Te peropheta ’e tōna Fa’aora
E nehenehe e parau ē te ’ā’amu nō te Fa’aho’i-fa’ahou-ra’a mai, ’o te ’ā’amu ïa nō te ha’afātatara’a Iosepha Semita ia Iesu Mesia.
Every Knee Shall Bow [E tu’u te mau turi ato’a i raro], nā Dan Wilson
Te ’ā’amu ’e te orara’a o Iosepha Semita, e hau atu ïa i te ’ā’amu noa ’e te orara’a noa o Iosepha Semita.
’Ia fa’ati’a tātou i te ’ā’amu nō te Fa’aho’i-fa’ahou-ra’a mai o te ’evanelia a Iesu Mesia, pinepine tātou i te ha’amata ma te ’ā’amu o Iosepha Semita. ’E ’ua tano te reira. E ma’a taime ’ē ato’a tōna fa’ati’ara’a i te ’ā’amu o tōna ’āpīra’a nō te tauturu i te ta’ata ’ia māramarama i te ha’amatara’a o te Fa’aho’i-fa’ahou-ra’a mai. E nehenehe rā e parau ē, te ’ā’amu ’e te orara’a o Iosepha Semita, ’o te ’ā’amu ato’a ïa nō tōna ha’afātatara’a ia Iesu Mesia.
E ’ōrama nō te fa’aorera’a hara
E mea ta’a ’ore ri’i i te taure’are’a Iosepha Semita te parau nō te ha’apa’ora’a fa’aro’o. ’E e mana’o ’ē ato’a tei tūra’i iāna ’ia pure i roto i terā uru rā’au i tupu ai tōna ’Ōrama mātāmua : « ’Ua ’oto vau nō tā’u iho mau hara. »
I te paraparaura’a te Fa’aora ia Iosepha, ’ua nā ’ō ’oia : « E Iosepha, tā’u tamaiti, ’ua fa’a’orehia tā ’oe mau hara. »
’Ua ha’api’i Iosepha iho ē, tē ora nei Iesu Mesia. ’Ua ha’api’i ato’a mai ’oia ē, e mea aroha ’e te fa’a’ore hara ’o Iesu Mesia. E mea faufa’a teie ’itera’a nō Iosepha. « E mea faufa’a rahi roa nō’u te ora o tō’u nei vairua [nō] tō’u ’itera’a pāpū nō ni’a i te mau mea mure ’ore », tāna i parau i te hō’ē taime.
E mea faufa’a ato’a teie ’ite nō Iesu Mesia i roto i te ’ohipa tei pi’ihia Iosepha ’ia rave ’ei peropheta. ’Ua hōro’a ’oia i tōna ’itera’a pāpū pūai nō ni’a i te maita’i rahi ’e te aroha o Iesu Mesia i te roara’a o tōna orara’a. ’Ei hi’ora’a, ’ua ha’api’i ’oia i te hō’ē taime ē : « E ti’a i te mau ’ā’au ato’a ’ia tātarahapa ’e ’ia vai mā noa, ’e e hi’o mai te Atua ia rātou ’e e ha’amaita’i ’oia ia rātou nā roto i te hō’ē ravera’a e’ita roa rātou e nehenehe e ha’amaita’ihia nā roto i te tahi ’ē atu ravera’a. »
Te mau hape ’e te aroha
E mea faufa’a roa ’ino te ’ohipa tei pi’ihia Iosepha Semita ’ia rave. ’E ’ua ha’api’i Iosepha ’ia ha’apa’o pāpū i te mau fa’auera’a ’e te a’o a te Fatu, te tahi pae nā roto i te mau hape tāna i rave.
