aorahia Iosepha ’e ’ua ti’a atu i mua i te aro o te Atua, e ’ite au ē ’ua fātata roa vau i te māramarama o te Atua, ’e e tauturu te reira iā’u ’ia ’ite ē, tei reira ’oia ».

Eva T., 16 matahiti, Chorley, UK

« I tō’u ’itera’a ē, ’aita tō’u e ’itera’a pāpū nō Iosepha Semita, ’ua ha’amata vau i te tai’o i Te feiā mo’a. I ’ite ai au ē e mea pūai mau ’e e temeio te ’ohipa i tupu nō Iosepha. ’Ua putapū ato’a vau i te Vārua i pīha’i iho iā’u, ’a pure ai nō ni’a i te Buka a Moromona. ’Ua ha’amata vau i te tauturu i te mau misiōnare, ’e i teienei e’ita e nehenehe iā’u e fa’aea i te fa’a’ite pāpū i te ta’ata nō Iosepha Semita ’e nō te Fa’aho’i-fa’ahou-ra’a mai ».

Abish N., 18 matahiti, Negros Oriental, Firipino

« ’Ua parau mai te peropheta ia tātou ’ia ’imi maita’i i te orara’a o te Mesia, nō te tauturu ia tātou ’ia noa’a te hō’ē ’itera’a pāpū nōna ’e nō tāna tāra’ehara. Hō’ē huru nō Iosepha Semita. ’A ’imi maita’i ai au i tōna orara’a, e nehenehe e noa’a iā’u te hō’ē ’itera’a pāpū pūai a’e nō te fa’aho’i-fa’ahou-ra’a mai ’e nō Iosepha tei riro ’ei peropheta mātāmua nō tō tātou tau tu’ura’a. E nehenehe ato’a vau e māramarama maita’i a’e nō te aha e ti’a i te ’Ēkālesia a Iesu Mesia ’ia fa’aho’i-fa’ahou-hia mai ».

Asher W., 17 matahiti, Louisiana, Marite

« ’A rave mai tā Iosepha i rave ’e ’a ani i te Atua ! ’A fa’a’oroma’i, e tae mai te pāhonora’a ».

Anna W., 17 matahiti, Colorado, Marite

« ’O te pure te rāve’a ’ōhie roa a’e nō te noa’a te hō’ē ’itera’a pāpū nō Iosepha Semita ’e nō te fa’aho’i-fa’ahou-ra’a mai. ’Ua pāhono mai te Fatu i te reira pure nō’u iho ’e nō e rave rahi atu ta’ata—’e nā reira ato’a ’oia nō ’oe. ’A tai’o maita’i ato’a i te mau ’itera’a pāpū pūai o te mau ’ite i roto i te Buka a Moromona ».

Andrew N., 18 matahiti, Washington, Marite