Mā’iti i te hiero

Te hiero fātata a’e, tei ni’a ïa i te tahi atu motu. Nō te tere i’ō, e rerera’a e 45 minuti ’aore rā e fanora’a e 12 hora. ’Aita vau i haere a’enei i te hiero nā mua atu, ’e i te matahiti hope’a nō tā’u ha’api’ira’a, ’ua fa’anaho tō’u māmā ’ia tere mātou i’ō. I fa’aherehere ’oia i te moni hō’ē matahiti te maoro, ’ia haere atu mātou pā’āto’a.

Te vāhi ’ino rā, e ho’i mai mātou i te fare i muri mai i te ha’amatara’a ha’api’ira’a, e ha’ape’ape’ara’a ïa nō’u. E mea faufa’a roa nō’u ’ia fa’ari’i i te nota rōpū maita’i i te ha’api’ira’a, ’ia noa’a mai tā’u pūtē moni ha’api’ira’a nō te ha’api’ira’a tuatoru. ’Ua mana’o a’era vau ’eiaha e haere i te hiero, ’o te fa’ataupupū tō’u ma’irira’a i tā’u nota rōpū. Parau mai nei tō’u māmā : « ’E mai te peu e pure ’oe nō te ani i te tauturu a te Fatu ? »

’Ua ’ōtohe ri’i au nō te taiā, terā rā, ’ua fa’aoti au e pure. ’Ua arata’i mai te Metua i te ao ra iā’u, ’e ’ua mā’iti atu ra e haere i te hiero. Te hepetoma tā’āto’a mātou i’ō, ’ua haere mātou i te hiero i te mau mahana ato’a. Fa’ahiahia mau ! E ’ohipa fa’ahiahia mau te ravera’a i te mau bāpetizora’a ; ’ua putapū pūai au i te Vārua.

I te hope’a, ’ua manuia vau i tā’u ha’api’ira’a ma te nota rōpū maita’i. Nā te tāpe’ara’a i te tā’amura’a piri ’e te Fa’aora i tauturu i te fa’atupura’a i tō’u mana’o tīa’i i roto i terā taime. ’Ua ’ite roa vau tei pīha’i iho ’oia iā’u, nō te hōro’a mai i te pūai. ’Ua ’ite te Fatu i tā tātou mau tauto’ora’a, ’e ’ia tu’u tātou i te mau mea i roto i tōna rima, e nehenehe e ti’aturi ē, e maita’i te mau mea ato’a.

’Ua māuruuru roa vau i te mea ē, ’ua itoito tō’u tuahine i te ani manihini i te mau misiōnare i tō mātou nei fare. ’O māua te ta’ata mātāmua o tō mātou ’utuāfare tei bāpetizohia—13 matahiti tō’u ’e 15 matahiti tōna. ’Ua ’ite au ē, e tamari’i here au nā tō tātou Metua i te ao ra. ’Aita roa vau i ’ite i tō’u metua tāne tāhuti nei i roto i tō’u orara’a, ’ua tauturu mai rā te reira ’ia ’ite ē e Metua i te ao ra tō tātou ’e ’ua hāmanihia vau i tōna hōho’a. Tē ’ite nei au i tōna here nō’u ; ’ua ’ite au ē, i roto i tō’u mau taime fifi roa a’e, tei pīha’i iho ’oia iā’u.