’Ei hi’ora’a, i te mo’era’a te mau ’api pāpa’ira’a o te Buka a Moromona, ’ua rave ’ē te Fatu i te hōro’a nō te ’īritira’a, mai roto mai ia Iosepha, ’e ’ua parau iāna i muri mai ē : « ’Ua ’ōfati pinepine noa ’oe i te mau fa’auera’a ’e te mau ture a te Atua […] E ’ere i te mea ti’a ’ia rahi a’e tō ’oe ri’ari’a i te ta’ata nei i tō ’oe mata’u i te Atua » (Te Ha’api’ira’a Tumu ’e te mau Fafaura’a 3:6–7).
Terā rā, teie ato’a te parau a te Fatu ia Iosepha : « ’A ha’amana’o rā, tē vai nei tō te Atua aroha ; nō reira, ’a tātarahapa » (Te Ha’api’ira’a Tumu ’e te mau Fafaura’a 3:10).
’E ’ua tātarahapa ’o Iosepha ’e ’ua hōro’a-fa’ahou-hia te hōro’a nō te ’īritira’a. ’E mea huru māuiui paha terā ’ohipa nōna, terā rā, e mau ha’api’ira’a faufa’a rahi tāna i ’apo mai—mai te ha’api’ira’a ē e nehenehe tātou e tātarahapa ’e e ha’amaita’ihia nō te aroha o te Fatu.
E Fa’aora ’e e hoa
E ma’a ’ōrama tā Iosepha Semita i fa’ari’i, ’e e mau fārereira’a ’e e mau heheura’a, ’e ’ua ’ite ’oia, ’aore rā ’ua fa’aro’o i te Fatu Iesu Mesia, ’e ’ua ha’api’i i te parau nō tōna nātura, tōna huru ’e tāna misiōni (hi’o, ’ei hi’ora’a, Te Ha’api’ira’a Tumu ’e te mau Fafaura’a 19 ; 76 ; 93 ; 110).
Hō’ē parau mau tāna i ’apo mai, ’oia ho’i nō te mau ta’ata ato’a i ora i ni’a i teie nei fenua te ’ohipa tāra’ehara a te Fa’aora (hi’o Te Ha’api’ira’a Tumu ’e te mau Fafaura’a 76:24).
I taua ato’a ra taime, tē ’ite ra ’oia i te ’ā’ano o te ’ohipa a te Fa’aora, tē ha’api’i ato’a ra ’oia ē, ’ua ’ite te Metua i te ao ra ’e Iesu Mesia ia tātou tāta’itahi, ’e ’ua here ia tātou tāta’itahi. Tē hina’aro nei rāua i te hō’ē tā’amura’a piri a’e ia tātou tāta’itahi. ’Ua hina’aro rāua ia tātou ’ia rave i te mau fafaura’a, ’ia ha’apa’o i te reira ’e ’ia mau pāpū noa ē tae noa atu i te hope’a. Nā teie tā’amura’a hōhonu e fa’atae mai i te ’oa’oa ’e te ti’aturira’a ia tātou nei.
’E ’ua hōhonu roa ato’a ho’i te tā’amura’a o Iosepha iho i te Metua i te ao ra ’e ia Iesu Mesia, i noa’a ai iāna i te parau, i te hō’ē taime ’ino roa o tōna orara’a ē :
« E tāmata ïa vau i te ’oa’oa i te mea tā’u i fa’ari’i, ma te ’itera’a ē ’o te Atua tō’u hoa. E ’ite ïa vau i roto iāna te tāmāhanahanara’a. ’Ua hōro’a vau i tō’u ora i roto i tōna rima. ’Ua ineine au i te haere i tāna pi’ira’a. Tē hina’aro nei au ’ia pārahi i pīha’i iho i te Mesia. »
’A ’imi ai ’oe nō ni’a i te orara’a ’e te mau ha’api’ira’a a Iosepha Semita, e nehenehe ’oe e pe’e i tōna hi’ora’a. ’A tātarahapa, ’a rave ’e ’a ha’apa’o i te mau fafaura’a, ’e ’a tāmau noa ma te ha’apa’o maita’i. ’Ei reira ato’a ’oe e ’ite ai ē e hoa nō ’oe te Fa’aora.